THEORY OF SURPLUS VALUE

- Zohmingthanga Pachuau

Columnist, Explore Mizoram

Karl Marx-a theory pawimawh tak mai pakhat chu- "Theory of surplus value" hi a ni. He theory hi a tawi zawngin 'Hlêp' (Profit) tihna mai a ni. Heti hian han sawi fiah dawn teh ang. Capitalist-hovin proletariat-ho an chhawr/ hlèpna ti i la a fiah mai àwm e. Worker-hovin rim taka an hnathawh rah/ thar chhuahte, man man zawka capitalist-hovin an lo hralhsak thin avangin a hunlai hian Karl Marx-a hian a sawisel nasa êm êm a ni. Hnathawktu chuan a hlawkna zawng zawng pawh a tèl tur a nih laiin, hèng mi hausa-ho hian rim taka, beka thlan tui luanga hnathawkho thawhrah hi an lo 'Fanghma no eisak' ta thin a ni. He theory lo chhuahna tak hi chu "Labour theory of value" atangin a ni. Bourgeoisie-hovin hêng- land, capital leh factory etc., zawng zawng hi an thunun a, rim taka thawktu, proletariat-te erawh chuan chana lawi nei lo vin, an dikna leh chanvo rah behsakin an awm thin a, an thawh phû tawk, hlawh pèk an ni ngai lo a ni. Tichuan, surplus value lo sáng zel chuan hnathawktu hlawh a titlêm ta tial tial a; tichuan, bourgeoisie leh proletariat inkarah khì a siam a, inhriatthiam lohna a lo awm tan ta a, a tawpah chuan revolution of proletariat a lo awm ta a, chu chuan capitalism a rawn nêk chhuak ta a ni.

Tichuan, State thuneihna chu proletariat-te kutah lo awmin, dictatorship of proletariat hi a lo par chhuak a, chu chuan socialism (an thawh phû tawka neih insem tlanna) lo hring chhuakin, a tawpah chuan communism (An mamawh dan ang zela neih insem tlanna) a rawn hring chhuak a, classless society a lo din chang ta a ni. Dictatorship of proletariat chuan capitalism a rawn paih thla a, mimal thil neih, mimala neitu bik nihna te chu a rawn nuai bo ta a ni.