Hnam ropuite u, tho r'u le - 7

- Lalhruaitluanga Chawngte

1914 ațanga 1918 thleng khan khawvel ram liante an indo a, Khawvel Indopui Pakhatna tih hial khawpa nasa a ni. Khatah khan keini pawh kan tel ve a.

German ral bei turin kan tlangval rual, mi 2100 an thawkchhuak a, Lushai Labour Corps hming puin Feren ramah an rammu a ni kha.

Kha Indopui-ah khan bunker leh trench khur a pawimawh em em mai a, a sawi uar phei chuan Indopui Pakhatna kha 'trench warfare' a ni e, ti hialin an sawi țhin. Europe ram vawt, vur tlakna hmuna indote kha vur vawtin a tibuai a, trench khurah te khan vurin a hmet khawng țhin a ni awm e. Bunker leh trench pawimawhna, 'frosbite'-in sipaite a tihbuaina hmunah khan bunker leh trench buatsaih leh meihawl rawh kha hna pawimawh hmasa a tling ang; chu chu kan tlangvalte hna a ni.

Vawi khat chu Feren khaw pawimawh pakhat Amiens-a an kal lai, rel chawlhmun an pan laiin German sipaiin chu khua chu bomb hmangin an bei chiam mai a, bomb puak dur dur karah in chim thawm a ri dur dur bawk. Mipui an mangang nasa ta mai a, nunau mangang chuan Lushai Labour Corps te chu țap chungin an kuah ta chawn chawn mai a ni awm e.

Mizo tlangvalin an en liam thei ta lo; 'Kan hotupa kha hrilh rawh, kan kal zel duh tawh lo. Silai min ngaihtuahsak rawh se, German kap turin kan let dawn a ni,' an ti a, ralthuam lek ve mai an duh ta. Nunau mangangte chhana hmelma sipaite kah an duh a ni.

Mahse, an hotupa, anmahni hruaitu chuan a remti lo a, kal zel tur tih chu an thu hmuh a ni. Nunau mangang thlaphang leh thlabara an awm laia anmahni chhan lova kal pelh kha an tan a va har dawn tak!

Kan tlangvalte khan an rammut chhung khan silai ken ve an chak a, hmelma sipaite an kap ve chak țhin. Mahse ralthuam lek tura tih an ni lo a, ralthuam hmanga ral bei tura 'train' an nih loh avangin, an tan a rem lo. Amiens khawpuia nunau mangang chhan nana silai hmeh puah ve mai an duh lai pawh khan, a rem tlat lo.

Mihring nun hi chutiang chu a lo ni, tih tur tih loh leh tih loh tur tih hi a pawi a, a chang phei chuan a hlauhawm țhin. Chutiang chuan hlauhawm leh harsatna a thlen a, inlungrualna leh inpumkhatna te pawh a tichhe thei. Chuvangin, a ni, he hnam hian eng hmelma pawh bei se, mahni tih tur țheuh ti tur leh mahni tih loh tur ti lo tura inven a ngai a, insum te pawh a ngai ang.

Feren rama rammu kan tlangvalte mawlh kha; silai lawm hnam kan nihzia leh Mizo tlangvalin indo an thiamzia te ka ngaihtuah hian, ralthuam kengin che ve ta se, inzir miah lo chung pawh khan an che thei viau thovin ka ring a, a huai huaiah an țang ngei bawkin ka ring. Mahse an tih loh tur ti lovin, an tih tur chin a ni an tih ni.

Pic: #John_Chhana

(A hnuaia fakna hi hmet ve rawh.)