HREHAWM MI TUARPUI RAWH

(TKP Ramthim Ni pualin)

- Remmuana Chawngthu

Vawiin hi BCM Ni pawimawh "TKP Ramthim Ni" a ni a. Kum dangah chuan hemi hunah hian ṬKP ten programme siamin, inkhawm/fellowship e.t.c hun hman ṭhin a ni a. Kuminah erawh khatianga hun hman kha a theih ta lo a, a chhan chu kan hriat vek kha. Thiam dan tawkin kumina kan thupui hmang hian thuchah han puanchhuah ve leh ka'n tum ang e.

II Timothea 2:3

_"Krista Isua sipai tha tak angin hrehawm mi tuarpui rawh"._

Jentail te ti-eng tura Lalpa sipai ṭha, harsatna tam tak kara taima taka rawngbawlna hna thawktu Tirhkoh Paula chuan Timothea chu Krista sipai ṭha tak anga hrehawm tuarpui turin a sawm a ni.

*Sipai ṭha chu.*

Sipai ṭha reng reng chuan amah chhawrtute mittlung takin hna an thawk ṭhin a. An taima a, an insum a, a hunah an huaisen a, nundan ṭha engkim an lantir ṭhin ti ila kan sawi sual tam awm lo ve.

Indo lai a nih phei chuan zawmthaw tak leh zelthel takin, inthlahdahna pakhat mah awm loin, sipai ṭha chuan hun an hmang char char zel a ni.

Ringtu nunkawng tam tak thlir ila, hrehawm tuar peih lo leh harsatna paltlang peih lo chu hmantlakah an chhuak ngai lo a ni.

Thlemna leh fiahna kaltlang ngai lote Lalpan a hmang ngai lo a ni. Sam ziaktu chuan (Sam 66:12)

_"Mihringte, tawlailir chunga chuangin, kan lu chungah i kaltir a; Mei leh tui kan kal tlâng a; Nimahsela, hmun chenghnawng taka lût tûrin min hruai chhuak a."_ a lo ti a ni.

 Amah zuitute chak zawk leh hriam zawka an ṭhan zel theih nan Mei leh Tui a kaltlangtir ṭhin a. Mahse, hmun chenghnawng taka lut turin a hruai chhuak leh ṭhin a ni.

Thlarau lam thil mai ni lo, tisa lam thilah pawh a lo ni. Hrehawmna tuar peih hlawl lo mihring chu an hlawhtling thei lo tlangpui a, chhawrtlak takah an chhuak mawh hle a ni.

Khawvel thila mi-hlawhtling kan hmuh tam takte hringnun hi kan zirchian peih ngat chuan, hlawhtlinna tlanga chuang chhuak turin harsatna leh hrehawmna tam tak an lo paltlang ṭhin a ni.

Thil hrehawm a nih chuan, a nuam fahran dawn lo tihna a ni. Rawngbawlna kawngah a kawng nuam lai ringawt zawh tumtute an hlawhchham fo. Mi tam tak chu hun hrehawm laia bibo hmak, a nuam leh langsar lai china rawn inpho chhuak thiam leh viau lawi si; rawngbawltu intite zingah sawi tur tam tak an awm nual mai. Chutianga Pathian ropuina enga lo mawi ve ringawt tumtute chu an mualpho fo zel a ni.

Chem hriam tak chherchhuak turin, chem chu mei sa taka rawh hnuah tuiah chiah leh a ngai a, mei leh tui kaltlang hnuah chem hriam tak a lo chhuak ang hian; ringtu nunkawngah pawh hian nun puitling leh chhawrtlak, sipai ṭha tak ni thei tur chuan harsatna leh hrehawmna tam tak tuar fe a ṭul ṭhin a. Chumi hnuah ringtu hmantlak kan lo ni dawn chauh a lo ni.

Hun hrehawm paldai a, a sipai ṭha tak ni thei turin Lalpan min buatsaih ṭheuh rawh se. Amen.