Hnam ropuite u, tho r'u le - 6

- Lalhruaitluanga Chawngte

1920 tawp lamah khan Mizoramin țhingtam țam a tuar a, khaw hrang hrang an țam a nih kha.

Khaw țhenkhat erawhin kha țam kha an tuar lo a, khaw țhenkhatah phei chuan an buh ngah kum a ni hial zawk.

Chutianga khaw vannei, buh ei tur nei khuate chu buh nei lote'n an bel a, manganga lutte avangin khaw țhenkhat chu an pung thut mai a ni awm e.

'Sem sem dam dam, ei bil thi thi' ti țhin ngang kha an ni a, ei tur nei lote ei tur pek chu ei tur neite mawhphurhna a ni a, pi leh pute ațanga chutiang tura inzirtir, chutiang zirtirna țhan hnan chu an nih avangin, mahni khua țheuhah an inpui ang tih leh, eitur zawnga mi khuaa pem te pawh an pemna khuaa Josefa te'n theihtawpin an lo pui ang tih a chiang.

He țam an tuar laia țam ve lo, buh ngah khua ka hriat chu Lungsum khua hi a ni a, ka hriat ve riau chhan pawh kan essayist chhuanvawr Thanpuii Pa khua a nih vang a ni.

Thanpuii pa hian a lehkhabu "Zo-Zia" tihah khan a ziak a, a pain țhingtam laia buh a thar țhat thu leh an khuaa pem lutte'n an eipui thu sawiin, "...mi lo pem lutte chuan an chhim hlawm a, a thlawnin a pe zel mai a ni," a ti.

Chu chu kan pi leh pute zia a ni; chhuanchhamte chhanchhuah leh chhawmdawl kha an mawhphurhna, an tih ngei turah an dah avangin țhenawmah chhuanchham leh tlachham an awm te khan an inthiam lo a, mualphovah an inngai tlat zel. Thuhriltu hmingthang Arro Khuanga te phei chu ngaihdam dil khawpin an inthiam lo mawle!

Vawi khat chu, eitur tlachham pa pakhatin Arro Khuanga buh hi a lo rut a, an innangching ta a ni awm e. A buh ruttupa hrilhhai taka a awm lai chuan Arro Khuanga chuan ngaihdam a dil ta mai: "Ekhai! țhenawmte chhuanchhama awm, buh pek nachang ka lo hre lo chu ka va sual em! Min ngaidam rawh aw," zu ti a!

Thanpuii Pa ngaihah chuan chutiang chu a ni Kristian nun leh kan hnam nun chu ni. Mi ngaihah pawh a nih ve tho ka ring.

Pic: #John_Chhana

(A hnuaia fakna hi hmet ve rawh.)