COVID 19: Positive te Mamit COVID 19 care centre-ah sawn

Aizawl | June 7, 2010: West Phaileng Quarantine centre a awm Covid-19 positive pasarih te chu vawiin tlai dar 3 vel khan Mamit Covid-19 care centre a dah turin hruai  an ni.

Hriat theih chinah COVID 19 positive hi  a hmaa pakhat lo awm tawh nen Mamit district-ah mi pariat  an awm mek.

Tunhnai a Mizoram pawn atanga lo haw, Mamit district mi leh sa te chu Mamit district chhung khaw hran hran Quarantine centre ah te dah an ni a, W Phaileng quarantine centre a awm mek Delhi atanga lo haw mi 7 (mipa 5 leh hmeichhia 2)te chu Covid-19 an vei leh vei loh enfiah (throat swab test) an nih hnuah Covid-19 an vei tih hmuhchhuah an ni a, vawiin tlai dar 3 vel khan Mamit Covid 19 Care centre a enkawl tur a hruai an ni.

Health department lam atanga thudawn danin tun a Mamit district mi leh sa Covid-19 kai thar (positive) teah hian natna lanchhuahna (symptoms) hmuh an la ni lo va, hemi avang hian Mamit khawpui chhunga Covid-19 Care centre ah dah an ni anga, natna lanchhuah dan a zirin Mamit a isolation ward ah emaw ZMC ah emaw dah an ni ang.

Mamit district chhunga Covid-19 vei (positive) te enkawlna tur hmun Covid-19  care centre hi Mamit Middle school 2 a SSA Girl Hostel chu hman a ni a, Covid-19 care centre ah hian khum 25 awm theihna a ni a, Doctor 1, nurse 1, health worker 1 leh police 2 te chu darkar 24 chhung an duty a ni.

Tun dinhmunah Mamit district mi leh sa Covid-19 vei hmuhchhuah mi 8 an awm mek a, khunghran mi 377 an awm mek bawk.

- AIR News Aizawl

Post a Comment

0 Comments