Columnist, EXPLORE MIZORAM
Khawvel pum kan buai suau suau a, mahni awmna hmun ni lova tangkhang pawh tam tak kan awm a. Tual chhung leh ram pawnah pawh vawiin thlenga hna la thawkzui thei lo tam tak kan awm a, ei turah pawh mangang tawh leh la buai ve chuang lo te, nun hum tura mangang tak tak leh harsatna la nei chuang lem lo te kan ni a. Kan dinhmun a inthlauh ang bawkin kan mamawh pawh a in ang lo a, chuvangin kan vaia huapa ṭhankhawm hi a fuh ber lohna lai tam tak a awm a. Chuvangin ram pawna tangkhang ten rilru fim an lo put phahna a nih tak mialin thurawn tlem.
BUAI LEM LO TE TAN:
1. Buaina leh harsatna i la nei ve lem lo a nih chuan i buai ve loh leh harsat ve loh chhan kha lo chhut hmasa ang che.. Tichuan, buai leh harsa lova i awm theih hun chhung tur i chiang thei ang.
2. Tuna i tangkhangna area a pandemic outbreak kha lo chik ang che, tichuan engtiang takin nge khalai area a nghawng dan tur leh engtia rei nge a awh dawn te pawh a ngaihruat thei ang.
3. Step 1 leh 2 hi ngun taka i compare hnuah, khalaiah buai lovin i paltlang thei ang nge thei lo ang a chiang tawh ang.
Hetianga thil awm dan leh nih theih dan i chhut zawh fel tawh nih chuan, i thutlukna i siam hmain heng hi lo ngaihtuah zawm leh ta la..
a) Location a zirin area tin thlahdul hret hret leh khuahkhirh tulh tulh te a awm a, thlahdul ho hi chuan a thlawna inluahman eng ilo pek reng an duh dawn loh avangin HNA an ṭan chho leh suau suau dawn a.
b) Mizoramah i haw tawh a nih chuan i thawhna ten hna an ṭan leh hnuah pawh chhukthlak lehna tur a awm kher lo ang, kumin chhung pawh a ni thei..
c) I haw a nih a, chhuk leh thei si lova hna i chân ta a nih pawhin sorkar dem ngawt a chi loh ang. Tun hunah chuan engkim hi a buaichuar nuaih a, mahni tal kan lo inhmakhua thiam ve a ngaiin chu chu mitin mawh a ni si a.
d) In luah i nih phei chuan engkim i hawn seng dawn lova option pahnih i nei - A manhu aia tlawma i bungraw tihral ṭhen emaw, i haw chhung pawha i inluah man zuk deposit thla tin! I chhuk leh thei lawk lo a nih phei chuan a kuma kum chuang a lo thlawnin in luah man i chawi thei a. I lo intiral a nih thung chuan i chhuk leh theih hunah a bul aṭang bawka hringnun bul i ṭan ṭhat leh a ngai dawn.
Hei mai hi a la ni lo a, haw loh pawn i buai dawn lo a nih chuan heng hi lo ngaihtuah chiang mah teh!
i) Kha chen depress lo chauh khawpa fimkhur vanga i lo inkhungna zawng zawng kha i haw a nih chuan a ho der thei!
ii) Engvang maw i ti em ni? Rail/flight i panna kawng te, station/airport te, rail/flight chhung te, Mizoram lama an lo hmuahna counter te, Quarantine Facility thleng khan vanduai theihna risk awm theihna vek a ni miau a lawm.
Chuvangin i buai lo a nih a, buai lova hna ṭan leh hun nghakthleng theia i inring a nih chuan haw kher loh kha a him zawkin a finthlak daih mai thei. Chuvangin haw tura i rilru i siamfel hmain rilru fim takin, thil thleng thei hrang hrang ngaihtuah tel ranin lo chhut chiang hmasa hram rawh.
I BUAI TAWH AVANGA HAW NGEI NGEI I NGAI A NIH CHUAN
1. I fimkhur loh zeuh vang khan Zoram hi a him loh phah thei a ni tih hre reng la, fimkhur lo bansan lul suh ang che.
2. Haw hun tur hi 'Pathian chauh lo chuan a hre lo' tih theih khawpin information hi hriat advance theih a ni lo a. In tangkhangna state leh Mizoram sorkar inbe fel vek mahse haw nghal rum rum theih a ni lova, in hawna tura Railway/Airway lamin Rail/Flight an pek hun che u nghah leh tho a ngaih avangin Welfare hruaitute ngaihchan reng emaw, sorkar lam aṭanga chin ngaihchan reng kha i duty a nih lo hrethiam ang che.
3. Chuvangin i thawmhnaw pack theih ang ang lo pack lawk la, haw kawnga i mamawh tur ang ang lo in stock lawk dan lo zawng ang che.
4. Tichuan "Naktukah kan chhuak dawn.." an tih thut pawhin buai rum rum lovin felfai takin i inpeih thei ang.
5. Inluah, luah man pek zui tura haw san tur tan, a theih a nih chuan ṭhiante nen inchhun fin a, mi 4/5 in in pakhata bungraw indahṭawmin sum tam tak a save thei dawn a. Mahse, eng hun nge kan haw hun tur a hriat si loh bakah lockdown vangin in ready hman a har deuh mai thei..
6. Haw kawnga i mamawh tur tih hian Mizoram i thlen huna Quarantine Facility a i mamawh tur chhut tel ang che. Tui, dry foods, cold drinks, sahbawn, ha nawhna leh a hlo, etc.. I mamawh tur leh i mamawh zat tur chu nangman i chiang ber ang.
7. He post video a kan hmuh ang hi thil thleng thei a nih avangin Mizo hmel tibal tur leh Mizo hnam te him lohna turin ruk tur lo zawng ve lo hram hram la, nangmah mai ni lovin lo haw leh zel tur te tan pawh buaina lianzawk a thlen thei a ni tih hriain haw kawngai buai dawn a nih chuan pui theitu tur che lo biakpawh lawk kha inthlahrung lo zawk hram ang che.
8. Rail/flight i panna kawng te, a chhunga i chhuan hnu te, check post leh Quarantine Facility thlengin hotspot a chang palh thei vek a nih hria la, nang chu fing takin lo fimkhur ang che.
9. Tangkhang hi Mizo chauh kan ni lova, hnam tin kan mangangin kan beidawng a, a buaipuitu lam pawh an lu a hai vek a ni tih hriain - a bikin rail a rawn haw tur ten rail a dinna hmun reng rengah kawngka leh tukverh hawn miah loh a him zawkzia lo hre reng ula
10. Mizo ṭheuh ṭheuh pawh inkaichhawng thei kan nih avangin mahni seat a awm mai kha a him ber tih hriain rail/flight chhungah pawh lo pungkhawmin lo zaiho dual dual leh eng ilo kha lo sim ngam tawh ila a duhawm hle mai. Tichuan palh a awm a nih pawhin contact tracing a sam ang a, Mizorama a darh tur ven a awl sawt ang.
11. Haw kawng tluan leh Quarantine Facility ah pawh thil engmah midang ṭawm loh theih kha a kai leh kai lo kan inhriat miau loh avangin a him ber tih hi theihnghilh lo bawk ila..
12. Nimin piah khan Kolasib khaw daiah Kolasib mi leh sa, thuneitu lam hriatpuina ni lem lovin drop an ni ngawt tawh a, mahss task force te ruahmanna felfai tak hmanga chinfel an ni a. Milema kan hmuh ang hian nimin lamah Thingdawlah a rawn haw ten dawrah thil a lo lei avangin chhungkaw thum chu an quarantine phah dawn bawk a nih hmel a. Chuvangin keini chuan Mizoram kan lut ta a nih pawhin guideline i bawhpelh lo hram ila. Sorkar lama thawktute indaih loh vanga min escort seng lo emaw, hmaih palh emaw a nih a, mamawh kan nei a nih pawhin khawchhungah ni lovin khawpawna dingin hotute biak pawh mai ni se kan ram leh hnam tan zel a ni si a.
13. Fimkhurna thu hla a mi ṭawngkam leh hruaitute hmalakna te nangmahni thinhrikna anga ngai lo turin in rilru kha lo POSITIVE em em rawh se.
14. Zoram lama quarantine facility aṭanga chhuah hnuah pawh ni 14 dang chu lo la fimkhur ngar ngar thei ula a va lawmawm lehzual dawn em.
Heng bak pawh hi preventive measure ah hian sawi tur tam tak a awm thei ang a, hei hi chu kan ngaihtuahna tizautu tur mai chauh zawk a la ni. Kan pastor in midang tumah a kai hriat ni lo khawpa a rawn fimkhur haw dan te kha ngaihtuah ila, a hnam pasalṭha zia teh a nia. Chuvangin ram pawna tangkhang zawng zawng ten mahni sahimna atan leh Zoram tan zel a nihzia hriaa mahni zawn ṭheuha micro planning mumal insiama, chumi vawn tlat chu a him zawk fe a ni tih i hre tlang ṭheuh ila a duhawm mang e..
Ram pawna mangang taka tâng mek te hian anmahni ka hnualsuatna emaw an tih ka hlau hle mai a, chutih rualin kan zaa him tlanna atan leh an ni rilru buai leh mangang tawh zinga ngaihtuahna fim lo lo awm palh thei an ni bawk si a, an ngaihtuahna tivar turin heng thu hi ka ziah a ṭulin ka hre miau mai bawk si..
Tin, mipui lam pawhin state dang an in detect zawt zawt chung pawha, "Vaiho chu an mawl em a lawm.." tia mahni inthlamuan chawpa invenna lama fimkhur loh phahna atana hmang mai lo hian "An test zah (in pic) ang te hi test ila engnge kan dinhmun ni ang?" ti zawnga rilru sengin fimkhur i bansan lo ang u..
Tuk chhuah nuam vek u le.. 🤗
Kolasib | May 25, 2020
(A hnuaia fakna hi lo hmet ve rawh.)
Post a Comment
He post chungchanga i ngaihdan lo sawi ve rawh: