Mizo film thar 'Duhaisam'

Aizawl | May 30, 2020: Mizo Film thar 'Duhaisam' tlangzarh mai theih a peihfel tawh chu hripui leng vangin tlangzarh theih a ni ta lova, a film hming hi 'duhaisam' ni mahse, hringnun hi kan duhthusam ang vekin a kal si lova an ruahman leh duh hunah an tlangzarh thei ta bik lo a ni.



He Film, 'Ka duh che chuan a tawk'  vanga hriat hlawh Champhai tlangval Teddy Sailo leh a hmelthat vanga hriat hlawh Ruthy Chenkual te channa hi 2019 September thla atang khan siam turin inbuatsaih tan leh Script buaipui tan a ni.

'Duhaisam' Script  hi vawi eng emaw zat ennawn niin Story Board te dinin uluk taka vawi ruk chuang ennawn a nih hnu-ah November 2019 atanga shooting neih tan a ni.

an chan lai

He Film Duhaisam hi ZOTE Entertainment kutchhuak niin,  
Khalthang Arts leh Chamtea Grafix nen an thawk hova, Explore Mizoram chu official media partner a ni bawk.

Director, Producer leh Script ziaktu hi Mike (H Lalsangzela) niin, a ni hian Script ziah, director hna bakah  a changtupa thianpa angin a inlan bawk a ni.
Mike
Khalthang Arts neitu Lalnunsanga chu Director of Photography bakah Screenplay a khawih tel bak a, Film editing hi ama khawih vek a ni.


Lalnunsanga
Excutive Producer ah hian Chamtea Grafix niin, Khalthang Arts nen Camera lam an khawih dun. Thawhna vanga chhuak he film-ah hian Makeup hi Assy chhangte in khawihin Thrift Haul leh Tribal Super Store Champhai ten Custume lam buaipuiin Zambawihtei'n Film Cover a hak tur bik liau liau a Design sak bawk.


Chamtea Graphix
DUHAISAM hi Champhai leh Aizawl-ah thla hnih chhung shooting an nei a, zankhaw tairek thleng thlenga shoot chang leh tlaivar chang an ngah hle a ni.

He Film ah hian Action, Romance, Tragedy leh Funny (commedy) huamin, a fawnkim viau a. He film-ah hian Nula leh tlangval hna vanga tum loh deuha intawng, Hmangaihna kawng zawh a hun an hman chhoh dan leh an in hmangaihna par vul lai thliahsak tumtu avanga an nun a buai chhoh dan leh an inkara hmangaihna thawnthu tawp dan lungchhiatthlak tak kara beiseina eng de ve ve vanga an duhthusam tipuitling tura beiseina thar an neih dan tarlan a ni.



Duhaisam film siam dan chungchang sawiin director H Lalsangzela chuan, "He Film hi miin an en hun-ah thinlung leh tih takzet in en se ka duh a, a theih lai hian i hmangaih  chu i hmangaih thu hrilh la, in ngaithla tawnin, Hmangaihna hi a tawp dan a hlimawm vek lova, nimahsela a tam zawk chu keimah ni siam chawp harsatna a ni. Hei hi film in a en tir tum a ni a." a ti a. 


Film chan lai behbawm

"He film buatsaihnan hian tha leh zung nasa takin kan seng a, mite angin Budget leh Equipment kan nei tha lova, mahse kan phak chinah kan theihtawp tak meuh meuh kan chhuah a, a changtute leh kan thawhpuiten theih tawp min chhuahpui vang chauha puitlin thie kan ni. Engkimah hian min hruaitu krista ni suhsem kan tlawm ngei ang." a ti bawk.

He film-ah hian hmel thar  kan hmu nual dawn a, kan hmelhriat sa, mahse, film la Film lama kan la hmelhriat loh te an rawn in lan nual dawn a ni.

He Film ah hian Ruthy Chenkual chuan  Mamuanteii lem changin, Mamuanteii hi sumdawng lian/busineswomen niin 'ka mizia nen a in ang lo reuh lutuk a, ka tan chona tha tak a niin ka hria' tiin Ruthy hian a Character laktur chungchang a sawi.

A changtunu Ruthy Chenkual hi Mizo Model lar Emily Chenkual nau niin, advertisement  leh modeling lam a kan lo hmelhriat fo tawh mah nise film lamah erawh a vawi khat inlanna tur a ni.

A changtupa Teddy Sailo tia hriat lar, Lalruatdika hian Lalfakzuala lem a chang a. Lalfakzuala hi mipa rilru khauh ve tak,  a tum chu ti ngei thin mi leh a nem na lama nem tak leh hmangaihna ngah tak niin a ni pawh hi a taka a mizia nena inperh san lutuk mai lem a rawn chang dawn a ni.

OST (Orinial Sound Track) hi hla phuah thiam leh Zaithiam Faith Lalduatmawii phuah niin ani hian a thluk te nen vek hian a siam a, Mazuali K in a sa. Mazuali K  hi tunlaia zaithiam rawn lar chho leh mi ngaihven hlawh chho mek a ni a, he Film a a mood theih ang ber a shoot a nih a vangin OST Shooting nan pawh hian hun a duh hle a ni.




Mike tia kan hriat mai H Lalsangzela hian sawi tak ang khan he film a Director, Producer leh Script writer a nih bak ah a changtupa thianpa angin a inlan dawn a, Thudik kengtu leh thudik a lan chhuah theih nana mi pawimawh tak mai a rawn ni dawn a ni.

Tin, H Lalsangzela hian KIMKIM (Human Trafficking) movie script a ziak mek a, Hripui leng boruak zawh, Duhaisam film tlangzarh zawh-ah shooting tan nghal theih turin an inbuatsaih mek a ni.

Makeup khawihtu Assy Chhangte hi remruati lem changin Misual nu angin a inlan dawn a. Mi pahnih te inhmangaihna kar thu vaivir kual in, hmangaihna thawnthu vul lai chu a rawn tihtawp sak dawn a ni.

Claudya Hmingsangzuali chuan Zualtei lem changin, a changtunu thiannu ah a tang dawn a, Mamuanteiin harsatna leh mangan na a tawh laia engkima puitu leh tawiawmtu a rawn ni dawn a ni.  Claudya hi Mizo Youtuber viwers ngah pawl a ni.

Music leh Recordings hi RP Ralte (RP RECORDS) a neih niin ani hi Zai, leh Hla phuah leh Music engkim a kan thalai te kaihruaitu kan ti thei awm e.

Tun ah hian a Trailer tih chhuah tawh niin Official Trailer hi Minute 1:37 a sei a ni.




Duhaisam Film hi March 20, 2020 a vanapa hall a release tur a ruahman a ni a, mahse, hripui leng vangin mipui himna ngaipawimawhin an tlangzarh ta lova. hripuiin min kiansan hun leh mipui tam zawkin he film hmuhnawm zia an pawh theih hunah tlangzarh turin hun duhawm thlen hun an nghak ta rih a ni.

- H Zate
Founder/Editor
Explore Mizoram

EXPLORE MIZORAM
email: admin@exploremizoram.com
(A hnuaia fakna hi lo hmet ve rawh.)



Post a Comment

1 Comments

  1. Release tawh tho tho mai teh u....... En duh tawh hihi

    ReplyDelete

He post chungchanga i ngaihdan lo sawi ve rawh: