THE FOURTH WALL

(Daidanna Dangdai)

- Francis Lalhmahruaia

 Mita hmuh loh daidanna dangdai,

 Tahna bang inchhawng hi an hre lo.

 Tah chuan mahni ngaiin ka tap a,

 Mahni thinlung ngei hi ka buan thin.

 Khawvel hian hnunglamah min dem a,

 Hmangaih ankanem ten min deng thin.

 Sakruang hi kan derthuam a ni si a.

 Kimtlangpuiin thinlung an lem a,

 Hmangaih hi hmangaih a rem ve si lo.

 Khawvel danah leh i dan hmaah-

 Ka tan thiam loh channa mai a ni.

 Inanna danglam, hnaihna hlat si,

 Hmangaihna hi huain ka tap thin,

 Mahni inkhapa thinlung sualin,

 Vanram chu hremhmunin ka sual thin.

 Hmangaihnaa hmangaihna dovin,

 Tlawhpawh loh he thinlung ram reh hi,

 Thinlung chauva ka tlukna hmun.

 Ngawi rengin tah chuan ka au chhuak a,

 hmangaihna hming hi ka hau si thin.

 Beiseina pial tlepah ka tlu a,

 Kaithotu ngaiin kan tap fo va,

 Hmatiang pawh hnutiang chhawn a ngai thin.

 Pangngai nih pawh pangngai lohna mai,

 Kan tawnah humsual a dam si lo.

 Ka duhthlanna hian min do reng a,

 ka tan thlan tur reng reng a awm lo.

 Duhthusamah pawh duhthlan tur a buai a,

 Hriatthiam theihloh nih inhrechiangin,

 He kulh daidanna dangdai hi ka hua a,

 Mahni inphum boin ka nung thin.

 Aw ka Pa, Nang dotu nih hlau va,

 Thinlung dova ka tah chang ni hian,

 Mittuiah tal hlimna dah ve la,

 Ka vanduainaa vanneihna te,

 Ka tawrhnaa hahchawlhnate,

 Lawm taka hrethiam ve tawh tur a,

 I remruat min kawhmuh si loh chuan,

 He fiamthu nunrawng hi duhtawk rawh.

 Sual nei loin min den an tum hunin,

 Ka hmaah ban i phar a ngai ang a,

 A nih loh chuan an dem loh nan che,

 Nangmah i inden a ngai dawn si a:

 He leiah rel leh selna karah,

 Mahni invahvaihpui mah i la:

 I kiang ka thlen hunin: ka nihna,

 I thil tihsual hi siam tha rawh aw.

Note: He poem hian LGBT community a mi te tan a hringnun leh Hmangaihna te an beidawn thlak zia a tarlang a, Kristian-na ang zawnga thlir a beisei tur awm ve chhun a tarlang bawk a ni.