KA PA TYPEWRITER UK

(A tribute to my father, K.L.Chhuanvawra (1938 - 2016)

- K Remruatfela

Columnist, EXPLORE MIZORAM

Chhuna nilenga hna ka thawh avangin chumi zân chu ka mu tui takzet a. Ruahpui vânàwn sùr pawh hre lo lêka tui ti taka ka muttilh lai chuan thâwklehkhata ka mutna sir piah deuh bang âwng kâra thil engemawni tla ri thâwm dawp chuan min ti harh ta zawk a. Ka chauh êm avanga han mutthilhsan leh mai tuma ka'n chhin leh ngial pawhin chu thil tla chuan engemawni tak hian min mawlh tlat pek a. Mutthilh leh a hnêka ka harh tial tial tâk avangin chutia mu thei lo lêka min siamtu, chu thil tla chu eng thil nge ni ta tih hriat ngei tumin ka mutna khum atang chuan ka in beng tho ta a. Nimahsela,  phone light ti ênga thâwm awmna ni-a ka hriat ka han bih ngial pawha eng thil mah ka hmu lêm si loh avangin mut san leh mai ka han tum a. Chutia ka mutna khum ka han pan tur chu kan bungraw hlui dahkhâwmna Chhuar hnuaia thil uk deuh khuih lo awm chuan ka mit a la ta hle a. Light ti ênga ka han en chian chuan thil sakhat hlâwm lo tla chu chiang takin ka hmu thei ta a. Chu ngei chu a lo ni hun rei tak a awmna chin pawh kan lo hriat tawh loh, ka pa typewriter uk chu!

Ka pa khân engtik atang nge he typewriter hi a lo neih ka hre lova, khawi atangin nge a neiha, eng zahin nge a lei tih phei chu ka hre lo lehzual! Nimahsela, ka hriat chhun erawh chu ka pa khân he typewriter uk deuh khuih tawh hi ka hriat theih chin ata tawh duat takin a lo enkawl tawh a, Kohhran leh khawtlâng hmasawnna mai piah lamah ram leh hnam inrelbawlna lam hawi tinrenga a suangtuahna a taka a lo puanchhuahna thin a nih avangin a ngaina em em thin a ni tih hi a ni. A ni taka, ka pa khân a dam lai kha chuan a hunâwl neih apiang khân he typewriter uk deuh khuih nen hian an inkâwm thin emaw tih theih turin an inthutchilh chawt thin a, uluk taka nâwt faiin a ti tliang hlurh thin a. Naupang ina kan khawih leh kan tih hmêlhem kha a hlau ngawih ngawih thin. Keini, naupang maite kha chuan khawih enah pawh kan en ngai lova, khawih thinglo angah kan ngai a ni ber mai. Chutianga a dam laia ka pa in a lo roh em em thin chutia enkawltu leh thutchilhtu awm ta lova, riang taka a lo tla bal mai chu ka lainat ta em em a, ka pa in duat taka a lo nawh fai hliau hliau thin lai te chu mitthla chungin chu ka pa typewriter uk lo tla bal chu ka thlir ta ngawih ngawih ringawt a.

Chutia sungtuahna khawvela rei tak ka chên hnu chuan chu ka pa typewriter uk chu la kângin dawhkanah ka hûng chho ta a. A neitu damlaia khawih enah pawh kan lo en ngai loh chu engtin tak nge a pian hmang a lo awm tehreng tih chian tumin ka han khai let kual vel a. Thu a la chhut theih em tih te hriat tumin ka han chhu vel chhin a. Nimahsela, ka pa khan a lo hmang rim hle tawh a ni tih hriat ngawih ngawih hian a hmehna chunga chhinchhiahna inziak velte pawh chu awm lo ang hrimin a lo reh duak tawh a, a lo tliang hlurh tawh bawk a. Chhinchhiahna hmu lo chuan ka lo chhu ve zung zung thei ta reng reng lo! Ka pa kha chuan a hmehna chungah chhinchhiahna a lo awm thin a ni tih pawh hre lo lêk khan en mang lovin a suangtuahna hrang hrangte kha thua chantir turin a lo chhu chhuak zung zung thin kha a ni a. Ka pa ka lo tluk lohzia min hriat chhuah tir nasa hle!

Chumi zân chuan mutthilh reng reng ka tum ta lova. Ka pa typewriter uk mawlh chuan ka ngaihtuahna zawng zawng chu a luah khat a, suangtuahna khawvelah min chên tir a, ka han maimitchhin zeuh pawhin mitthlaah ka pa leh a typewriter inthutchilh lai mawlh ringawt chu a lo lang leh thin a. Keini'n a hlutna pawh kan lo hriat tawh loh, khawiah nge a awm tâk tih pawh kan lo ngaihtuah ngai tawh loh, chu typewriter hlui uk deuh khuih tawh chu ka pa tan kha chuan engtiang chiaha hlu nge a lo nih ang, he a typewriter uk atang ngei hian tualchhung leh ramchhung Chanchinbu hrang hranga a ngaihdan leh tha nia a lo hriat thin, a suangtuahna hrang hrangte a lo puangchhuak thin kha a ni si a. Lo la damin kan zingah lo la awm chu ni se chutia lainattu nei tawh lo ang hiala a typewriter roh em em lo let bal chu a va lainat dâwn tehlul em tih te chu ka ngaihtuah ta neuh neuh a. _'Mama, ka dam chhûng chuan i duh chen chen lehkha i zir zêl dâwn nia, ka châwm char char ang che,'_ min ti thintu ka pa kha min va ti ngai thar tehlul em! Kum tam tak chu 'Pa' tih tur nei lovin ka lo awm ve ta a, thiante anga 'Pa' tia koh tur hi ka van awt ve thin tak em! Ka pa, i vanram kawt chhuah atanga ka koh ri che hi min lo hriat phak mial tâkin vawikhat tal chu ka han ko leh ang che aw....

"KA PA!" 😢