By - Lalhruaitluanga Chawngte
Khatia Indopui Pahnihnaa khawvel ram ropuite an indo khan, khatih laia min awptu Britain sorkar tan Mizo tlangval engemaw zat an rammu ve a, German ral dova Feren ram kalte hnua Mizo tlangval rualin khawvel ram dang an daidar leh hmasak tum a ni nghe nghe awm e.
Aizawla lak an nih hnuah Lucknow-ah an training thin a, tlangval khati zat an han chhuak kha chu, lunglen a hring lo thei lo te pawh a ni ang, an khaw nulate pawh suangtuahna lamah Lucknow-ah an cheng ve lo thei lo te pawh a ni ang, vawiin thlenga kan khawlai țawngkam lar "Awi ka nu, Lucknow" tih te pawh a piang a nih kha.
Ral dova sipaia tang Mizo tlangvalte zingah khan mi 60 chuang chu Lucknow-a an training zawhah Singapore-ah an han rammu a, vanduaithlak takin hmelma sipai salah an han tang ta tlat mai. He saltangte chanchin ngaihnawm lo tak mai hi a va han ngaihnawm tak!
Japan ral lianin British hmun pawimawh Singapore an la a, British sipai an man zinga tel kan tlangvalte chu saltang an ni ta der mai. An saltanna ramah chuan tihduhdah te an tuar a, anmahni mantu Japan sipaite nena an sakhmel leh sakruang a inan thu mai te pawh thlamuanpui tham a tling a nih chuan an dinhmun a hniam hle tihna a ni ang.
Hah leh hrehawm takin, chau leh chawrche takin, mangang leh mumal lo takin hun an hmang a,, Zoram an chhuahsan dawna kohhran meuhin biak ina a thlahte kha tunah chuan Japan sipaitena duh duha an koh hran theih, duh duha an kutthak an hnawih theih an ni ta!
Kum thum chuang sala an tan chhungin an ei a chhia a, an sa pawh a chhia. Mahse an rilru erawh tihchhiat zawh a ni lo a ni ang; Israel fate saltangin "Mi ramah te chuan Lalpa hla engtin nge kan sak theih ang?" tia an țingțangte pawh an dah bo laiin kan tlangvalte saltang erawhin fak hla an sa a, Good Friday leh Krismas te pawh an hmang thlap thlap! 1943 Good Friday-ah te khan:
"Ka tan huanah a tawngtai a,
Nangma tan pawh a tawngtai," tiin mittui tla zawih zawihin an zai asin!
Khami kum Krismas te kha thawhlawm thawhkhawmin Singapore saltangte hian sal ni chungin an hmang ngat bawk asin!
Dinhmun chhiat lai pawha Kristiante hun pawimawh ngai pawimawh thin hnam kan nih hi!
Dinhmun chhe taka an din lai, kawng harsa leh hahthlak an zawh laia an inhmangaih turzia kha, ka ngaihtuah hian, ka ngaihtuahna hi ngaihnawm ka ti thin! "Singapore-a Mizo Saltangte" tih bu ziaktu James Dokhuma'n, "... anmahni lah an inngainain an inhmangaih tlang narawh. Hling khat chhun, a thlum a al ei za tak meuh an nih avangin an inngai tlang em em a, inhnial fiam fahran pawh an awm ngai lo," a tih kha ka va han awih tak!
Hnam inhmangaih tak, sa an kah pawha thenawm khawvengte ei ve atana awt thin hnam, mi hnawksak nih hlau reng renga hun hmang, mi rilru tihnat palh hlauva dam diaia thil sawi thin hnam an nihzia ka ngaihtuah hian, hun harsaa harsa taka an awm lai hian an inhmangaih tlang ang tih thu-ah hian ka chiang a ni! Chu chu kan hnam zia a ni.
Hnam ropuite u, Tumkau Ni, Good Friday leh Easter Sunday te pawh hun harsaah pawh harsa chung chunga hmang hram hramtu hnam hi i inkuah nghet sauh sauh teh ang u.
Pic: #John_Chhana
(A hnuaia fakna hi hmet ve rawh.)
Post a Comment
He post chungchanga i ngaihdan lo sawi ve rawh: