HMEICHHIATE HNENA THURAWN

- Lars Lalduhawma Malsawm

Zu hi sual a ni em ka hre lo a. Zu in hi sual a ni em tih pawh ka hre chuang lo. Hei hi chu mahni chhia leh ṭha hriatna hmanga teh tur chi niin ka hre deuh.

Chutihrual chuan, pasal atan zu in mi in duh loh chuan, zu in mi ngaizawng suh u. In lo ngaizawng ta a nih paw'n, in inngaihzawn laiin pasal atan zu in mi in duh lohzia lantir rawh u. "Ka hmangaih alawm," tih angreng hi chhunlamah hmang duh reng reng suh u. Mipa hi kan mawl ru angreng a, hmangaihna vanga dawhthei in ni tih te hi kan hre thiam lo fo. "Eng ang paw'n han awm mah ila, min ṭhen phal chuang lo," tih rilru te hi a nia kan put mai mai ṭhin ni. Hmangaihna vang hian hlim theih a ni tih hria u la, hmangaihna avanga hrehawm kher hi thlang suh u.

.

"Aw, tlangval lai a nia, nuam kan chen ve a ni mai alawm. Kan innei ang a, fa te kan han nei ang a, kan in reng bik náng," kan tih te hian, awih duh reng reng suh u. Kan ti ve mai mai a ni, nghei kan tum tak tak lo, 99% vel hi chuan.

.

Ih maw, nu leh pa thlazar hnuaia kan awm lai maha kan ruih ngam chuan maw, 'chhungkaw pa' ni-a venthawn tur nei lova kan awm hun, nupui te nena kan indan hunah hian kan nghei ring reng reng suh u. Min han hauin emaw, min han ngaithei lo emaw viau mah u la, "Kan inngaihzawn lai aṭangin zu ka in tih te chu i hre vek alawm!" kan ti hleuh mai ang. Mipa hi maw, thuhnuairawlh àwm taka awm chunga mahni ṭanghma hai thiam deuh mai kan nia.

.

Nu leh pa te thuhnuaia kan awm lai maha kan ruih ngam chuan, eng vangin nge in bulah kan ruih ngam lo tehlul ang ni! Kan hriselnain a tlin loh vang emaw, kan piangthar emaw, chhungkaw pa ber ruih fo mai hi a ṭha lo tih ngaihtuahna kan nei emaw te a nih ngawt loh chuan, kan in zel dawn. Chu thu-ah chuan chiang rawh u.

.

A zawng a za chuan a dik kher lo mai thei; mahse, inngaihzawn lai pawha kan hauh chiam chiam che u a, kan vin khur khur fo che u chuan, kan inneih hunah chuan kut kan thlâk hial mai thei che u. Inngaihzawn lai pawha kut kan thlâk ṭhin che u a nih phei chuan, min neih luih chuan 'punching bag' atan i inpe tel angah inngai hmiah rawh u. In sahim hun tur chu kan pianthar hun a ni deuh tawp. Hmangaihna vanga thlamuan theih a nih lai hian, hmangaihna avanga ralṭi taka nun hi thlang kher suh.

.

A awmzia ber chu, ka thu sawi lai mu chu – nupui pasal neih kawnga pawimawh em em chu, in thinlungin in chhia leh ṭha hriatna thunun suh se tih mai te hi a ni e.

.

Tin, heti hi a ni a, kei pawh hi zu in mi ka ni.

.

.

[Ngawlvei titi]

08052020