Aizawl | June 14, 2020: Health Minister Dr R Lalthangliana chuan nimin khan Aizawl-a Quarantine Centre hmun hrang hrang - Chanmari, Chaltlang Lily Veng, Bawngkawn, Electric Veng, Ramhlun Venglai, Mission Veng, Model Veng leh hmun danga mi te a tlawh.
Health Minister chuan Community Quarantine hrang hranga Local Task Force Duty-te hnenah harsatna an tawh leh tawh loh chungchang te zawtin an dinhmun a zawtfiah a. Tun dinhmunah Quarantine Centre-a duty-te hian harsatna lian tham a tawk rih lo tih Minister hi an hrilh a. Khawtlang ṭanrualna a ṭhat thu leh a tlangpuiin Quarantine Centre-a awmte pawh an felin thu an awih tih Minister hi an lo hrilh a ni.
Health Minister chuan, "Kohhran hote inpekna lawmawm ka ti tak zet a. Tin, YMA leh Quarantine Centre atana an hmunhma phal taka thawhtute zawng zawng chungah thinlung takin lawmthu ka sawi a. He hripui leng mek do nan hian kan theihna zawn ṭheuhah mitinin kan theih tawp kan chhuah ṭheuh hi a lawmawm tak zet a. Sorkar lam pawhin kan Chief Minister zahawm tak kaihhruaina hnuaiah theih tawp kan chhuah mek zel a ni," a ti.
Minister hian Quarantine Centre a tlawhte hnenah hian ṭanpuina sum fai enge maw zah a hlan bawk a ni.
Health Minister hi School Education secretary Esther Lalruatkimi, Higher & Technical Education director K Lalrinzuali IAS, Tourism Department director V Lalengmawia, AMC Commissioner Laldingliana leh mi pawimawh dangten an ṭawiawm a ni.
Post a Comment
He post chungchanga i ngaihdan lo sawi ve rawh: