Hnam ropuite u, tho r'u le - 4

- Lalhruaitluanga Chawngte

Kan pasalțha hmingthang, tlangval tlawmngai Taitesena khan ramvah nikhuaah chaw a ei tam ngai lo a ni awm e; bar thum emaw te a'n bar a, "Ka puar ta e," tiin a kham mai țhin an ti. A chaw lak a țhat loh vang leh a ka tui loh vang lam a ni lo.

Vawi khat chu an ramvak a, theipui rah hel a lo ei lai hi a țhiante'n an va hmu palh hlauh mai a ni awm e. An val upa kha a inthiam lo ta em em mai a, "Taite, ti em ema intihrehawm tur chuan kan zirtir hlei nem che," a ti a, Taitea chu a zak em em mai a, a ngawi reng a, a sen ap ap mai a ni awm asin!

Chaw bar thum vel bara kham mai țhin Taitesena kha a ril zawng a lo țam ve țhin tihna a ni a, khatia a ei tlem khan mi dang a kian tihna a ni. Tin, khawi lo kalnaa a tlai puar ber nih kha mawi lo a ti tihna a ni thei a, ni tin khawsakah mi dangin duhkhawp an lo hmu lo palh ang e tih khan a rilru a luah nghet hle tihna te pawh a ni ang. Ni tin khawsakah a chuh chak leh chuhhelh lo chi nih kha, mawi a ti ve hrim hrim tihna te pawh a ni thei.

Chu rilru chu amah Taitesena hmuhchhuah leh chinchhuah a ni lo a, an thlahtute ațanga an rilru puthmang, țhang leh thar zelte hnena an hlan chhawn, chutianga an inhlan chhawn zelnaa Taitesena rilru pawh thleng ta a ni. In saknaah mi an intlar a, leirawhchan an inpe chhawng ang deuh hian 'Mi dangte tana malsawmna ni tur chuan tuar te pawh a ngai' tih rilru chu chhuan (generation) hrang hrang te'n an inhlan chhawng a, tute in luah nghet emaw ang deuh hian, chu rilru chuan Taitesena te rilru pawh a luah nghet a ni ber ang.

Miin chutiang rilru a put tawh chuan, 'Ka chang tlem bik,' tih te hi an tan chuan țawng thi tawh a ni ber ang; mahni chanai pawh mi dang kian thei tan chang tlem bik intih a theih loh ang a, vuipui theih an nih loh bakah mi dang vuipui pawh an tum lo ang.

Chutiang rilru pu lote tan erawh chutiang rilru chu thil ho mai mai, țingțang hrui nei lo ang lek, hmantlak loh thil te pawh a ni thei hial ang. Taitesena kha puar khawp ei lo tura khaptu an awm lo a, a puar khawp pawh ei se tu man mak an ti lo ang, misual a ni tihna a ni dawn chuang lo. Chuti chunga chaw puar khawp han ei loh tlat mai kha, a ho titu tan chuan a va ho dawn tak!

Tv Taitesena mawlh kha: hun ralțit lai, ei leh bar leh ni tin khawsak a mumal loh lai te lo tawng ta se, thil hi a nei tlem țhin dawn hian ka hria a, ni tin mamawh thil hrang hrangah pawh mi dang an hnianghnar theih nan a inlamkhawm duh lo tlat țhin te hian ka ring a ni. Tin, mi dangte tan ngawi renga a inhman ngat ngat ka ring tlat bawk a.

Chutiang ka rin chhan pawh, chutiang chu kan thlahtute rilru puthmang leh an ngaihsan zawng a nih vang a ni. Chutiang mite thlah chu kan ni e.

Pic: #John_Chhana

(A hnuaia fakna hi hmet ve rawh.)