Isuan min hmangaih ka hria!

- K Remruatfela
Columnist, EXPLORE MIZORAM

I nunah hrehawm tih ngawih ngawih châng te, dam pawh thlahlel hlei thei tawh lo khawpa beidawn rum rum chângte i nei ve tawh thin em? A châng chuan i hma lam hun i ngaihtuah ang a, i tan beiseina kâwl reng êng tawh lo tur anga inngaih chângte pawh vawi tam tak i neih ve thin ka ring. Nimahsela, ka hrilh a che,  Isuan a hmangaih che asin!


Nikum tâwp lama China rama Chinese pa hri kâi khân khawvel ram kilkhâwr, kan Zoram thlengin min lo rûn ve tan ta a. A ram pum anga kan tawrh lohna turin theihtawpin kan lo invêng a, kan fimkhur a. Nimahsela, Pathianin rem a ti a nih chuan he hri lak ata invèn zawh loh hun a la thleng lo ang tih pawh engmah sawi theih a ni ta lo! Chu erawh Pathian thu thu ah dah ila. Chutihlai erawh chuan kan chungah engpawh lo thleng se, lungngaia thlabâra, indawmkûn mai tur kan ni reng reng lo va. Mangan laia tanpui vartu hnai reng Pathian neitu kan nih tlat avangin vanduaina lo tâwk palh pawh ni ila, Amah kan rin tlat chuan, kan chungah engpawh lo thleng se, Van inah min hruai chho dâwn a ni. Isuan min hmangaih em em si a.

Kan chunga vanduaina a lo thlen châng te hian hriatthiam harsa kan ti thin a. Vanduai bik riaua inhriat rum rum chângte pawh a lo awm thin. Nimahsela, Pathian hian chhan nei lovin kan chungah harsatna a lo thlen tir ngai lova. Harsatna ruam ata thlamuanna duhawm tak kan chan theih nan fiahin kan lo awm thin zâwk a lo ni. Thihna hlim kawr ruam zawh mah ila, Pathianin min veng tlat dâwn a. Kan lei taksa te lo âwngrawp tial tial pawh ni mah se, Isuan min awmpui reng dawn a ni. Isuan min hmangaih ka hria, damchhungin min awmpui ang. Amah kan rin tlat chuan engtikahmah min kalsan ngai hek lo ang. 

Isuan min hmangaih si a,
Dam lo chak lo mah ila;
Hlauhawmah ka awm pawhin,
Min vengin min thlamuan thîn.

Post a Comment

He post chungchanga i ngaihdan lo sawi ve rawh:

Previous Post Next Post