COMMUNITY QUARANTINE CENTRE HI!?

Columnist, EXPLORE MIZORAM

Home Quaratine him tawk lohzia a lang ṭan a, langchhuak lo zingah pawh him lo tam tak a awm ngei ang tih a rin theih ṭan ta a. Rilruin kil tin a dap a, a hahdam mawlh lo.



Chutih mek laiin sorkar in Quarantine Facility a siama hun hmang mek te pawh an hun hman tur zat an hmang zo chho ṭan a. Chhungkaw tam tak chu tun hunah hian lungngai takin an awm ngei ang. Sorkar Facility a ni 14 an hman hnu lamah hian mahni in lamah ni 7 dang in quarantine leh tur a ni a. Mahse home quarantine criteria ah chhungte nena inchenpawlh loha inkhunghran hmak theihna room, bathroom & toilet awm tel nghal ngei neih a ngaih avangin hetiang hmunhma nei lo hi tam tak an awmin a rinawm a. A bikin thingtlang lamah hei hi kan mutan lian tak a ni dawn. Hmunma lo nei ta tehreng pawh ni se a him tawk lohzia chu a lang sa reng tawh bawk.. Eng emaw chu tih ngai a awm a ni?

Khawtlang inlungrual leh fing deuh te chuan:
- Hetiang ho tan hian Community Quarantine Centre siamin, an veng mi Sorkar Quarantine Facility a hun hmang zo apiang mahni ina haw lovin heng khawtlang bila centre siam ah hian ni 7 chhung hun hmang tura hruai luh nghal an ni ṭhin a.
- Aizawl khawchhung bik leh khaw ṭhenkhatah chuan hetianga a hranpa a ni 7 khung hran leh ngai lo tura ni 21 chhung quarantine tlang nghal an awm bawk.

Hengte hi ruahmanna ṭha tak ni mahse khawtin leh vengtinin kan kalpui lem lo a. Ni 21 hi Sorkar Quarantine Facility a bantlang mai turin sorkarin sum indaih lohna a ngahzia lah kan hre reng mai bawk si. Hetah tak hian a ni khawtlang leh Kohhran tana hun ṭha a inhawn ṭan tâk! Sorkar rethei tak retheihna belhchhah tura a sum pawt che ve lo tur Community Quarantine Facility hi kan duh phawt chuan siam a har lo. A siam tawh sa te biakrawn tur lah an tam..

Khawtlang hruaitu kan ni a nih chuan kan khawtlang himna kan ngaihpawimawh a ngai a, chuvangin khawtlang hruaitu ṭha te chuan ruahmanna an siam nghal suau suau mai a nih hi. Chutih rualin khawtlang hruaitu ten hei hi an ngaihtuah pha lo emaw, an inhuam lo emaw a nih pawhin Kohhran kan la nei cheu..

Kohhran hi he leia Lal Isua rawngbawlna chhunzawmtu ber a ni a. Lal Isua khan he leia a awm lai khan Chanchinṭha thu a hril bakah a rawngbawlna apiangah tihdam rawngbawl hna a kalpui zel a. Chuvang taka Kohhran pawhin vawiin thlenga hriselna lam ngai pawimawha hospital hial te pawh nei a ni a. Tuna he Covid-19 dona kawnga pawp awm thei hnawhphui tur awm hi Kohhran tana kohna a ni reng mai lo'ng maw!?

Khawtlangin ruahmanna a siam lo a nih chuan khawtlang dinhmun kha risk ah a awm theihna lai kan hmu thiam maiin a rinawm. Chuti chunga khawtlangin chet a la la lo cheu a nih chuan Kohhran hi 'Heta hi ka awm e' ti theitu ber tur chu a nih hmel.

Dinhmun harsa zawk leh home quarantine tura hmun hma nei lo te hi khawi Kohhranah emaw ber chuan member an ni ngei ngei dawn a. A chiang reng. Chuvangin eng denomination mi leh sa pawh ni se, khawtlang a chet lohna hmuna Kohhran te hian chet lâk nachang kan hriat a va ngai tehreng em. Chuti lo chu kan khawtlang hruaitute ngaihthah luat leh keini penchhuah hreh luatah kan khawtlangah he virus hian darh na chance a lo nei reng thei si a..

Sum, hun leh tha a kal ral kan hlau te pawh a ni thei e. Mahse, Kohhran member ten he virus hi an kai sup sup a nih chuan thawhlawm thawh thei lo dinhmunah hial pawh an la ding lovang tih a sawi theih loh a, chuvangin Kohhran chhawmdawlna leh tualchhung sum heti lamah kan lo pawt hek ta a nih pawhin he hna hi Lal Isua rawngbawl hna chhunzawmna ngei nia a lan mai piah lamah khawtlang him zawkna tur a ni a. Chuvangin tuna insenso hi a economic zawnga chhut chuan investment pakhat ti pawhin a sawi theih ang. Kohhran mi te an hrisel a, an him miau chuan Kohhran hian a buai theihna tam tak a pumpelh dawn si a.

Chutih rualin, loh theih loha Kohhran in a vaihma ngai khawpa kan khawtlangin pawp awm palh thei te kan ngaihthah a nih hi chuan ka khawtlang hmabak a eng viauin a rinawm loh viau a ni..

Chuvangin, he hri leng hi paltlang a nih hunah pawh, Mizo history chhui let a nih apianga he hun harsa takah hian kan khawtlang/Kohhran te a theih tawpin a lo ṭang ve a ni tih la sawizui atan reng pawh kan hun ṭha neih hi i bawhpelh lo hram ang u. Chuti lo zawng, ṭhang leh thar ten tun hun ami te hi min la rawn dem lutuk palh hlauh dah ang e.

Pathianni hman nuam vek u..


EXPLORE MIZORAM


(A hnuaia fakna hi lo hmet ve rawh.)

Post a Comment

0 Comments