Dawrpui west nula tuivai lui-ah tla hlum

Aizawl |May 25, 2020: Vawiin chawhnu dar 2:30 vel khan Dawrpui West nula Nora Lalnunpuii (26) chu Tuivai luiah a tla hlum niin exploremizoram.com chuan thu a dawng.

Thudawnnain a tarlan danin, Nula Nora Lalnunpuii hi Pi Lalzarmawii (Teteii) fanu a ni a, Pi Lalzarmawii hi Sakawrdai CHC-ah sister niin tun hnai maia Sakawrdai-a post thar a ni.

Vawiin khan Sakawrdai doctor hovin Tuivai kama New Vervek VLTF ramria duty te hriselna endik pahin an mamawh chi hrang hrang pein an kal a, Nora-i hian a nu chu zui vein hun an hmang ho a ni.

Tlai lama an hawn hmain chaw ei tuma an inkoh khawm lai chuan Nora-i hi tuiah a inchiah dai a, chaw ei turin an au a, a rawn kal ve mai turah ngaiin an ngaihsak zui lem lo. Nora-i tui chenna thlang lawkah chuan li thuk tak mai Li Den an tih mai a awm a, chumi kam velah chuan sangha mana ram kal an awm bawk a. Chung mite pawh chuan Nora-i rawn hleuh thla lai chu an lo hmu a, "a hleuh thiam reuh mange" an lo ti ve mai a. Tui tla anga han talbuai hmel a pu lo niin an sawi. An ni pawh chuan tui cheng ve satliah maiah ngaiin an lo ngaihsak zui lem lo niin an sawi.

Nora-i chu tui atanga a rawn chhuah mai tak lohah chuan an han ngaihven zuia, hmuh tur reng reng a lo awm ta lo a ni.

A tlakna nia rin Li den leh a thlang deuha suar awmna vaukamah ven buk siamin chulai hmun pahnihah chuan ruang channa hmun buatsaihin tlawmngai ten ruang zawn hna an thawh mek niin thudawnna chuan a tarlang.

Post a Comment

0 Comments