Hello From The Other Side!

- Omomi

Good morning.

Quarantine facility-a awm in ṭhiante kha 'A hrehawm em? Ka va'n khawngaih che, tuar hram hram rawh aw' tiin in fuiha in zawt a nih chuan tangkhang lo hawte'n ralven hna an thawh mek kha in support lo tihna a ni. Khawngaihna thu thlum leh fuihna ni awm tak kha ngaihtuah chiang teh u, hrehawm in lo tihpui viau niin a lang.

QF/QC-a kan awm hian hrehawm tuar turah min ngai lo u la tih hi ṭhahnem ngai takin ka chah che u aw, helai hmun hi engtin nge hrehawm kan tih phal ang le? State pawn khawlum huam huam leh nun man tona, kan mit zim avang ringawta natna hrik em maw min tihna hmun, thawhchhuah nei lova dam khawchhuahna awm lohna hmun aṭanga lo hawte min enkawl a, hnathawk lovin min chawm a, kan ei chak em em Phuihnam tlak hang leh Anṭam te, vai masala tel lo Arsa kàn tui tak tak nen min chawm a, vannei kan inti asin. Khawngaihna mit khan min thlir lo ula, lainatna ṭawngkam pawh kan mamawh lo, ralven hna kan thawk mek chung hian duat taka enkawl kan ni a, hrehawm tuar mek treat-in min treat suh u aw. 

Nangni leh keini hi  ralveng duty vek kan ni a, nangni pawnlamah in ding a, keini chhunglamah. A lo nuamsa viau lo a nih pawhin indona tualzawlah  pasalṭhate'n nun thapin ram an chhan ṭhin a, mahni nun phatin an rammu ṭhin a, tunah ramri-ah kan tlangvalte pawh an  rammu mek a nih saw. Keini pawh mita hmuh theih loh hmelma beia rammu-ah min ngai u la, "A hrehawm em, tuar hram hram rawh u" tia fuih kan mamawh rih lo, tin, a hrehawm lo. 

He venhim hna hi sawrkar sipai leh damdawi lam mithiamte chauh hlen tur a ni lo va,  hmatawnga  dingte bakah hian helai hmuna thuawih tak leh hrisel taka kan lo awm hian Mizoram kan vengin kan hmangaihte tan ral kan bei mek a ni tih min hriatsak lul rawh u aw, hrehawm kan ti reng reng lo a nia. 

Kan lo haw hma khan tumahin natna kengluttu nih kan duh lo, thuawih lo tlemte avangin kan hmel lo chhe mah se, keimahniah   mizoram  himna a innghat tih kan hria a, QF chhunga duty hi hrehawm kan va ti lo em! Nangni, hmatawnga duty te, mahni ina duty leh ramria duty te nen kan hmun a inang lo tih mai loh chu nangni aiin kan nuamsa tih hi min hriatsak u la, hrehawm kan ti lo ve. 

Kan ṭawngṭai a, Mzoram-a kan haw theih nan Pathian puihna kan dil a, A hnenah kan zinkawng kan hlan a, kan lo haw a, nangni'n min welcome a, sawrkarin a rem lo chung rem min ruatsakin fapa tlanbo kir leh ang maiin duat takin min dawngsawng a, zinkawnga harsatn tam tak paltlang hnu tih hriain awlsam zawk leh ṭha zawka enkawl kan nih theih nan  min khung hrang a ni mai a, a hrehawm miah lo, kan lawm em em zawk e. 

In dam nana helai hmuna chawmhlawm ni chunga kan duty hlen hi hrehawm kan ti lo. He hripui huangtau zet hian keini avangin mizoram a lo lut a, a pawi kan ti, mahse, QF chhunga kan awm hian in in chhunga hripui lo lut tur kan lo dang ve a, hrehawm kan ti reng reng lo a nia.  

Lo dam u la, lo him u la, kan awmna hmun ṭheuhah kan duty hlen ang u aw.