Haw Runpui: Delhi atangin 1400 chuang lo thleng; Hmeichhe pakhat vangin an buai rei

Aizawl | May 31, 2020: Nizan zanlai khan New Delhi aṭanga lo haw mi 1,400 chuang tluang takin Bairabi rel station an rawn thleng a, RAT hmanga endik vek an nih hnuah bus hmangin an awmna district ṭheuh panpui an ni.

Pic: hmingmawia chinzah

Vanneihthlak takin test hrang hrang paltlang-ah lo hawte hi an negative vek nia hriat a ni.

Thudawnnain a sawi danin, In report hi 1402 an ni a, pangngai taka chuang tur chuan bus 85 a ngai. City bus driver te an hah tawh hle a, Bus mamawh ang zat a awm thei lo. Bus 73 chiah a awm theih laiin mihring rawn thleng tur zat  (1402)  aia tam daih Delhi atangin an rawn thleng a. Bus tlem laiin mihring an tam thung si a, a ngaihtuahtu lam an buai hle.

Pic: Hmingmawia Chinzah

District pakhat chu mi 19 an ni a, bus pakhat a leng tawk an ni. An bus a chuan tum hi mi 35 an ni tlat a, an han enchian chuan in report aia tam an rawn haw ta tlat a ni. Railway lamin an rawn hnawh haw a ni ber mai.

Heti hi boruak a nih laiin kawhmawh bawl tawk a lo awm a, Kolasib chhuak chanchinbu Zingtian Editor ZMP Tlau chuan heti hian FB lamah a post.

"Haw chak a bus luh hun an nghah thup laiin Hmeichhe bus chuang duh lo kan han buaipui pek reuh ah kan tlaivar chiang hle mai." a ti a.

Chu hmeichhia an buaipui chuan buaina a lo siam leh a, "Delhi atanga rawn haw hmeichhe pakhat kan buaipui hrep hnu a bus a kan chuan tir theih hram chu, Bairabi khawdai Meidum hnaiah a lo chhuk leh pek a. Police-in an lak a ngai ta nge nge e. Amah hi damdawi rui buai tak a nih rualin in man ringawt kha a risk a sang riau bawk si a, a buaithlak hle. State dang atanga rawn haw tur an la awm nual a, hetiang hi chu rawn tel tawh lo hram se la a duhawm hle. A rawn chuanna train a thawn kir leh mai kha a chakawm rum rum mai. Bairabi a rawn thleng zingah mipa buaipui ngai an la awm miah loh lai a, hmeichhe champion tak a rawn tel ve hi a zia lo hle mai. Sezawl chhuah chi lah chu a ni mang si lo a, kawng leh lamah chuan a lainatawm hle mai." tiin ZMP tlau chuan FB-ah post a siam bawk.

Nizan khan Goa lam leh Mumbai lam relin an rawn haw mek a, naktuk lama lo thleng tura beisei an ni.

Tin, anni bakah hian Pune atangin zirlai 20 bus in an lo haw mek a, anni pawh tunah hian kawng lakah an la thang mek a ni.