Penticost Ni: Harhna kan ngai, harhna kan ngai em e

- K Remruatfela

Columnist, Explore Mizoram

1. Mizote hi Pathian thu ngaihsak leh tuipui em em, harhna pawhina vawi tam tak a lo nuai thin tawh nia inngai kan ni a. Chutihlai erawh chuan kan nunah erawh a lang chhuak lo hle a, harhna dik tak hian min la nuai lo emaw tih mai te hi a awl rum rum thin. Hnamdang, kan Kristian puite aia heti em ema Zofa Kristiante kan nun a dazât bik em em mai chhan bik mai hi eng nge ni ta ang tih hi mitinte kan inzawh pawh a pawimawh khawp mai. 

2. Zofate moral chhiat tawh zia hi sawi fiah zawh phak pawh a ni tawh lo hial awm e. Kan mihlim ten Zoram sualna vawi tam tak an tlangaupui tawh thin a. Nimahsela, thu tak hla takah kan ngai thin meuh lo niin a lang a. Kan sim loh chuan Zoram hian kan chan tur hi a rapthlak khawp ang. Kan intodelh thei hauh lo te, kan changkang thei hauh lo te leh kan nun a nghet lo em em mai te hi tihtakzeta Pathian thu kan awih loh vâng a ni thei mai ang em?

3. Rawngbawltu leh harhna hrin inti zingah ngat pawh sum leh paia rinawm lo, Kohhran sum tih chingpen chu hlau em em, nimahsela, sawrkar sum leh pawl sum lâk hêk hreh chuang si lo, lei bat leh dâwt sawi mai mai hreh lo, mi huan thlai rûk sak pawisa lo leh thamna lâk mai hreh lo kan tam em em a. Rui lo haia lova fim kura awm thinte hi heti kawngah hian an hlauhawm zâwk mah a ni awm e tih theih turin kan khawsa a, rin phak bâka rapthlak kan ni.

4. Harhna in min nuai vanglai pawhin thalaite leh nu leh pa chenin sex hmansual kan pawisa lo em em a, hmelmate chunga phuba lâk kan tim  lova, kan mi huat zawngte chu social media ah te ânchhe tinreng kan lawh a, rawngbawltute zingah mi ui leh ar vuak thluk hreh hauh lo te pawh tam tak kan awm thin niin a lang a, kan nun chhungril ber khawih theih tur harhna dik hi kan mamawh takzet a ni.

5. Biak in khar a nih tâk mai avanga zalên ta viaua inngai, chawlhnia hnathawh mai pawh pawisa lo, chhungkuaa Pathian biak ho aia a huho kher chauha Pathian biak duh ringtu kan pung sâwt ta hle a, thinlung chhungril tak taka Pathian tihna nei hi an vâng ta hle niin a lang.

Heng point 5 ka rawn tar lan tâk te khi rin thu mai mai ni lova, a taka kan tawn vek te an ni. Nitina  mipui dawr leh buaina chingfel thin kan nih avangin Zoram Kristiante sualna hi a lo rãpthlâk tawh zia kan hre chho tial tial dâwn pawh niin a lang! Chu ai maha la run thlâk zawk mah chu Kohhrana mi inhmang tak tak leh Pathian thu tlangaupui fo thinte a pawh hi Kohhran pâwnah chuan heng sualna hi kawmserh miah lo leh thinrik hauh lo kan lo tam lutuk tho hi a ni.  Chuvangin, hawh u, tihchhiata kan awm lohna turin ingaitlâwmin Lalpa au ila, kan nun chhungril khawih phâk harhna dik kan chan theuh theih nan Pathianin hnenah i in hlân thar mawlh mawlh ang u.