Ngaihhaih vangin Nula pakhatin mi kut tuar; hliam a tuar

Aizawl | June 16, 2020: Nizan (15.6.2029) dar 7:30 vel khan Khawzawlah pa pakhat, Laldawngliana nia hriatin a nupui emaw tiin Tualpui khaw nula pakhat chu Chempuiin a sat a, he nula hian hliam na tak tuarin Champhai Hospital-ah enkawl mek a ni.

Mi kut tuara hliam tuar hi Tualpui khaw nula B Lalhlimmawii niin nimin tlai khan, Dulte-a a pute tlawh tuma a kal chu Khawzawlah zanriah eiin, Zuchhip veng-a Pu Engmawia Inah a innghat a. Zanriah an ei hnu, dar 7:30 velah Dulte lam pan turin In atang hian a chhuak a. Kawngpui an thlen hnuah theihnghilh a neih avangin a kir leh chu Khawzawl Dinthar venga cheng Laldawngliana (36) chuan lo tidingin, Chempui hriam lo lamin a hmaiah a sat ta nia thu dawn a ni. 

Lalhlimmawii hi a hliam tawrh vang hian a awmna hmunah hian a tlu a, nula hliam na tak tuar tlu kawng kalten an hmuh hnuah Khawzawl Damdawi In panpui nghal a ni a, Khawzawl Damdawi Inah hian a hmai hi thuisakin Champhai District Hospital-ah Refer a ni a, tunah hian Champhai District Hospital-ah hian enkawl mek a ni. Lalhlimmawii hian a chal, a hnar, a biang leh a khabe-ah te hliam a tuar a, a ha hnuailam pawh an bal nual a, a hmaia hliamte hi hmun engemawzatah thui a a ni.

 Laldawngliana hian Lalhlimmawii a sah hnu hian a tlanchhe nghal a, Khawzawl Police ten hemi chungchangah hian zan dar 8:00 velah Report an dawng a, Khawzawl S.P. Pu PC. Lalchunglura hovin misual zawn hna hi an thawk nghal a, rinhlelh thuah mi pahnih an lak hnuin nizan zanlai vel khan Laldawngliana hi an man ta a ni. Laldawngliana hian nimin chhun khan a nupui, Lalhlimmawii te innghahna Pu Engmawia fanu nen inti thiam lovin a nupui hian a chhuahsan a. A nupui hi a pate inah a kal ringin nizan khan alo chang a, Lalhlimmawii chu a nupui emaw tiin a sat ta mai nia sawi a ni.

 Laldawngliana hi Khawzawl Police Station-ah thubuai ziahluh nghal a ni a, tukin khan Champhai-ah Court turin hruai chhoh nghal a ni.

 He thil thlengah hian Tualpui khawtlang chuan an khaw nula, B.Lalhlimmwii hliam tawrh chungchangah lungawi loin, Vawiin khan Khawtlang hruaitu leh NGOs hrang hrang hruaitute chu Khawzawl panin an kal nghal a, 
An khaw nula nungchang tha tak maiin Khawzawl khuaah misual kut a tuar chu an hrethiam lo takzet tih thuchhuah siamin an sawi a, Pawikhawihtu in an khaw nula chunga kut a thlak chhan dik tak zawn chhuah an phut thu sawiin, pawikhawihtu hi na taka hremna pek an phut tih an sawi a, tun hnuah hetiang thil hi thleng tawh lo se an duh tih an sawi.

- Input from FB Post

Post a Comment

0 Comments