TUNGE INTHLEI THEI LE...!

- Ramchhana Hmar 

Phuaibuang

Mithiam, mifing, hretam ni lo mah ila, a hre zawkte leh a luhchilh zawkte, tha leh zung senga rilru zawng zawng seng thin ram hruaitu khawtlang hruaina hna thawk thin politician te hian engtikah nge fak an hlawh ang? Eng hunah nge kan fak ang? 

Chawimawi leh fak hun hi vote an zawn lai hi hun tha ber a ni angem tihte chu mahni tawka kan sawi ve ngam tawk a ni a. Mi tha tak pawhin politic a luhchilh chuan a that lohna lai leh a tlin lohna lai sawitu side ‘b’ lam an awm thin avangin politic an luhchilh hmaa mi tha tak pawh kan ram angah chuan politic an luhchilh meuh chuan kan vote tlinna kut zungtang ngei a, an that lohna leh a tlin lohna avanga kawk tu kan ni leh lawi a, kan thlang tlinga kan chungah kan dah te te a, kan demna thu kan auchhuah pui leh mai thin te hi politician thiam loh nge mipui thiam loh ni ang, a tu hi nge han indem thei awm chuang ang le!

Khawtlang a ni emaw, ram pawh nise hruaitu kan mamawh a, keini inthlang ramah chuan mipui te’n kan duh a kan thlan tlinte hian min hruaia kan khawtlang leh ram leh hnam thatna turin hna an thawk thin a ni a, mi tha lo an awm a nih chuan mipui te kan inenfiah a, hnathawh kawr min hak tir ula, titute lo thlan tlin ngawt hi kan tih loh tawp tur a ni. Tuna kan ram dinhmun hruaitu lu leh mahni khaw bil te te a hruaitu kan neihte zingah pawh hian mipui hnena hnathawh kawr dila, hna thawk tha leh peih lo hi engzat tak awm ang maw? Hnathawh kawr kan pe a, hnathawh pui lovin nilum min aisan leh ta daih emaw tih tur khawpin thawk mang si lo, an hnathawh kawr hak avanga inchhuang ta hruaitu kan ngah ta lutuk deuh lo maw?

An thawhthat avanga inchhuang tur niawm tak si kha, hnathawh kawr an hak avanga inchhuang ta hi sawitur an va tam si em! Ram leh hnam, khawtlang tanna hnathawk ngam, hnathawh kawr ha ngam hi engzat tak awm ang maw?

Nitin kan eikhawpa dil thin te hian dam chhung eikhawp intuak ngah phawta hnathawh kan tum ta mai em ni? Ram leh hnam tana ding ngam mai a tawk lo, ram leh hnam tana tluk pawh ngam hruaitu hi engtikah nge kan neih ang? Mipui lam pawh hian tih dik loh kan va ngah thin em, inthlang ramah chuan mipuite hi kan pawimawh a, kan pawimawh rualin kan tana mi tha thlan chhuah hi har kan ti ber lawi a! Kan party leh kan hmelhriatte hnung kan zuina kawngah hian mi tha zawkte hi kan dah bo fo tawh lo maw? Kan ram leh khawtlang tanna tha lo tur thil lo thlengah kan aiawh te hi kan tana ding an nih thin avangin, mipuite duh khawp lova kan aiawh te an awm chang pawh alo la thleng fo maithei, dikna leh rinawmna nunpui ngam hruaitu siam theitu mipui te hi kan va pawimawh em, kan beisei ang an phak loh hnua indawmkun hian ram a siamtha thei lo tih hi kan thinlungah bet se, kan zungzam ang maiin min zem khat rawhse. 

Politician-te hi ram hruaitu an ni a, ram leh hnam tana lo pen chhuak thin an ni. Chutih rual chuan kan beisei an pha lo ta fo mai, heti zawng hian han ngaihtuah ta ila, Politician atanga ram hruaitu tha thlan chhuan tum ai chuan, ram leh hnam hmangaih a, kan tana tha tur ngaihtuah peih mi atangte hian politician tha te hi thlang chhuak hlauh zawk thin ila a fuh dawn tehreng nen, tuna kan kal danah hi chuan politician atanga ram hruaitu tha zawng kan nih thin avangin hian lalna te an chang te te a, a tir atanga ram hmangaih lo ta na na na chu min thlenpui thei ram hi a ropui lo thin a nih hi maw. Heng zawng zawngah hian mipui leh ram hruaitu, khawtlang hruaitute tunge indem thei chuang bik ang le, nang leh kei hian dikna hi a thu ringawt ni lovin a takin nunpui ila, kan buaina hi a fel mai dawn a lawm. Kan ram Politic boruak chu kan hre hlawm fur awm e, a tha lai awm bawk mah se, a tha lo a awm avangin kan duh khawp thin lo, politic-te chu a duhin khel rawhse, ram leh khawtlang tan chuan kan party-te hi hmatheh lovin kan hnunga dah thiam a tul chang ava tam em!

Politician te tan chuan mipui vote a hlu ber a, kan hlutna hi kan hrethiam thin lo lai tak hi mipui te kan thanharh ava hun tawh ve, kan hmaa inthlan liamtham hmabak a awm lem lo; mahse, tun atanga kan rilru sukthlek hi kan thlak a hun dawn lawm ni? Tunah chuan mipui pawhin zirtur kan nei a, kan aiawha kan thlantlinte pawhin zirtur an nei, hnathawh kawr chiah min dil lova, kan chan tur awm ang angte min hlui theitu, kan tana ding ngam hnathawh kawr ha hruaitu tha dik leh huaisen kan mamawh em em laiin kan mamawh zawk kan la man fuh miau loh avangin tun dinhmunah chuan a tute hi nge inthlei thei bik chuang ang le.