HE FIAMTHU HIAN KA NUIH A TI ZA TA LO

- James Ramdinmawia

"Matric Distinction leh First Division-a pass te chu Doctor leh Engineer (Technical) line-ah an kal a. First Division-a pass țhenkhat Civil Service lamah an kal a. Second Division-a pass ho State Sorkar-a hna awm thei ang angah an lut chho a. Third Division-a pass ho-in tihtur an nei ve ta si lo a, Politics an khel a, an aia pass țhate zawng zawng chunga thuneitu an ni daih asin," ti-a kan nuihpui băwk băwk țhin hi ka ngaihtuah chiang a, ka nuih a za ta lo.

Han ngaihtuah ve mah teh u, a zawng zawng chu ni lo mah se, he fiamthu hian thui takin a tak ram a pho lang tlat a ni. Hei vang hi a nih dawn hi hma kan sawn theih loh. A lehkha thiam thei lo lo leh thiamna sang tak nei lo ho thuneitu sangah an țhut zel chuan Socio-Political, Socio-Economic, Sustainable Livelihood, Entrepreneurial Development, Infrastructural Development, Eco-Friendly Development, Industrial Development, etc. lama kan harsatna leh hnufualna hi engtin nge an sutkian ang a, an chinfel theih tehlul ang?

Mithiam chu nei ve nual mah ila Political Party hrang hrang ațanga MLA Candidate ticket chan tum, Party-a Senior inti ho hi han bel chiang teh u. Thiamna bik nei lo, eng Subject maha Specialised lo, țawngkam thiam satliah an ni fur lo maw? An tum reng leh duh reng vang pawh ni lo-a Sorkar hna hmuh zawh loh vanga sumdawng, Contractor, ni ta mai mai, Party-a inhmang ta, Senior ve ta fu, MLA/Minister nih tum ve leh ringawt an ni fur em?

Ram hmasawnna tur leh retheihna umbo dan tur, tute titi tlangkam emaw ațanga an hriat, anmahni finna leh thiamna hrim hrim ațanga an ngaihtuah chhuah pawh ni lo, a zira an zir chhuah pawh ni lo, țawngkam thiamna hmanga an sawi chhàwn ve leh mai hmanga mipuite thluak su a, MLA/Minister ni ve leh mai țhinte hi kan ram țhanmawhbawk ber chu an lo ni mai lo maw? Chuta karah tihtak zet leh țhahnemngaihna tak tak nen hna an la thawk lo zui!

MLA țhenkhat chu an tuina ni miah lo, thiamna bik an neihna pawh ni lo Department-ah te Minister an han ni ve ngawt a, engtin nge hma min sawnpui tehlul ang? Mithiam leh Degree sang nei kher an ni tur a ni ka tihna pawh a ni chuang lo. An phak tawk tawkin Commitment pe sela, an Department chan leh a kaihnawih thil te zir chiang peih ve tal sela, tui sela, rim takin thawk bawk sela, mithiamte râwn taima sela, hmasawnna min thlen em em ang. Mithiam ni bawk si lo, tui bawk si lo, inzir belh tum bawk si lo, Party-a Senior avanga Minister ni ve ta mai kan nei fur țhin hi kan mu-tàn lianpui chu a ni. Chuvangin nang Politician, i inzir peih viau a, State dangte um phak hmasawnna min thlen thei dawn a nih loh chuan Party-a i senior avang ngawtin MLA/Minister nih tum ve ngawt suh, ram hmasawnna daltu, ram hmelma i ni hlauh dah ang e.

Nu leh pate pawh hi, kan fate'n Distinction leh First Division-ah Matric an pass dek dek a, an tui leh tui loh ngaihtuah miah lova Technical Course-a kaltir kan tum vek mai hi a dik lo. Central Service-a Mizo kan lut tlem ta lutuk te, kan Politics a nawi lutuk te hi hemi hrinchhuah vek hi a ni. Civil Service leh Politics lama kal tawk te pawh hi awm se a țha. 

Nu leh pate hian i ngaihtuah chiang teh ang u. Kan ram future hi kan fate kawngzawh tur kan thlan danah hian a innghat thui hle. Tun leh tunah kan ram Politics kalphung hi kan siamțha thut thei lo a nih pawhin kan fate Matric pass thar leh la zir mek, la zir turte future kan thlan danah hian ngunthluk taka ram leh hnam dinchhuahna ngaihtuah chunga thutlukna kan siam a ngai. Third Divisioner chauh lo deuh, Division sanga pass te pawh hi ram hruaitu ni tura kan chher a hun ta e!


Post a Comment

1 Comments

  1. A ni reng asin. Buai thlak tak a ni. A fawng chelhtu an buai chuan a dang kan buailo theilo

    ReplyDelete

He post chungchanga i ngaihdan lo sawi ve rawh: