MIZO HNAM TAN YMA

- ✍🏻  Vidpuia Hrahsel
Contributing Editor, EXPLORE MIZORAM

Ṭanpui ngai an awm in tunge che chhuak hmasa ber a? Tu nge ṭanpui ngai dap a,  tuamhlawm thin tiin zawhna awm ta se mizo thinlung ah chuan YMA a ni ngei ang. Chu Yma chuan a ni, mizo tak leh kan kristianna nen a inhmeh tak chunga i lungngaih leh puih i ngaih huna pui tur che chu. YMA hian kumpuan vawi tam tak thupui chi hrang hrang neiin, kan ram leh hnam tan hma la in, kan hnam hmasawnna turin a theihtawp a chhuah ṭhin a. Mi nawlpui in kan tih peihloh leh kan ngaihven peih loh buaipuiin a ṭul ṭul a thawk hmiah hmiah mai zel a. Mi tih lunghnur emaw thu inchuh deuh rap emaw mi tih lawm vek sen hek lo le, tu emaw lungawi loh avang leh tu emaw in a ngaihthah vanga he pawl hi zuih mai tur ah ngai suh! He pawl hi Zosap Missionary te din a ni tlat.


pic by:Vanglaini

Pawl thil tum ngelnghet tak nei leh inkaihhruaina mumal tak nei  a nih vang hian, a rinawm a, a chhunga chen nawm emaw pawl a chhum hmin tawh mihring zet ho chu eng hun ah pawh nise, che chhuak thei leh puih ngai an awm pawh a tlanchhe ngailo, midang te tan a inhuam  mi an ni. He pawl hian ze ropui tak a neih chu Mizo nun ze mawi tak Tlawmngaihna leh Aia Upa Zah na te dai mai  tur a nunpui  a, a chelh tlat hi a ropuina a ni.Mi tam tak chuan he pawl YMA hi an hmu kristian lo riau thin, amaherawh chu ṭanpui ngaite ṭanpui a, chhiatna tawh hunah a ṭul ṭul thawk a, midangte pui a, mahni hna tul kalsan ṭhin tu te hi kan hmu kristian thei lo ang maw? He pawl YMA hi kan hmuh kristian lo na chhan tam tak chu a ruh lang rawt in sawi ang aw, kohhran a inhmang peih lo emaw, khawvel lama tlan te an inhman ṭhin avang te leh thil tih awlsam lo, emaw hnatlan te, thlan laih te, mitthi lumen te leh engemaw dang dang tihtur a tam vang nge, kohhran ṭhalai a inhmang vak lem lo te tih tur ah kan dah tlat ṭhin, kohhran a inhmang lo te  hi an inhman ṭhin vangin kan hmu tui tang lo tihna em ni?

Mi sawi apiang kan awih a, mi tih atan chauh kan dah ṭhin vang em ni le? Mi sawi hnawm avangin he pawl hi i hmu dang mai maw? Mi sawi i awih a, i sel ngawt chuan  he pawl phen a mizo tlawmngaihna leh kan hnam rohlu chawisang tu YMA hi kan hmu kristian thei lovang.Mi sawi apiang awih a, a pawl chhung a, inhmang chuang silo a, mahni in hmu lian tlat leh, indah sang te ho hian YMA kan mamawh vek dawn, kan khawtlang nun siamṭha a, mizo chu kan pipu te atang tawh a , intuamhlawm a, chhiatni leh ṭhatni a in lawm hnam kan ni tih hi i haider theih ka ring lo. YMA ah hian tu pawh kan leng a, mizo hnam i nih a, mizo nun ze mawi ngaisang a, he hnam kal zel tur atan a tha i thawh ve theihna pakhat chu YMA hi a ni. Khawvel ṭhang zelah changkanna in mizo te pawh min tuam hneh a, changkan duh tho siin, midang inti changkang kan ti a, kan nihna aiin midang nihna emaw midang hminghliauna in kan beng a verh a, vengchhung ah zualko puang se, a thu in min ti ṭhawng zo lo a, chetchhuah nachang lah kan hre hek lo.

Changkanna diklo rualawhna diklo in min rûn a, mizo hnam hi a tluchhe lek lek ṭhin zawng a nih hi. Mahni hnam zia pawh hrechiang lovin, kan ngaihsan zawng te hnam zia leh nunphung chu kan hre leh em em lawi si! Changkanna diklo kan zawh mek zawng a nih hi.Changkanna hi thuamhnaw ah leh kan thil neih ah chauh ti lang lovin, mizo nun ze mawi tak, aia upa zahna te, taimakna te, rinawmna te, tlawmngaihna te a inthuam zawkin, mahni dinhmun ah lungawi ila, inti changkang lovin, nun changkang neih i tum ang u.

Pu Liandala khan Aia Upa Zah thiam rawh tih hla a phuah a, a chang thum naah khan :
 Ṭanpui ngai awma an awm chuan,
Tlawmngai langin, ṭanpui zel rawh 
tiin, heta tang hian kan Mizo nun ze mawi tak chu ṭanpui ngaite ṭanpui a, tlawmngaih chhuah na hun tak leh pi pute rothil hlu kan chhawm nun zel a, kan hnam hmasawn nan chuan ṭanpui ngaite ṭanpui hi kan tih mak mawh a ni.
YMA a inhman hi kan kristianna nun nen a inhmeh em em a,  he pawl a inhman hi a inchhirawm loh a, Mizo nun ze mawi tak hi changkan san chi a ni lo a, Mizo hnam ah i piang a, Mizo hnam ziarang ti lang tu leh hnam dang te laka kan danglamna chu midang te tana inpekna leh midang te chunga phut let nei lo a, inhlan hi a ni. Mizo Hnam in a kan inchhuanna tur leh khawvel tukverh a kan hmingṭhatna tur chu kan danglamna em em midang te tana inhlan te, aia upa zahna te, tlawmngaihna te, rinawmna te leh ṭanpui ngaite ṭanpui hi a ni.

YMA hi Mizo Hnam in nghahna lungphum pawimawh tak a ni a, he lungphum hi kan thinlung ah kan phum ngheh a, kan rilru ah kan sawhngheh angai hle, he pawl a inhman mai hi a tawk lova, a taka kan chet chhuah a, kan nun ah kan lantir a, midangte entawn tlak leh phut luih nei lova kan inpek chuan Mizo Hnam nun ze mawi hi kan thinlung ah kan phum nghet mai dawn a lo ni. Chanhai, riangvai te belh ngam YMA, hmeithai te chhawmdawl a,  a ṭul apiang thawk tu YMA, chhiat tawh a che hmasa ber YMA, kan ram tan hian innghahna tlak leh Mizo nun ze mawi chhawm  nung a, thangṭhar lokal leh zel tur te tan a,  pawl belhtlak leh kan thinlung a Mizo Hnam nih  ti nuamtu, he pawl ropui hi a meichher chhi eng zel tur in nang leh kei hi kan pawimawh hle.

I lo chik ve ngai em? YMA hmu kristian lova, YMA inhman nachang hre lo leh YMA sawi neptu khan he  YMA  hi a la mamawh dawn chauh a, khawtlang in chhiat a tawhin khawvel lama tlan ti a, kan kawm that peih vak lo te kha mizo tlawmngaihna lantir hunah a kul a taia kan rinrawl ber leh a taima ber ber an ni leh si, khawvel changkanna leh mahni inhmuh len avangin kan inti engemawni a, YMA a inhmang nge nge chu chhiat tawk chiah se, mizo hnam nun ze mawi tak inlawm tawn na leh a lo chet chhuah ve tawh ṭhin na kha kan hre reng ṭhin, YMA a, inhmang lem lo, chu chhiat han tawk se, tlemin kan phai deuh ṭhin, he thil awmzia ber chu YMA a inhmang lo leh YMA sel tu kha kan pui dawn lo tihna leh an chungah kan tlawmngai lo bik tihna lam nilovin, inhmang na na na leh che chhuak tam na na na chu kan teh dan a dang deuh.

Chuvangin he pawl ropui, zosap missionary ten min hnutchhiah hi kan Mizo nun nen a inhmeh em em a, khawvel changkanna hian pawlh dal lo se, Mizo takin, i YMA deuh deuh ang u.

1 Comments

He post chungchanga i ngaihdan lo sawi ve rawh:

  1. YMA hi chu a ṭha thlawt a, chutih lai erawh chuan hruaitu te hian intih ropui nan leh intih lar tum nan kan hmang ang tih hi a hlauhawm ka ti.

    ReplyDelete

Post a Comment

He post chungchanga i ngaihdan lo sawi ve rawh:

Previous Post Next Post