Pride Message

PRIDE MESSAGE

            - Lalrinmuana Varte aka rynn.v (a hmingah hian hmet la,  IG profile hmu thei ang)



Pride month chibai vek u le. Ka hming chu Lalrinmuana a ni a, makeup artist ka ni. LGBT community-ah hian ka mikhual lo hlein ka hria a, chuta kan harsatna tawhte leh insiamṭhat kan ngaihna ka lo sawi dawn a ni.

Gay, lesbian, bisexual leh transgender tih hi Mizo ṭawngah chuan tuai leh patil tih hian a fâwm kim viauin ka hria. Tuai leh patil tam tak hian harsatna kan tâwk nasa ve em em a, mite mit hmuhah tilang chhuak em em lo mah ila kan nun chhung ril hi a hrehawm ve ṭhin khawp mai. Mihring ruat, mipa leh hmeichhe pangngai awm dan tur anga awm lo ta na na na chu hmuhsit leh diriam pawh kan hlawh nasa em em a. Mite tihlim ṭhin viau mah ila a tam zawk chuan min tenin min thinhrik tlat thung.  Social media kal tlangin min chirhtheh a, khawtlângah ni se mi pangngai biak aia aw ki danglam deuh hleka min biain min chhaih nawmnah a. Chu mai a la ni lo, mi zawng zawng lenna, misualte tlûk luhna tur ber Kohhranah lah pulpit tlâng aṭang te hialin, Pathian rawngbawltu inti kâ aṭang ngeiin tuai leh patil huatna leh thinhrikna thu rawn chhuak hi chu, mi fel leh tha zawk ni-a inchhâl tih awm a ni lo tak zet a ni. Amaherawhchu, Pathian khawngaihna avang liau liauin tuai leh patilte hi thil ngai ho lam chi leh fiam dawl tak tak kan lo ni hi chu kan vannei letling viau thung

Mizo mipuite kan rilru sûkthlêk kan tihdanglam a ngai nasa viau mai. Mipat mipatna leh anpui kawp hrim hrim hi thlâwp rawh u ka tihna a ni lo a, chu chu Pathian thu nen pawha inkalh tlatah ka ngai thung. Amaherawhchu, tuai leh patil heti tak maia kan hmusit thin hi chu inen lêt kan ngai nasa viau mai. Mihring chu a vanglai chen phal a ni a, a chên ṭha lo a nih erawh chuan ama tuar tur tho a ni. Thil ṭha lo titute avanga lungngai lo tur si hi kan lungngai mah mah em aw tih hi rilruah a lian khawp mai. Pathianin ang khat vekin min en a, thlei bîk a nei lo ang in, kan biak Pathian zia kan ṭawmpui theihna kawng awlsam tak a nih hre chungin inhmusitin inthlei bîk lovang u.

Tin, tuai leh patilte tana ka chah duh chu, nangmah leh nangmah kha i inpawm hma loh chuan eng tikah mah tu mahin an pawm thei ngai lo ang che. I zia lo lutuk khan awm tum mah la, he lang lo tura thuhruk awm lohna khawvelah hian i inthup reng thei chuang lovang. Chuvangin, i nihna kha zahpui lovin, Pathian hre chung zelin khawvel hi hmachhawn ang che.

❤️🏳️‍🌈❤️🏳️‍🌈❤️🏳️‍🌈❤️

Post a Comment

3 Comments

He post chungchanga i ngaihdan lo sawi ve rawh: