Ram chhan nana ramri a duty nula boral; A sun nan YLA Flag ngul chanve in zar dawn

Aizawl |June 9, 2020: Hripui leng vanga ram leh hnam chhan nana ramri a duty H Lalvenmawii chu dam lohna avanga damdawiin panpui a nih hnuin vawiin khan Sangau PHC ah a boral.

H Lalvenmawii sun nan hian naktuk zing ni chhuah atanga tlai ni tlak thleng Young Lai Association (YLA) branch tinah YLA Flag a ngul chanve in an zar dawn a, Lawngtlai khawpui-ah minute nga chhung a sunna hun hman a ni dawn bawk.

"YLA branch tinin June 10  ni chhuah atanga ni tlak thleng hian mahni huam chhung langsar lai ah YLA flag a ngul chanve in zar vek nise, Nula H Lalvenmawii Sangau khua-a a vuina hun hman laiin  Lawngtlai khawpui chhung-ah  Minute 5 chhung  (dar 1:00pm-1:05pm) sunna hun hman tur ani a, hemi hun chhung hian thawm chhuah miahloh tur ani. Lirthei chetvel pawh tih tawp vek nise." tiin Central YLA thuchhuah chuan a tarlang.

Sangau khua a cheng H Kapliana fanu H Lalvenmawii (18) hi Fungsihchuah (Saisihchhuah) ramri-ah Duty mekin, a duty laiin a damlo a, PHC Sangau-ah enkawl a nih hnuin vawiin khan a boral ta a ni.


Thudawnnain a tarlan danin, H Lalvenmawii hi Indo-Myanmar border, Fungsih chhuah-ah May 4-11 chhung khan YLA Sangau-I Branch member dangte nen an duty a, Ramria an duty lai hian a dam lova,  hruai haw a ni a.
May ni 29-ah  ASHA-ah thisen test in Malaria PV hmuh a ni a,  Sangau PHC-ah Treatment pek a ni.
June 3-ah a khawsik a reh theih loh avangin Sangau PHC-ah admit a ni a. Malaria treatment bawk a enkawl chhunzawm niin, June 5 khan fever subside tawh vangin Sangau PHC atangin chhuah a ni leh nghal a. Mahse, Kawthatlo leh BP hniam vangin June 8 khan Sangau PHC-ah  vek hian admit leh a ni a.  Malaria PV nei tawh a nih avangin fimkhur thuhla-ah thisen exam (Microscopy leh RDK) hmanga test leh a ni a, hetah hi chuan a negative tawh thung, niin thu dawnna chuan a tarlang.

Beiseina nena enkawl a nih mek laiin, vanduaithlak takin vawiin chawhnu dar 1:00 khan Sangau PHC-ah "Hypovolemic shock with Acute Renal Failure" avangin chatuan ram a pan ta a ni.




Sangau Sub-Headquarters YLA ruahmanna hnuaiah YLA branch pasarihin Tuipui dung hmun sarih - Pangkhaw chhuah, Ralven chhuah, Zukpul chhuah, Saisih chhuah, Thanngerh chhuah, Hmunchhun chhuah leh Fungsih chhuahah te ramri hi an veng a. Fungsih chhuah hi H Lalvenmawii te branch, YLA Sangau-I  Branch in an vil a, chawlhkar khat zel inchhawkin detailment an siam ṭhin a ni.

Ram chhan nana nula la naupangte pen chhuak hi a chhuanawm takzet a, Mihring dan zawh loh natna vanga nun a chan ta mai hi a pawi tak zet a ni.

Post a Comment

0 Comments