HMANGAIHNA VANGIN KA LA NA VE LO!

Ziaktu: Hriata Hrahsel

Hmangaihna chungchang ziak tur hian tu nge maw ka nih le? Ziak tlak ka ni em ni?  ka inti fo thin. Mahse keimahah a thawh ve miau si avangin mi nuihzatbur tur tal pawn kan thailang ve ang e. He thuziak hi in pawm dan a nih chiah loh pawhin keimahah chuan ka pawm dan a ni miau a. Chhiar dan lo thiam mai teh u.


Hmangaihna Chu
'Khawvela hlu ber leh pawimawh ber, engkimin a zawn ber chu hmangaihna hi a ni' tiin bul kan tan teh ang. Ni e, a dik alawm, hmangaihna avanga nupa lo ni ta te, hmangaihna avanga chhungkaw lo indin ta te chu sawi loh. Christian-na atanga thlir pawhin kan khawvel bul intanna pawh Pathian hmangaihna vang a ni tih kan hriat kha.  Hmangaihna famkima thuam a nihlai kha chuan kan khawvel pawh hi a nuam a, Sual a lo luh hma kha chuan engkim a famkim a, hlimna bak hriat tur a awm lo a nih kha. Hemi chin hi chu duhtawk ta ila, ka sawi tum takah kan lut tawh ang e.

Kan Nat Thinnate
Mi tu emaw hmangaih tak ka nei a, a ni pawhin min hmangaih ve thin. Inhmangaih tawnna atang chuan lungngaihna leh hrehawmna te chu thai bo an ni a, tuarna te pawh hmangaihna chuan chanchin hlimawmah a chhuah zel thin. Ka hlim a, ka lawm bawk a, a ni pawh a hlim ve thin tih ka hria. Mahse, thil pawi tak a thleng ta!

Hun te a lo kal zel a, thil tam tak a lo inthlak zel a, ka hmangaih tak chuan hmangaih dang a lo neih tak avangin ka kalsan a lo ngai ta.. Ka nat phah ta a, thinlung hliamin ka awm a, mahse, hmangaihna chuan min tina lo.

Nupui fanau ka nei a, ka chhungkua hi ka hmangaih tak zet thin. Mahse zu inmi ka ni a, zu hi ka thlah thei lo. Buaina tam tak a thlen a, a tawpah phei chuan ka nupui leh ka fate chuan min chhuahsan ta. Ka hmangaih te an nih avangin ka na a, ka ngai thin em em a. 'Min hmangaih vang tal pawhin min chhuahsan lo se' tiin ka ngaihtuah fo thin. Mahse, hmangaihna vanga na ka ni lo.

Chhungkaw hlim tak ni thin kha an pa berin a awm lohsan hnuah inhmangaih taka chengho thin a fate chu ro chungchang vangin an inhmuthiam ta lo a, mihrang ang maiin an awm phah ta. Inhaw viau mah se an unau inhmangaihna chuan hmun tlemte a la luah ve avangin inchhirna leh hrehawm tihna chuan a chenchilh kumkhua tawh ngei ang.. Mahse hmangaihna vanga na erawh an la ni chuang lo.


Engnge min tinatu ber chu?
A chunga ka sawiho khi en vang vang la, hmangaihna vanga na an ni tih i lo ngaihtuah em? A chhanna chu 'ni lo e' tih hi a ni! Min tina thintu ber zawk chu 'hmangaih lohna' zawk hi a ni.

Ka hmangaih takin hmangaih dang min neihsan a, min kalsan lai kha chuan ka na ngei a. Mahse ka nat chhan chu min hmangaih tawh loh vang a ni. 

Ka nupui leh ka fate'n ka hmangaih em em a ni tih hre chungin min chhuahsan a, ka na lutuk. Mahse ka nat chhan ber chu hmangaihna aia zu ka thlan zawk vang a ni. 

Rosum vanga a unau hliamtu kha hmangaihna aia  rosum a thlan zawk vanga na a ni.

Hengho bakah hian natna kan inthlen tam tak a awm a, kan sawi vek seng kher awm lo ve. Mahse kha natna kha hmangaihna vang ni lovin hmangaih lohna vang leh hmangaihna aia thildang dah pawimawh vang zawk a ni asin. Lal Isua ngei pawh min hmangaih vangin kan tan a tuar a, mahse a bul berah chuan mihringten kan hmangaihna aia kan thil duh kan dah pawimawh vang kha a ni asin.

Hmangaih lohna avangin tuar a ngai ta a, chu kan tuarna chu hmangaihna bawk lo chuan tihdamna tha zawk a awm thei lo. Hmangaihna avangin tuar ngai tam tak awm ve bawk mah se he hmangaihna hi a lal ber miau chuan hlimna vawrtawp a then leh thin. Hmangaihna hi a ropui asin.

Hmangaihna vangin ka la na ve lo!
He hmangaihna ropui tak hi kei chuan ka la natpui ve lo. Hmangaihna rinhlelhtirtu che chuan hmangaihna der a hlan che tih hria la, hmangaihna hi ringhlel ngai suh. Hmangaihnain a tina a ni tih ring lui tlattu chuan hmangaihna awmzia a hre lo a ni. (Hmangaihna dik tak i hriat duh chuan Bible chhiar rawh)

I hmangaih kha hmangaih nia inhre ringawt lovin dik takin hmangaih la, i nat chang a thlen pawhin a rei ngai lovang.

Hriata Hrahsel

A tawp bera ka sawi duh chu Pa Pathian hi thil dang zawng zawng aiin hmangaih phawt mai la. I na ngai lovang.









(A hnuaia fakna hi lo hmet ve rawh.)

Post a Comment

0 Comments