Naupang Pahnih Dilah tla hlum

Aizawl | June 6, 2020: Chawnhu khaw naupang pahnih Hriatsanga leh Stephan-a te chu vawiin chawhnu dar 1:30 vel khan Pu Champion-a Sangha Dil (Tuikhuah)ah an tla hlum.

Thudawnnain a tarlan danin, Naupang ho hi khua aṭanga KM hnih leh a chanve vela hla Sangha Dila chêng tur in an kal a, an zinga naupang 3 te chu Dil Tui, puitling pil zeta thûkah chuan chéngin an talbuai zui taa, an zinga naupang pakhat chu a nauin changêl lian vak lo theh luh sakin chumi hmang chuan a inhâi chhuak thei hlauh a, an zinga pahnih te; B. Remruatkima fapa Lalhriatsanga (13) Leh Lalsiamthanga fapa Stephan Vanlalawmpuia (9) te chu vanduaithlâk takin an boral ta a ni.

Naupang dangte hian vanduaina an tâwk tih an hriatin puitling pun turin Sangha Dil aṭanga hla vak lo 33 KV Sub-Station WT Room Duty te hrilhin an tlan chho vat a, anni hian khawchhung lam an hrilh nghal a, a hre hmasa apiang tlan liamin naupang ruang hi an la chhuak ta a ni. Hriatsanga ruang hi hmu hmasain a hnu deuhah Stephan-a ruang hi an hmu leh a, Naupang vanduai tate ruang hi zanin dar 9 hian vuiliam an ni dawn niin PC Ramtharmawia chuan FB ah a post.

(Pic: Naupang vanduaite tlâkna Sangha Dil)

Stephan Vanlalawmpuia hi kum 9 chauh mah nise hmanni lawk khan Bible a chhiarchhuak a, tunah hian ziah chhuah leh tumin thui fê chu a ziak leh tawh a ni. A puitlin huna Pastor nih a tum thu a sawi fô ṭhin niin an sawi.

Chawnhu khua hi Lawngtlai aṭanga hnaite, Lawngtlai town area huamchhunga awm a ni.

Post a Comment

0 Comments