UAE-A AN MITE TANGKHANG TE MANIPUR CM BIREN SINGH IN HRUAI HAW TURA HMA LAK A TIAM

Aizawl | May 24, 2020: Northeast India mi UAE (United Arab Emirates) a tangkhang mek te chuan tun Zirtawpni kal taa Manipur Chief Minister Biren Singh-an twitter a a thu ziak avangin haw thei tura beiseina thar an nei.

Coronavirus avanga India ram chhung leh ram danga awm te, an hna chan tawh te, Manipur a haw duhte hming list volunteer pakhatin  a la khawm a, twitter ah CM a thawn a. Chief Minister chuan rang taka hma lak turin a chhang nghal a ni.


"Rang takin hma kan la nghal ang. He hming list min pek avangin ka lawm e. Buaina kan pumpelh thuai ang. Jai Hind" tih thu CM hian twitter ah a post a ni.


UAE ah hian India mi tangkhang hawn duh, India consulate a in report hi mi 2,00,000 zet an awm. Tun thla bul lam ațangin India hian thlawhna hmangin a hruai haw țan tawh a. Mihring tam dan indawtin a thiar a, thlawhna zawng zawng deuh thawin Kerala state an la pan a ni.


Manipur, Nagaland, Mizoram te hian direct international flight an neih ve loh avangin a buaithlak hle a. Heng hruai hawn te hi India ram an lo thlenna hmun airport ah anmahni senso a khunghran nghal an ni ang.


Calvin Joute, Manipur state ami chuan February ațangin an hna an chan tawh thu leh an inluah man leh eitur leina te pawh an chhungte an chah a ngai tih thu a sawi. Boruak pangngaia an hlawh chhuah in lama an  chhungte an thawn vang a ni. Kan hawna tur ticket man pawh kan thawhna company ten min tumsak thei lo a ti.


Ngamzamang Lhungdim, UAE a kum 7 Abhu Dhabi a senior sales executive thawk chuan, duhthlan tur pahnih kan nei a, pakhat chu ban, a dang chu hlawh nei loa leave lak a ni a, ban loh chu sum tel loa khawsak ngaihna a awm loh avangin kawng dang a awm lo, a ti. UAE Immigration officer te lahin an cham theih chin grace period pela an cham vaih chuan pawisa chawi leh visa cancell sak an nih tur thu a hrilh bawk si a. An dinhmun chu khirh tak a ni.


March 2020 a visa tawp chu December thleng an awmzui phal a ni a, hemi piah lam an awm chuan a tirah Dirham 200 chawi leh nitin Dh. 25 chawi a ngai ang. ( 1Dh= Rs. 20.68).


Lhungdim chuan a awm phal chin June 5 thleng ani tawh si a, tourist visa a let turin Dh 2,000 lai a ngai bawk si a, ka mangang tak zet a, min țanpui thei tura kan rin te zah pawh sawi loin kan be tawp zel mai a ni, a ti.


MIZOTE AN MANGANG
UAE ah hian Mizoram ațangin inhlawha awm mi 50 - 60 vel an awm. Manipur, Myanmar lam zo hahthlak te nen chuan mi 200 vel an tling.


 Boruak pangngai laia an thawh chhuah tam ber Mizoram lama an chhungte an thawn țhin. Coronavirus avangin an hna February ațangin an chan tawh a, an mangang hle tawh a ni.


Vawiin tlai dar 3:00 vela LT Kima sawi dan chuan, "March 25 ațang khan UAE ah lockdown țan a ni a, Mizo tam ber hi Hotel a thawk kan ni a, tourist an awm tawh loh avangin thawh tur a awm tawh lo a, kan hna kan chan (lost) tawh a. In luah man, ei man a to si a, helaia thawkte hi chhungte support ngaih vanga thawk kan ni a. Mizoram thleng turin sum a ngai hnem bawk si a. A tam ber hi mangang tak tak kan ni tawh a, mi ramah ei tur nei lo mai thei dinhmunah kan ding tawh a ni," a ti.


Hetiang anih avang hian min țanpui thei tur nia kan rin hi zah pawh dawn loin Mizoram lam mi an biak thu a sawi bawk.



Source :

Gulf news
May 24, 2020
@ 09: 23 local time

====24==05 ==20===
Huna Kawlvawm

Post a Comment

1 Comments

  1. Manipur pawh kan awt tan ta chu a ni mai e. Tangkhang te an lainat awm mang e aw

    ReplyDelete

He post chungchanga i ngaihdan lo sawi ve rawh: