Aizawl | May 29, 2020: Limca Book Of Records chuan Central University zingah Department Of Social Work, Mizoram University chu "Centre for Disability Studies" changtlung leh rintlak nei hmasa ber record thar neitu a nih thu a puang.
Department of Empowerment of Person with Disabilities chuan Ministry of Social Justice and Empowerment, Government of India hnuaiah a hmasa ber ni turin Centre for Disabilities Studies chu Mizoram University ah July 5,2018 khan a din a.
He centre ah hian course hrang hrang bakah postgraduate diploma course, pianphunga rualbanlo-te kaihhnawih zirtur a awm a, research projects te pawh kalpui thin a ni.
He centre din a nih theih nan hian National Institute of Locomotor Disabilities, Kolkata bakah Mizoram University atangin Dr. Henry Zodinliana Pachuau, Department of Social Work te chu a sulsutu ber an ni.
India rama Central University te zinga hetiang centre hmasa ber a nih na angin Limca Book of Records ah he hlawhtlinna hi ziah luh a ni bawk.
Hemi chungchang hi Mizoram CM Zoramthanga chuan instagram lamah heti hian a post, "Mizoram Peace Accord-in a hrinchhuah, Mizoram University chuan hmasawnna bung thar tam tak a kai chho mawlh mawlh a. Tunah chuan state pawna zirlaite pawhin an belh rawn a ni ve ta!" a ti a.
Sawi chhunzawmin, "Limca Book Of Records chuan Central University zingah Department Of Social Work, Mizoram University chu "Centre for Disability Studies" changtlung leh rintlak nei hmasa ber record thar neitu a nih thu a puang leh ta. He dinhmuna ding thei tura hmalatu leh a meizanghlaptu Dr. Henry Zodinliana Pachuau, Assistant Professor pawh thinlung takin ka lawmpui a ni." a ti bawk.
Post a Comment
He post chungchanga i ngaihdan lo sawi ve rawh: