Hnam ropuite u, tho r'u le - 8

- Lalhruaitluanga Chawngte

Vawi khat chu, sakeiin Ngaihsii a seh a, a losul haw a lo seh a ni awm e. Chu sakei bei tur chuan an khaw tlangval, a hre hmasa apiang an tlan nghal.

A hre hmasa ber Thangtawna a tlan hmasa ber a, a hnunga tlan Khuangchera'n a umphak, a tlan pel.

Tanpui ngai an awma che nghal țhin, sa leh ral beih a ngaih changa che nghal țhin hnam an ni a, chet a ngaih chuan a hre hmasa sa an che mai țhin. Chumi țum pawh chuan a hre hmasa sa an thawkchhuak a, a tlan hmasa ber chu a hnunga mi Khuangchera'n a leh pel ta a ni.

Khatia Khuangchera'n a hmaa tlan Thangtawna a'n leh pelh khan, tlan pelh pah khan, "Ka ngam ang ka ti zawng a ni bik lo e," a'n ti hram a nih chu! A va han inngaihtlawm thlak tak!

Khatia țhian te tlan pelh paha "Ka ngam ang ka ti zawng a ni bik lo e," Khuangchera'n a'n ti hram kha, mi mitmei a vengin mi dang a vengthawng hle tihna a ni a, mi tihlungawi loh a hlau hle tihna, a thiltih mi dangin an lo hnual phah ang tih a hlau tihna, mi dang a ngai pawimawh hle tihna, a mihringpuite a zah thiam tihna a ni. Miin inti huai an ti ang tih a hlau tihna te pawh a ni a, 'Ka chungnung ber e,' a ti lo chiang em em tihna pawh a ni.

Sakei bei tura mi dang leh pel ngam, a hmaa mi a leh pelh avanga a inthlahrung titih a nih chuan, mi chaltlai leh mi chaldelh chi a ni lo ang tih a chiang a, 'Ka huai e,' tih vanga mi pawisawi buan buan chi a ni lo ang tih te, a huai em avanga a bula awm hrehawm chi a ni lo ang tih te pawh a chiang.

A nihna takah chuan, a tlan pelh avangin ngaihdam a dil tihna a ni ber a, 'Kei aiin i huaisen daih ang tih chu hre tho mah ila,' tiin, a tlan pelh avanga hrethiam hram hram turin a ngen hram hram tihna pawh a ni. A va han inngaihtlawm thlak tak!

Chutiang huna chutiang țawngkam han chhakchhuah hram chu, mi hram tlahawlh lote mizia, mi pawisawi hlau reng renga nung, mi thuhnuairawlh zia a ni a, chu zia chu pi leh pute ațanga kan ngaihsan a ni.

Pic: #John_Chhana

(A hnuaia fakna hi hmet ve rawh.)