ṬUL LOVAH KAN CHIAI EM!?

Columnist, EXPLORE MIZORAM

Ram pawn aṭanga lo haw tur te zing aṭang hian Mizoram luh dawna check post hmasa berah RAT an hman leh hman loh zawhna hi ka dawng ta zeuh zeuh a. Chutiang chiahin Check Post a rinhlelh khalhfal deuh an neih thu te, rinhlelh avanga ZMC lama an thawn thawm te, hetiang lam hawi suspected case thu thar hi kan dawng ta zeuh zeuh fo bawk a. Heng huna ka rilrua zawhna lo awm chu engah nge ṭul lova kan chiai chiam ṭhin le tih hi a ni!?


He hri hi a rem lo a nih ngat chuan suspected case thu thar hi chu a la pung tulh tulhin a rinawm a. Ṭul lova kan chiai chiam zel lohna tura thil pawimawh ka tih ṭhenkhat hi hretu an tamna tura ziah chhuah ve a ṭulin ka hria.. Nunau an thlabar hah thlawn fo lohna turin..

1. Suspected Case hi: Natna hrileng tarmit aṭang chuan miin covid-19 symptoms a nei a ni emaw, a hluarna hmun aṭanga rawn haw a ni emaw, a kai an hmuhchhuah tawh te nen close contact an lo nei a ni emaw a nih chuan amah kha rinhlelh kai chu a ni sa tawh a. Covid-19 symptoms tam zawk lah hritlang na deuh nen in anna a ngah em avangin ni miah lo pawh khan a hritlan vangin rinhlelh a kai thei a, chutiang chiahin kai miah lo pawhin a rawn hawna hmun a zirin rinhlelh a kai thei a, a kai tawh te hnai takah a titipui emaw khawih emaw a nih chuan rinhlelh kai a ni sa.. Mahse Mizoram data enin rinhlelh kai za ah za deuh thaw hi rinhlelh ṭhelh an ni a tih theih! Rinhlelh kai a ruat theih mi heti zah kan nei tawh chungin pastor chiah kha ram chhunga kan detect la ni miau hek.. Chuvangin rinhlelh kai (suspected case) hi chiaipui viau na tur a awm lem lo.

2. RAT Reactive: Rinhlelh kai a ruat te hi khawi hmuna pawh ni se a tlangpuiin Rapid Antibody Test neihpui an ni tlangpui a, hei hi Test tak takin hun a duh dawn vang leh hautak vanga aite chhinna ang deuh chauh a ni a. Covid-19 ah phei hi chuan RAT hi a rintlak loh viau a nih hmel a. China siam phei kha chu a result 95% a dik lo an ti hial a nih kha. Mizoram hian khawi ram siam nge kan hman ka hre chiah lo naa reactive awm nual tawh zingah confirmatory test ah an lo kai lo tih finfiah zel a la ni hlawm chu a nih hi vawiin thlengin.. Chuvangin RAT reactive thu rawn leng pawh ni se, chiaipui chiam tham a ni lem lo.

3. Chiaipui tur dik: Chiaipui a, fimkhurpui phah tur dik tak chu 'nun ngaia kir leh tumna' zawk hi niin a lang. Economy a tlakchhiat chuan ṭampui hmabak mai thei kan nihzia hriain Covid-19 a len nasatna hmun apianga Lockdown tikhirhin, a len lohna leh a nasat lohna hmun te an case dan a zir zela thlah dul a ni thung a. Hei hi tam takin Covid-19 in India ram a luh hma lam nuna kir leh tur tihna emaw kan ti fo mai. Hei zawk hi a ni chiaipui tham zawk chu!

Tunah chuan nun ngaia kir lehna ni lovin nun thara bul ṭan tharna zawk a ni he Lockdown thlah dulna hian min kawhhmuh a tum.

  • Kan hmelhriat leh hriat chian an nih vanga mi hi Covid laka fihlima ngaihna thinlung kan neih tlat hi sawhkeh a ngai a. Tumah thinhrik si lova fimkhur kan zir a ngai a.
  • Mask vuah hahthlak ti ṭhin te pawhin mask hah lova hman dan kan dapchhuah a ngai a.
  • Kut sil thatchhe deuh pawhin kan himna tura kan sil reng a ngai ta a.
  • A huho nun ngah em em hnam kan ni chungin maltlat nun kan zir a ngai ta a.
  • Inlen pawh tel tela inrim ṭhin te kha chhungkaw bila hun kan hman a ngai ta.

Heng zawng zawng hi kan hlamchhiah vangin point number 1 leh 2 lam hawi thu thar a awmin kan chiai chiam ṭhin a, ṭul lovah kan hah phah ṭhin.. Kan thlabar leh chiaina chhan hi Media lam te kan puh taknain point number 3 ah kan lo hlawhchham vang a ni zel! Chuvangin point number 3 khi chiang ila, bel ila, vawng ila, a takin hlen ila, kan zirtirna dawn te kan lo zawm mai khan, miin lo zawm ve lovin min lo deusawh lek lek pawh ni se, kan dinhmun a him zawk fe a, hlauhthawn tur kan nei ve lo tihna a lo ni mai dawn a ni. Tichuan, keini chu ṭul lovah kan chiain kan thlabar fo lo ang a, ṭawng thu chhe lovah detected case hial pawh lo awm se nunphung buai miah lo, chiai lo leh thlabar miah lovin fim kâkin nun kan hmang thei dawn a lo ni..

Chuvangin, hawh teh u, keini chu nun ngaia kir tum lovin nun tharah bul ṭan thar i tum zawk ang u..

Post a Comment

0 Comments