COVID 19: Khunghran ni lo Hri vei awm tawh; Aizawl Hospital fimkhur

Aizawl | June 14, 2020: Aizawla pa pakhat,  kum 47 mi, khunghran zinga mi ni lo chu nimin khan COVID 19 Positive a ni tih finfiah a ni a, amah enkawltu leh buaipuitu ber a fanu erawh a Negative thung.

Hemi vang hian an lo inentir tawhna Aizawl Hospital lam pawh an fimkhur hle a, tlawhpawh theih lohin siam nghal a ni.  Nizan khan Aizawl Hospital & Research Centre a thawk mi 29 te chu Swab Sample lak sak niin Hospital-ah hian an inkhunghrang nghal a, in lama an chhungte zawng zawng pawh Quarantine nghal an ni.

He COVID 19 positive hmuhchhuah thar hi Mizorama Local Transmission hmasa ber nia hriat a ni a, Community Spread awm thei venna leh do lêt nan, Mission Veng Local Task Force on Covid-19 Committee chuan, Aizawl District Magistrate rem tihnain, veng chhungah thu leh awm hma chu Total Lockdown a puang nghal niin Mission Veng Local Task Force on Covid-19 Committee thuchhuah chuan a tarlang.

Covid-19 Positive chanchinthar hriat a nih veleh Mission Veng Local Task Force on COVID 19 Committee chuan rang takin meeting hmanhmawh ko nghalin, Medical Team-te nen ngun takin an ngaihtuah a. Community Spread  thleng thei dinhmun a nih avangin Aizawl District Magistrate be rawn chungin Mission Veng chhungah Total Lockdown an puang nghal.

Tin, Dam lote chênna Colony leh thenawmte In eng emaw zat Sealed nghal thuai a ni a. A rang thei ang berin dam lo leh a chhungte veivahna leh chet lakna zawng zawng Mission Veng Local Task Force on Covid-19 Committee chuan an  chhui nghal char char niin an thuchhuah chuan a tarlang.

Mission Veng Local Task Force on Covid-19 Committee hmalakna hian LTF member thenkhatte pawh fimkhur thilah in lama inkhung nghal tura tirh haw zui an ni bawk. Mission veng veng chhung leh veng pawn thlengin Contact tracing neih zar zar a ni a, veng pawna mite chu an chhungkua bakah an awmna veng LTF hrilh nghal zel an ni a. Veng chhung mi, veng pawna lo chhuak thenkhatte pawh koh haw nghal niin an in lamah inkhung nghal tura hriattir zung zung an ni.

Dam lo zinkawng:

Mission Veng Local Task Force on Covid-19 Committee thuchuahin a tarlan danin, Dam lo hi a chet velna leh a zinna zawng zawng zawh chhuah vek a ni a. State pawn atanga rawn hawte lam leh thlahin Bairabi leh Aizawl inkar te, Champhai leh Thingdawl lamah te vawi eng emaw zat a kal tawh a. June 8, 2020 (Thawhtanni) khan Aizawl Hospital Casualty-ah a khawsik avangin an inentir a. June 10, 2020 (Nilaini) chawhma lam khan Aizawl Hospital-ah bawk an inentir leh a, result-ah chuan zunkawng hnâi la nasa leh Sugar sang tak a lo ni a. Chawhnu lamah Hospital-a in admit turin an lut leh a. Rei pawh an awm hmain, fimkhur thilah, amah buaipuitu ber a fanu nen ZMC, Falkawn lamah phurh phei a ni zui ta a ni. Nimin June 13 zingah Result a lo chhuak a, amah hi Covid-19 Positive a ni a, a dam loh chhunga buaipuitu ber a fanu erawh a Negative hlauh thung a ni.

Dam lo hian, State pawna rawn haw an phurh danah an fimkhur thute, pindan thlap a nih dan leh Driver side kawngka atang chauha an luh-chhuah thin dan te sawiin, result chu mak a tih thu a sawi. Kawng engkima buaipuitu a fanu a Negative leh tlat si chu mak a tih thu a sawi bawk. Tunah hian Dam lo dinhmun hi a tha a, a khawsik a awm tawh rih lova, a Sugar pawh an control tha a, a normal rih a ni. Chaw pawh a ei that thu kan dawng bawk.

Nizan dar 11 dawn vel thleng khan Dam lo leh chhungte chetvelna an chhui zel a. Primary Contact (Direct Contact) a neih hriat theih chin apiang umzui zel an ni. Aizawl Hospital lam pawh an fimkhur hle a. Nizan khan Aizawl Hospital-a thawk mi 29 te chu Swab Sample lak sak niin Hospital-ah hian an inkhunghrang nghal a, in lama an chhungte zawng zawng pawh Quarantine nghal an ni. Mission Veng chhunga Primary Contact amah leh a chhungten an neih, tun dinhmuna kan hriat theih chin, mi 34 te chu  Swab Sample laksak an ni a, veng pawn lama awmte pawh an veng LTF te hmalaknain Swab Sample lak an ni bawk. Heng bakah hian Secondary Contact awm thei ang zawng zawngte pawh a list siam chhuah a ni a, chawl lova bawhzui zel tum a ni. Anni ho hi Swab Sample result chhuah hma chu an chhungkua pawn chhuak lo tura hriattir vek an ni bawk. Heng zingah hian result kan neih dan azirin a veng ang leh Aizawl ang pawhin hmabak thui tak la awm thei tura ngaih a ni.

Mission Veng Local Task Force on Covid-19 Committee chuan, Health Minister Dr R Lalthangliana leh a Team-te, Health & Family Welfare Board vice chairman Dr ZR Thiamsanga, MLA ten an tlawh a, an chungah an lawm thu an sawi.