Aizawl | June 16, 2020: Thawhțanni (June 15) zana India leh China sipaite kut lawnga inphek sualnaa Colonel pakhat leh sipai pahnih an thi. Kum 1975 hnu lama India leh China sipai te ramri chungchang vanga ralthuam hmang loa inphek sualnaa sipai thihna hmasa ber a ni. Commanding Officer pakhat leh sipai pahnih an thi. An inphek sualna hi Galwan lui kam Ladhak chhak lam a ni a, hei hi Thawhțanni zana thil thleng a ni.
“Galwan Valley a boruak sosang tidai tura inbiak mek laiin Thawhțanni zan khan inphek sualna hi a thleng a, leh lam leh lamin nunna chan an awm a ni. India lamah officer pakhat leh sipai pahnih an ni," tih Army thu chhuah chuan a sawi. Senior military official ten an sawi dan chuan boruak sosang tidai turin he report ziah lai hian an inbe mek a ni. Silai hmanga inkah anih loh thu an sawi bawk.
Defence Minister Rajnath Singh chuan Eastern Ladakh thil thleng leh a boruak awm dan hi Chief of the Defence Staff (CDS) leh sipai hotu lu pathum te leh External Affairs Minister S Jaishankar te nen an sawiho tawh a, thil awm dan kim chang Prime Minister hnenah an thlen tawh tih thu AIR chuan a sawi.
Hetih mek lai hian Major Generals chu buaina chhuahna hmun Galwan area-a Patrolling Point No 14 ah boruak tidai turin a awm mek tih Army thu chhuah chuan a sawi.
Chinese sipai lamah pawh thi hi an awm ngeia hriat a ni a, chanchin kim chang erawh hriat a ni lo. Chinese Foreign Ministry thu puangtu Zhao Lijian chuan Beijing a a sawi dan chuan China sipai thi zat hi hriat chian a ni lo. India hian ram ri vawi hnih an rawn kãn a, Chinese sipaite an bei a, "chu chu ram pahnih sipaite inkara inhelnuaina bul țanna chu a ni," a ti.
“Ram ria kan sipaite high-level meeting [June 6] an nei a, boruak tidai tura inremna pawimawh tak tak an neih mek laiin June 15 zan hian India sipaiten rem kan tih tlan ve ve tawh chu bawh chhiain, ram ri pelin vawi hnih an rawn kal a, thil duhawm loh tak takte an rawn ti a, chu chuan boruak a chhem alh ta a, Chinese sipaite rawn beiin sipai pahnihte inkara innuaina nasa tak hi a thleng zui ta a ni. China hian India hnenah thil thleng an duh lohna thu na takin an thlen, " tih thu a sawi.
India hnenah hetiang hian a ngen a, “ rem kan tih tlan tawhna zawm tur leh khauh taka sipai hmatawnga awmte ram ri kan lo tura ti tur leh buaina chawk chhuak lo tura thunun tur leh inhriatthiam lohna awm te chu inbiakna hmanga chin fel ni se,” tih Mr. Zhao chuan a sawi. " Ram ri leh a chhehvela harsatna awmte inbiakna hmanga chin fel rem kan ti ve ve a, boruak țang hmetmit tur leh ram ria inremna kawng zawn chu kan duh a ni", a ti bawk.
Sipaite inkara inhel nuaina hi Pangong Tso area ah May 5/6 zan khan a thleng a, hemi hnu hian Chinese sipaite hi tam tak helaiah hian an luh belh a, kha inbeihnaah khan hliam an awm ve ve a, India sipe 76 hliam an awm a, Unit Commanding Officer pawh a luah hliam niin Delhi lamah thlawhna a phurh a ni. May 9 khan Naku La hmun North Sikkim hmar lamah inbeihna hi a thleng leh bawk a ni.
May 14, Army Chief Gen Manoj Naravane thu chhuahin a sawi dan chuan heng thil thleng pahnihah hian a lehhlam ve ve ațangin "na taka inbeihna" a thleng a ni, heng hi an level-a chin fel nghal a nih thu a sawi.
Corps Commander level inbiak June 6 hma pawh khan sipaite hi a inchhawka in epna a thleng a, Patrolling Points 14, 15, 17A leh Gogra area ah te a ni.
Khawvel pumah China ațanga hripui chhuak avangin ram zawng zawngin harsatna namen lo tak an tawh mek lai a, India ram ria China sipai chetna hi COVID-19 ațanga Khawvel rilru lak pen tumna nge ni ang, India ramin harsatna a tawh den chhena run a tum leh ta zawk ni ang tih hi mi tam tak ngaih dan a ni ngei ang.
Source :
The Hindu
June 16, 2020
@ 17:35 IST
News on air
June 16, 2020
=====16===06==20=
- Huna Kawlni Kawlvawm
A bengvarthlak țhin e. Ram pahnih inkar buaina hi tunlaiah chuan tharuma chin fel chi a ni lo va... Ngaih dan erawh sawi dawt a har deuh ang.
ReplyDeletePost a Comment
He post chungchanga i ngaihdan lo sawi ve rawh: