Aizawl | May 31, 2020: London ațanga Chanchinbu chhuak Daily Telegraph-in a ziak danin China telecom company lian Huawei in British Universities & Chinese Universities ten thil thar - technology projects atan an sum senso a tum sakah hian sipaiten nasa taka an chhawr țangkai theih tur thiamna awm leh zep tel ngeia ngaih leh rinhlelhna a awm mek tih a tar lang.
Daily Telegraph-in a tar lan dan chuan Huawei in zir bingna tur senso a tumsakah hian UK Universities a mithiam tam tak, scientific research paper 17 ah chuan technology thar "hman kawp theih" civil leh sipai te hman theih thiamna a awm thu a tar lang.
Hemi chungchang zir chiang leh finfiah tur hian Telegraph chuan mi thiam bik pathum a ruai a, thiamna thar lám an duan chhuahah chuan drones nena hriatna thlun zawm 'highly advanced image recognition' țha zet mai duan chhuah a ni a, hei hi enthlakna atan țha zet turah an ngai.
He thil puan chhuah hi coronavirus avanga China ram khawvel puma huat leh kawh rawn hlawh mek a awm chu hliah khuh tir tum mahse, an beisei ang ngawt chu a ni ta awzawng lo mai. Hong Kong enkawlna tur dan thar a duan leh tak avangin hliah a hnekin, mithiam zinga boruak kal laklawh chhem alh zualtu a ni ta zawk a.
Hong Kong a British Governor hnuhnung ber Chris Patten, China ram kuta Hong Kong hlan lai a mi chuan kar hmasa khan China Sorkarin Hong Kong enkawlna tur "New security law" a pawm thar leh barh luih a tum chu "Huangtau taka khawpui zalenna bawh chhiatna, dan palzutna, zalenna bulpui rahbehna a ni," a ti.
US Secretary of State Mike Pompeo pawhin Chinese Communist Party in khawvel puma a thil tum chu "chhiat vek huama thil tih" leh " zalenna ngainatute tih chhiat tumna" tiin Hong Kong tan new security law a pawm thar chu na taka a dem thu a sawi.
Expert te chuan UK University te hian an tum leh beisei ang ni hlek loin Huawei company in an thil zir bingna sum a tum sakah hian ram chhung himna ti derthawng thei tur leh he thiamna hi China ram defence programme in țangkai taka hman theih ngei tur anih rinhlelhna leh hlauhthawnna lian tak an nei.
Tom Tugendhat, MP Conservative party, Foreign Affairs Select Committee chairman chuan, " he zir chianna Daily Telegraph in a neih hi enghelh tur leh ngaimawh tur lian tak awm chu, China hian kan tualchhungah ngei kan mithiamte hmangin thiamna hmanga indona (Soft War) min lo puan khum reng mai a lo ni a, kan inven țhat hle a ngai a ni," a ti.
Huawei chuan hemi chungchang hi a pha nasa hle a,heng zir bingna hian military technology & artificial intelligence a keng tel lo a ti. Huawei hi private company anih thu sawiin " China Sorkar tan military research hi engti kawng mahin kan khawih lo, " tih company thu puangtu chuan a ti.
Amaherawhchu, expert te chuan Chinese Communist Party (CCP) 'military - civil fusion' policy kalpuina turin Huawei research sum sih chhuah hi thiam taka tla zep ngei niin an ngai.
" Military - civil fusion" policy hi kum 2017 a President Xi Jinping thu peka duan chhuah a ni a. Company, University ten an tana technology thar an duan chhuah eng pawh, sipai hman theih a ni tur a ni tih a ni.
Iain Duncan Smith, Tory party hruaitu chuan hetiang hian a sawi, " China hian a tum chu kum 2049 ah chuan khawvel ram dang zawng zawng te aia China ram chu sipai chakna, ralthuam chi tinrengah tu ram el rual loha khawvelah a chungnung lup tur a ni. He technology hi sumdawnna tluang pangngai anga an nei anih chuan thil dang atan pawh an hmang ngei ngei ang, " a ti.
[ investigation@telegraph.co.uk ]
Source :
Daily Telegraph
May 29, 2020
@ 9:00 PM GMT
===31==05==20===
- Huna Kawlvawm
Post a Comment
He post chungchanga i ngaihdan lo sawi ve rawh: