A 'mood' ah ka chêng thei mawlh si lo!

(An attempt to analyse oldies country music)

- K Remruatfela
Columnist, Explore Mizoram

Ka tleirawl chhuah tirh, High School ka'n rah chhoh lai kha chuan rock music _(a bikin slow rock)_ hi ka tuipui ber thin a. Nimahsela, tlêma ka lo lei kân deuh hnu hi chuan country music lam hian min âwn mah tawh zâwk a. Ka ngaihthlâk tam poh leh a lo thuk zia leh a lo ril zia ka hre fiah chho ta tial tial a. Tunah zet zawng country music lipuiah ka pil tan der tawh ni hian ka in hria a, a zûn lêng thâm vel te chuan min chiah zawrin, min fan hneh ta hle!

Lockdown 4.0 hman tan a nih dâwn khan heng oldies hla lungkuai tak tak te hi zan tin pakhat tê têa rawn seprawtui chhovin ka rawn kiu pui vawng vawng thin ang ka ti a. Nimahsela, a hun a lo thleng ta chêng a a, a mood ah ka chêng thei ta reng reng lova, a hul hian ka hul phak mai. A ni taka, a mood-a chêng ve veng veng tur chuan a hla thu mil ang zela a taka kan tawn ve zel hi a lo ngai a. Hla lungkuai lam feel tur phei chuan kan tawrh hmasak ve phawt a, kan duh tak leh kan thlâkhleh em em ten rilru na taka min siama, min kal san ve phawt hi a ngai! Chutihlai erawh chuan tun dinhmunah chutianga kan duh ngawih ngawihin na em ema min siam a, min han kalsan mai tur tu hi an awm mai bawk si lova. Awm tir tura han beiha han sual chiam chiam chi lah a ni si lo! A ngaihna thlâwt hre lovin ka khawl thluak nei chu ka ti thi leh ringawt mai thin.

A mood ah han chêng thei ila chuan country music khawvela sulsutu ropui bera ka chhâl, *Hank Williams Sr'* in a hmangaih em em, engkima a innghahnain a kalsan avanga a lungleng lutuk awm ngaihna dang hre tawh lo puak chhuakin _*'I'm so lone -some, I could cry'*_ ti-a thiam tak maia a han kiu chhoh vawng vawng dân te kha ka han luhchilh  ang a. A chhunzawmna ni pah fâwmin Country music khawvela ka duh tâwp theih loh, *Anne Murray* ngei maiin mawi em em a, a kawppui duh tak, a thlâkhleh em em chu a kianga awm char char tawh tura a sâwmna, _*'Could I have this dance for the rest of my life',*_ tih hla hmang ngei hian ka rawn chilh chhunzawm ang a, chuti chuan he thu lo chhiartu zawng zawngte chu, an hmangaih an chân lova, kumkhuaa an chén dun pui ngei theihna turin an kawppuite chu _Could I have this dance for the rest of my life_ ti-a chelh ve tlat turin ka chah lawm lawm bawk ang ka lo ti rilru a. Nimahsela, chu thuchah puang chhuak tur chuan a mood ah ka chêng thei thlâwt lo a ni.  

Han ti zel ila, a mood ah awm ila chuan Country khawvela aw mawi chuai thei lo, *Kenny Rogers'an* a hmangaih a chân avanga a tah hla, _*'Lucille',*_  tih hla lungkuai zet mai chu a tawrhna tawmpuiin kan han tahpui ve lawm lawm ang a. A thualna ni pah fâwmin, chul thei lo *Skeeter Davis* ngei maiin aw tliang mawi em ema, hmangaihna hla thu lungchhiat thlak zet, a taka tawng tawh chauh lo chuan an hriatthiampui ngai loh tur, _*End of the world,*_ tih hla ngei hmangin chu hmangaihna chu kan tahpui zâ tlâng ang kan tih laiin chutiang lam reng reng chu rilruah a awm thei hrih lova. A mood bera chên theih miau loh chuan in kar thei lah a ni bawk si lo!

Chutichuan han ti leh zel ila, hmangaihna hi tawrhna chauh a lo bik hlei nem tih tifiah turin Country singer aw ngaihnobei zet mai, *Emmylou Harris'in*, harsa ti taka a lo thlah fel tawh, dam chhung atana chân tawh nia a inngaih avanga lo lêt leh tur pawha a beisei ngam tawh loh, a theihngilh phal chuan si loh nena mak tak maia nun bul an han chhoh leh tâk mai avanga a lawmna luangliam, _*Together again,*_ tih hla mawi tak chu kan thlir ho ang a, chhiartu zawng zawngte nen suangtuahna khawvelah kan hlim ru veng veng tawh ang chu tiin duh thu ka han sâm thin kha a ni a. Nimahsela, a mood ah ber ka awm thei si lo! He hla hi rei tak kan lo hlat tawh, nimahsela, kan theihngilh theih si loh te nen zân chhawrthla êng hnuaia, Car tape Woofer ri thum tha taka han ngaihthlak dun dap dap atana hla duhawm tak a ni a, han ngaithla ve mah teh u, a mawiin thinlung a fan bik hliah hliah a ni.  Chumi zawhah a indawt tê tê in heng Country singer thiam tak tak - Johnny Cash, Merle Haggard, Jimmy Rodgers, John Denver, George Jones, Tanya Tucker, Dolly Parton, Pasts Cline, Loretta Lyn, Roy Orbison, Olivia Newton Jones etc hla te chipchiar takin kan rawn chhui chho zel ang ka han ti zet na a, tun dinhmunah chuan a mood ah ka chêng thei thlâwt si lova, a ngaihna pawh ka hre mai hrih lo!

Tichuan, chutiang zawng zawng zawh fel a nih hnuah chuan *Bob Dylan* hla chul thei lo, *Garth Brook*'an thiam taka a rawn kiu pui, *_To make you feel my love_*, tih hla in tlâng ka han kâwm ang a. _Van ruah sur ten i sakhmel mawina te hliah tuma an rawn nuai châng che chuan chu ruah sur chuan a nan tawp lo ang che; Kei, i kiangah ka ding reng dawn si a. Khawvel pumpui mai hian thiamloh chantir dâwn ta che se la, kei chu i hmaah ka ding ang a, ka tangah ka pawm bet tlat ang chia; duat takin ka kuah tlat reng ang che; ka hmangaihna che i hriat ve theih nan. Tichuan, tlai khaw thim kâra i vah vel dâwn te, zan si-ar êng ten i lung an tilenga an velh tah dawn che leh tumah i mittui hruk hul sak tu i neih dawn loh chuan i kiangah ka lo hnai ang a; kumkhuaa thlah leh ngai tawh lo turin ka lo kuah tlat ang che. Chutichuan, ka hmangaihna che hi i hriatthiam ve tawh ngei ka ring a ni (To make you feel my love)_, tiin hmangaihna thuchah kan infah tawn lawm lawm ang chu tiin beiseina nen duh thu ka han sâm vel kha a ni a, nimahsela, sawi tawh ang khân a mood-ah ka chêng thei mawlh si lo!!!