TÛN KÂR CHHÛNGA MIZORAMA THIL THLENG LANGSÂR ZUALTE

Buatsaihtu: V Kungtea

Email: kungteavandiau0785@gmail.com

June 07, 2020: Falkâwn ZMC-ah Covid-19 sample 244 test a ni a, mi 8 positive hmuh belh an ni. Tin, a nizân lam (Inrinni) khân mi 10 hmuh belh an lo ni tawh bawk.

June 09, 2020: Rajya Sabha member tûr thlannaa chuh tum mi pathumte’n Returning Officer hnênah an hming an pe lût. Hming pe lûtte hi rorêl lai MNF official Candidate Pu K.Vânlalvêna, kum 50; Aizâwl Bâwngkâwn vêng te, Congress Candidate Dr. Lallianchhûnga, kum 44; Aizâwl Zonuam vêng leh Zoram Peoples Movement (ZPM) candidate Pu B. Lalchhanzova, kum 44; Aizâwl Dâwrpui vêng te an ni.

• Tlai lam dâr 5 hnu lama covid-19 case result chhuakah ZMC Falkâwnah Covid-19 hri kai 46 hmuh chhuah belh an ni.

*10.06.2020:* Hemi zâna ZMC laboratory-a sample en dik zîngah Covid-19 hri kai 9 hmuh belh an ni.

• Fungsihchhuah, Chhimtuipui ramria hri lêng vênga duty lai damlo nunna chân ta, Carolyn Lalvênmâwii, kum 18; Pu H. Kâpliana, Sangau-1 fanu chu a râl nân Chief Minister Relief Fund ațangin chêng nuai 1 pêk a ni dâwn tih sorkarin a puang. Carolyn-i hi a nimin lam khân a boral a; a tûk, hemi nî chawhnu lam khân vûi liam a ni.

*11.06.2020:* Green Mizoram Day; Covid - 19 hri lêng mêk avângin kum dang angin hman theih ni lo mah se, a theih ang angin hmun hrang hrangah Green Mizoram Day vawi 22-na pualin hun hman a ni.

• Hemi zâna ZMC Falkâwna covid - 19 sample 176 en dikah hri kai 2 hmuh belh an ni.

*12.06.2020:* Tûn kâr Thawhțanni ațanga neih țan, Lai Autonomous District Council (LADC) Emergency session chu zawh fel niin, kum 2020-2021 LADC Budget Cheng Nuai 18986.91 leh Suplementary Demand for Grant 2019-2020 chêng nuai 118.67 lungrual takin pass a ni.

• Hemi zân hian ZMC, Falkâwna sample en dikah mi 3-in Covid - 19 an kai belh tih hmuh chhuah a ni.

*13.06.2020:* Zoram Medical College laboratory-a swab sample 510 en dik zînga 5 chuan Covid-19 hri an kai tih hmuh chhuah a ni.

# Tûn dinhmunah Mizoramah Covid - 19 vei mi 111 an awm mêk.