TÛN KÂR CHHÛNGA MIZORAMA THIL THLENG LANGSÂR ZUALTE

Buatsaihtu: V Kungtea
Email: kungteavandiau0785@gmail.com

*24.05.2020:* Chhûn khân Pu C.Lalsângzuala (Mazuala) Aizawl Salem Vêng K.Section chu a ram kal, lâwiin a pumah a lo pir a; mi tlâwmngaite’n buaipuiin damdâwi in panpui a ni a, he thu buatsaih lai hian amah hi a harh țhain, a biak theih a ni.

• Tlai dâr 4:30 khân Lalrindika (14), Lungtian II chu a țhiante nêna an infiamnaah, electric current (main line)-in manin, a țhiante Lalpêkhlua (13) leh Lalhnehsânga (12)-te’n theihtâwp chhuahin an țanpui.

• Chawhnu lam khân Pi Lalțhatluangi, kum 52; Saitual Hmâr vêng chu a pasal Ruatzela’n a vit hlum.

*25.05.2020:* Chawhnu dâr 2:30 vêl khân Tuivai luiah Nl.  Nora Lalnunpuii (26), Dâwrpui West Aizâwl a tla hlum.

*27.05.2020:* Zîng dâr 9:15 khân Bualpui ‘H’ BRTF labor pahnih thing tluin a delh a, pakhat hi a boral nghal a, he thu buatsaih lai hian a pakhat zâwk hi Thingsai PHC-ah dah a ni.

• Hav.Rohmingliana (47), Vaseikaia covid-19 duty-a awm mêk chu Vaseikai Police Station bul kawng kovah zîng dâr 7 khân a tla a. Nikhaw hre lovin a awm a; Vaseikai aṭanga Chawngte panpui a ni lai, Chawngte thlen hma KM 10 vela hla, Jamaisury khaw bulah chhun 12 vêl khân a boral.

• Chawhnu dâr 2:30 vêl khân ruah nasa tak a sûr avângin Dûrtlâng Leitan kohhran hall sak lai mek chu a chim.

• Zîng lampanga thli leh ruah thawkin Zuangtui Industrial Estate, Neuva Section-ah Pu K. Lalmalsawma-te chhungkua chênna in chu chim hnanin mi pathum a delh a, he thu buatsaih lai hian pahnih hi damdâwi in panpui an ni. In chimin a delh te: Khualzîngi (84), Lallawmpuii(19) leh
Lalnunthara (18).

*28.05.2020:* Hrilêng vânga Delhi-atanga Siaha District-a hâw tûr phurtu bus chu zîng lam khân Țawipui South khaw daiah a che sual a, hliam na lutuk an awm hriat a ni lo.

• Chhûnah W. Phailêng Electric Vênga Pu Simon-a in chu an kawmchhak ko minin a hnâwl a; nu ber Pi Marâwni leh a fate 2-te’n hliam tuarin W. Phailêng PHC panpui nghâl an ni.

• Mizoram sumdâwng intêlkhâwm Mizoram Merchant Association (MIMA) General Hqrs. Aizâwl hruaitute chuan Chief Minister Pu Zoramthanga hnênah an harsatnate an thlen.

• Chawhnu lam khân Mizo hmeichhe zînga upa ber nia ngaih, Pi Dârrohnûni, kum 108 chu a chênna in, Kawrthahah a thi.

• Dârlâk khaw bula NH 44A Teirei lui lei dawh mêk chu zîng lam dâr thum vêl khân a chim.

• Chawhma lama ruah sûrin Lawngtlai khawpui chawmtu PHE feeding main pipe line chu lei minin a hnâwl chhia.

*30.05.2020:* A nimin tlai lama thli leh ruah thawkin Lawngtlai District chhûng, S.Bûngtlâng khuaa Pu Zînglallâwma, Pu Zîngsângliana, Pu Lalchhanchhuaha leh Pu Lalthansânga-te in chu a tichhe nual a, hêng chênna in chhia thawm țhat hna hi hemi nî (tahrik) hian S.Bûngtlâng khawtlâng chuan thawkin, luah zui theihin peih fel a ni.

Post a Comment

He post chungchanga i ngaihdan lo sawi ve rawh:

Previous Post Next Post