Hnam ropuite u, tho r'u le IX

- Lalhruaitluanga Chawngte

Khatia Khawvel Indopui Pahnihnaa khawvel sorkar chak, chungnung leh chungchuang ber berte an han indo kha, khawvel indopui tih takah khawvel kha a nghawng a, khawvel kha a nghawr dur dur a ni ber mai a.

Chu Khawvel Indopui Pahnihnaah chuan keini pawh a thlirtu ni lovin a tel veah kan țang a nih kha.

Ni chhuahna ram Japan sipaite'n sapho awp Myanmar an rawn hrut a, chhak Zoram Chin Hills hmun țhenkhat phei chu an ta chei hman; Tiddim khaw bula sap sipai hmun pawimawh Fort White te pawh Japan sipai camp a ni hman.

Pic: #John_Chhana

Kumpinu sipaite'n Fort White an laklet leh nan khan thisen a luang nasa a, British sipai 300 chuang leh Japan sipai 500 chuangin nunna an chan a ni awm e.

Chu inkahnaah chuan kan tlangvalte pawh an tel a, hnai set sawt ațanga LMG-a Japan sipaite phuhtute kha kan tlangval huaisen Lushai Scouts te an ni.

Inkahna rapthlak leh hahthlak a zawha British sipaite'n an laklet hnu chuan Lushai Scouts tlangval palite'n Havildar Darhlira hovin chu Fort White chu an han tlawh alawm: thil hmuh hrehawm lo reng reng hmuh tur a awm lo tih tur khawp a ni! Mitthi ruang te, thih sual mek te, rilru la harh, che thei si lo te, mihring hliampui tuar, na tuar, a rapthlak turzia leh hrehawm turzia hi!

Chutiang thil rapthlak karah chuan Japan sipai pakhat, hliampui tuar, chau em em mai, engmah ti thei tawh lo hi a lo awm a, a tui a hal em em mai.

An tuithawl an hawng a, chu tlangval tuihal mangang chu tui an intir a nih chu!

A hma lawk khan chu tlangval chuan an lam hawiin silai a hmet puak dur dur awm si a!

Hmelmate tiduhdah lova mahni tuithawla tui pawh pe duh zawkte khan, kan hnamin harsatna a tawh lai, ramin hmelma Covid-19 a beih lai te hian an vanglai hun lo hmang ta se, mahni leh mahni kan inbei ang tih hi an hlau hian ka ring țhin.