Aizawl | June 24 2020: Sorkar läipui chuan vawiin khan dan hmanhmawh (Ordinance) hmangin ram chhunga Co-operative Bank te chunga thu neihna sang leh khauh zawk Reserve Bank of India (RBI) hnena pekna tur remtihna chu a pawm.
Reserve Bank of India in Co-operative Bank te hna thawh dan chungchanga thu neihna sang zawk pek a ni ang a. Chu chu Commercial Bank te chunga RBI thu neihna ang a ni ang . RBI hian sum endik leh hotu nihna kawngah, Urban Co-operative Banks 1,482 leh Multi-state Co-operative Banks 58 te chunga thu neihna, he dan hmanhmawh (Ordinance) hi President in a pawm hnua dan a nih veleh hman nghal a ni ang. Dan hmanhmawh hi thla ruk chhungin Parliament dan puitling ni turin a pawm a ngai a ni.
“Urban Co-operative Bank leh Multi-state Co-operative Bank te chu RBI kaihhruai leh vilvanna hnuaiah an awm tawh dawn a ni. RBI kaihhruaina dan (supervisory norms) hi Commercial Bank te chunga a hman ang hman theih a ni ang. Hei hian pawisa dahtute sum him zawkna tur a ni, " tih thu Information and Broadcasting Minister Prakash Javadekar chuan thu thar thehdarhtute hnenah a sawi.
Kumin February thla khan Sorkar läipui chuan , Co-operative Bank te sum endikna chu RBI kaihhruaina ang taka khirh leh khauh zawk leh ruahmanna țha thei ang bera kaihhruaina hnuaia kalpui a nih tur thu a lo sawi tawh a ni. Reserve Bank of India hian Co-operative Bank Board te thu neihna tih danglam theihna a nei ang.
RBI hian Co-operative Bank a Board member ni thei tura thiamna ngaite pawh bithliah a siam phalsak a ni ang a, Chief Executive Officer tur chungchang thlengin a ni ang.
Heng Bank te enkawltu tur hi tun dinhmunah hian Co-operative body te thlan țhin a ni. RBI hian hotu thlan chungchangah pawh hian thu neihna chin a nei tawh dawn a ni.
Co-operative Bank ah hian sum dahtu mi nuai 86 an awm a, an sum dah zat hi Rs 4.84 lakh crore a tling bawk.
“Heng Bank te siam țhat hna thawh chhoh anih dawn avang hian thil thar engemaw a awm dawn a, Bank dawrtute harsatna erawh siam loh kan tum ang, " tih Preakash Javadekar, Union Minister chuan a ti.
Cabinet hian nikum lama Punjab and Maharashtra Co-operative (PMC) Bank nasa taka a buai avang khan Banking Regulation Amendment Bill, 2020 chu February thla khan a lo pawm tawh a. Amaherawhchu, Sorkar hian tih dan thlak lehin dan hmanhmawh lama kalpui turin a rel ta zawk a ni. Tun dinhmunah heng Bank te hi Central leh State Sorkara Registrar te hnuaiah inziak lutin an inenkawlna vel zawng zawngah pawh mawh a phur a. Hei hian loan rulh chungchang te, sum endik leh Board of directors chungchang te a huam a ni. "RBI chuan kaihhruaina hmangin a enkawl tawh ang“ tih RBI Trends and Progress Report 2018-19 chuan a tar lang.
Heng Bank te enkawl hna hi RBI leh State te kutah țhuang hnih angin Co-operative Bank kalphung pel deuh hleka kal turin a lang ta a ni. Hetiang anih mek lai hian dan thar duanin thlak a tum chu RBI nasa zawka share tlem te chungah pawh a inrawlh theihna tur a ni.
March 2019 dinhmun ang chuan India ramah Urban Co-operative Bank 1,544 a awm a, chu chu Co-operative Bank 96,792 ațanga 1.6% chauh a tling phak a ni. Rural Co-operative Bank 96,248 te hian Co-operative Bank te hausakna 65% lai an nei a, hei hi an awmna State Sorkarin dan a siam anga enkawl a ni.
BUSINESS STANDARD
June 24, 2020
@ 17:29 IST
Livemint
June 24, 2020
@ 04:46 PM IST
====24==06==20==
- Huna Kawlvawm
Post a Comment
He post chungchanga i ngaihdan lo sawi ve rawh: