Hnam ropuite u, tho r'u le - 5

- Lalhruaitluanga Chawngte

Khawvel Indopui Pahnihna a chhuaha khawvel a indo mup mup lai khan sapin min la awp a, an lamah țangin kan tlangvalte pawh an rammu ve a nih kha.

Sapho khan Japan ral do turin Mizo tlangval hlang awmna Lushai Scouts an din a, inzir (training) mumal pawh awm lovin ral an do ve ta a ni. Biate-ah thla li vel an inhrual ve nawk nawk a, silai hman dan leh indo dan pawh an zir fumfe hman lo. A țulnain a nawr a, ral do turin Burma lamah an chho ve ta rawih mai a ni.

Burma-a an ral dote chu Japan sipai an ni a, Japan sipaite chu khawvel huap pawha huaisen hmingthang, thih hlau lo, hmelmate'n an man dawn ai chuan intihhlum thlang țhin an ni. Chutiang sipai huaisen hmingthangte chu 'training' pawh nei mumal lo Lushai Scouts nen an inhmachhawn ta a, khawvel hian hria se ka ti țhin: an commander Major RK Hranga'n "Lushai Scouts te hi an zirna leh thiamnain a tlin loh avanga nuihzatthlak deuhva an chet chang te awm bawk țhin mah se, Japan kuta thi leh hliam tuar an tlem hle a, Japan-in an kutah an tuar nasa zawk hi thil mak tak a tling a, hei hian an huaisenzia leh ram dai an ngamzia a tilang a ni," a tih te kha. Laungshe (Burma) khuaa anmahni tlawh vang vangtu Lt Gen Sir Frank Messervy-a'n, "In chanchin ka lo hre zui zel a, in huaisenzia te ka lo hriatin in hmel hmuh ka duh vang leh in hnenah ngei lawmthu sawi turin ka rawn kal a ni," a tih te pawh kha. Ani hi India leh Pakistan ințhen hnua Pakistan sipai commander-in-chief hmasa ber a ni.

Inzir chawp tak meuh meuhva rammu tih takah, sipai hna engkim mai kha an tan chuan foreign thil ang zel a ni ber ang. Ralthuam han chelek te pawh kha, upat hnua smart phone khawih ve lehte ang deuh hian an khawr țut ngeiin a rinawm. Grenade enkawl dan te pawh, an thiam lo a nih pawhin a mak lo a, lo thiam se a mak zawk ang tih tur a ni!

Vawi khat pawh, Yen an thleng a, an hna hmasa chu trench khur laih leh mahni ralthuam țheuh tihfai a ni. An awmna chu ramhnuai a ni a, an commander pawh sa pelin a chhuak. Mel chanve vel a thleng tihah chuan thil puak ri dur a hre ta mai! Japan-in grenade-in a sipaite an kap a nih ringin a tlan kir ta nghal a.

A lo reh țhuap a, sipaite chuan mahni trench țheuhvah țhingțhiin hma lamah silai an lo tin țhap. Eng nge puak ri dur kha tih chu zawhna hmasa a ni lo thei lo a, mahse tuman eng ri nge a nih an hre lo. Eng ri nge a nih an hriat loh avang chuan Japan sipaite grenade ri a nih a rinawm ta deuh deuh!

Sipai pakhat, hmai thi hnuang mai hi an hmu ta a, mahse hliam tuar ang pawhin a awm chuang lo; hmai thi hnuang chung chuan hma lamah silai a tin a, a 'stand-to' thlap!

A chhan an han zawt a, "Ka pu, ka hre lo," tih bawk a ni a chhanna ni.

An han thlir kual a, thil a chiang ta. Chu sipai, hmai thi hnuang chuan a grenade a tihfai laiin a pin kilh țha lovin leiah a dah a, a lum puak a lo ni! A hmai a thi hnuang kha a lo mak lo e! Hmai thi hnuang chunga ral kap tura țanhmun a lo siam sauh sauh tho kha, miin mak an ti a nih pawhin keini chuan mak i ti lo ang u. Duh leh hnam dangin mak rawn ti se, keini chuan, "Chutiang hnam chu kan ni e," i ti ang u.

Pic: #John_Chhana

(A hnuaia fakna hi hmet ve rawh.)