MIZORAM DOCTORS vrs MIZORAM MINISTRY

- Dr C Lalrampana
    
     Covid-19 avanga inkhãrkhip thawh 4-na chu May 31, 2020 (Sunday) hian a tawp dawn ta. 
     "Ei leh bãr dinhmun ngaihtuahin inkhãrkhip chhunzawm tawh loh ni se tih leh phai ram lama kan unau tangkhangte an lo haw kim hma hi chuan inkhãrkhip chhunzawm zel rih ni se, fimkhur zual hun lai tak a ni e" tih chu inhnialna lian tak (the great controversy) a tling ta.


      Indian Medical Association (IMA) Mizoram Branch & Mizoram Government Doctors' Association (MGDA)-te'n  May 27, 2020-a hemi chungchang an sawihonaa an tãr lan danin inkhãrkhip chhunzawm zel rih an duh tih a chiang a, hei hi hripui laka Zoram mipui kan him tlãnna tur ngaihtuahna vãng liau liau a ni. Chutih rualin Mizoram Doctor-te chuan tuna kan inkhãrlhip mēk dan chu tha tawk lovin kan inthlahdah lutuka hriatna an nei a ni tih an tarlang tel nghe nghe.
      Hetih lai hian Mizoram ministry chuan Doctor-ho ngaihdan tawmpuia lang siin hripui kaidãrhtu nih tum ni ãwn takin ramri vengtute tlawhin an zin kual chur chur a, social media-ah an lang chuai chuai reng a; hei hian inkhãrkhipna dãn keng kawhtu leh mipuite dãn zawm tha tura  zirtirtu ni chung si a kan mithiam doctor rualte ngaihdan ataka an pawmpui lem  lohzia a tilang chiang hle niin a lang  
   Hetiang a nih avang hian   Zoram mipuite'n dãn kan zawm that duh loh phah lehzual a ni tih  a lang chiang hle bawk.
      _*chutiang i nih ahnuin, nang, mi dangte zirtirtu, nangmah i inzirtir lo maw? Nang, mi ruk ru lo tura hrilhtu, nangin i ru thin maw?*_ (Rom 2:21)
      He Bible chang ang chiah hi kan hotute awmdãn hi ni ta berin a lang. Mipuite chuan dãn zawm that ngaihna rēng a awm dawn em ni? Dãn zãwm tura zirtirtu mahin a bawhchhiat zel si chuan mipuite phei chuan engtin nge kan zawm that tehlul ang? Chakãi nufa kal inzirtir pawh kan ang ta deuh roh lo maw???
      Tlawh leh kan buai sek ngai lo turin *Ramri* hi a vengtu tur dik tak kan police fel tak takte leh Border Security Force & Assam Rifles-te hian hneh takin vēng mai se, anmahni hotuten  an duty-na hmun theuhah an tlawh ve thei tho a, hetia vah chhuah suau suau hi a ngai lovang a, civil miin ramri vēn a ngai bawk hek lovang. 
   Khawvel ram 213-ah Covid-19 a darh  tawh a, mi maktaduai 60 dãwnin hripui an kãi mek a, thihpui tawh mi nuai thum chuang an awm tawh bawk. Hengho thi tawh leh hripui kãi mekte hi mahni ramriia va kala kãi emaw, an thenawm ram atanga lūtrua ramria midang kãi darh ta ãwm rēng  rēng kei chuan ka la hre ve hauh lo mai, ka hriatna a zãu tawk lo pawh a ni mai thei. Chutianga kãi tawk chu an lo awm tawh pawh chu a ni mahna!
       Inkhãrkhip chhung a rei tawh a, mipuite ei leh bãr dinhmun a derthawng lehzual tawh hle; chung mi harsa tak takte chhawmdãwlna tur CM Relief Fund leh thawhlawm dang tlingkhawmsate chu ramri vengtute pek then ve zel a ngai a, State pawna kan unau tangkhangte tanpui an ngai bawk nen, ramri vêng miah lo turten tul lova intihaha tha leh zung leh sum leh pai senga ãtthlak taka mahni buaina leh harsatna kan insiam chawp mek hi hnutiang chhawna hawisanin kan economy siam thaa sawh nghet tur hian tan la thar zawk ila; hripui laka himna tura inkaihruaina uluk tak leh fimkhur taka zãwm chung siin kan harsatna hi sukiang tlang zawk ila kan hlawk zawk ngei ang.
    A nih loh vēk leh kum 50 liam hnu pawha kan ramri dik tak pawh kan hriat chian  theih loh Bairabi Zophaia mi kan police -te vên khu kan ring tãwk lo a nih rrau rau chuan covid-19 vang ni kher lovin Assam-in kan ram  min lãk hēksak loh nan  civil mi ngeiin vēng char char tawh ila a van tha mai awm ve? Jan-Feb, 2018 chho vel kha chuan Bairabi Zophai ramri vel khu chu kan vēng hreh deuh chu a nih kha mawle!
       *Thenkhatin covid-19 veng tur chuan police leh BSF an tlãk loh, an tham lungãwi a, an bum thei, a tha lo* -te an ti. Tupawh  thamna sum azirin an tham thei a, an bum thei bawk. Chhuanlam satliah mai niin a lang. Police leh sipaite hi Sorkarin uluk taka tehna chitin renga a teh tlin hnua a lãkte an ni a, hlawh tha tak pein a ruai a; sorkarin emaw, NGO-in emaw sum pek belh an ngai tawh lo.
      Sipai rinawm, ralthuam tha tinrenga vênhim tlat UK Prime Minister Boris Johnson meuh pawh khan hripui a vei zawh chiah kha!  Chutiang zelin Covid-19 case pakhat kan neih ve pawh kha ramri atanga rawn lut rū a ni lo. Passport & visa felfai tak nei a ni e.
       Chuvangin, kan sum leh pai nghawng thei tul lova inhambuai mekna ramri vēn leh a kan kualtute inzui dul dul thin sēnso hautak tak  hi chhawk zãngkhai turin  state police 6,200 vel lai awm mēk leh BSF 2.3 lakh, AR sing 6 chuang awm mekte hi central-ah dil belhin vēnkhãn zawng zawng hi hneh takin ventir mai ni se mipuite chuan ei bar leh hripui laka himna turin dãn mumal tak *new normal*-a awmin inkhãrkhip chhunzawm zēl ila, dãn bãwhchhia erawh dim loh ni bawk se.
      Sorkar hian LLTF leh VLTF-te hi AR, BSF leh Police-ah min recruit vek law law dawn a nih loh chuan an tihtur chin fel takin siam se, SOP leh Social distancing zawm tha lote leh inkaihhruaina dãn zãwm tha duh lo action lak lam chi hi chu police leh force lamin khawih tawh se,  LLTF & VLTF erawh chuan vegitable supply chain, thil manto vēn leh rethei chhumchhia, chhuanchhamte dãwm kãn lam khawih se LLTF/VLTF-te lungawilohna chihrang hrang awm thei ang chite hi a bo duak ang. Phai ram lamah pawh dãn leh dūn ken kawh lam hi chu Police leh force lam chan a ni.

      Kan Doctor rualte hian mipui ei bãr dinhmun an ngaihtuah ve tho va, chutih rualin inkhãrkhip dãn leh dūn leh inkaihhruaina kan zãwm tha tawk lo hi chuan an rilru a kap hle tih a hriat theih. Heng zawng zawng hi Police leh Force lam duty aia LLTF/VLTF rinpui bera Sorkarin a nei ta zawk hial nia a lan vang a ni ber a, mipuiin uniform uk emaw a rãng ha ve lote an hlauh ve tak tak loh avangin thunun an har hle a ni. chuvangin, kan Sorkar hian khauh deuhin disaster Act a puan hi kengkawh ngam se, econony tihmasawn thei tho siin, zalen tak si, dãn awmze neia kalpui siin inkhãrkhip hi kalpui zel ila, ei bãrah intodelh tho siin hripui lakah  him dam taka awm tho siin he hripui hi kan do hlawhtling thei dawn a ni. 
     Tuna kan Sorkar kal mek dan hi chu uluk taka thlirin tlangval pakhatin a bialnu hnenah- *Lengdang chhãi chung zelin i tãn rinawm takin ka awm zel e*  a tih khum ang deuhin Doctor-hote rawtna leh ngaihdãn pawm chung siin anmahni ngeiin dãn an zãwm leh tak tak si lo em? tih leh  dãn an lek kawh tak tak leh lēm chuang thin si lo ni berin a ngaih theih.

Post a Comment

0 Comments