BRITISH IN CHINA COMPANY HUAWEI 5G PE CHHUAK TURA REMNA A SIAMPUI TAWH A SUT DAWN

Aizawl | May 31, 2020: British Prime Minister Boris Johnson chuan China telecom company lian Huawei nen UK ram chhunga 5G network hman theihna tura inremna a lo siampui tawh chu COVID-19 hri pui len hnu hian an inremna thuthlung chu tih tawp a duh.

Hei hi rang taka tih tawp nghal rum rum hleih theih a ni bik lo. Kum 2023 ah chuan hemi chungchang a China nen inzawmna an neih te chu engmah lo (zero level) a dah thla turin Prime Minister hian official te a hriattir tawh tiin Daily Telegraph chuan a report. Hemi chungchang hi Huawei chuan engmah an la sawi zui ve lo.

British newspaper lar tak The Time in a report dan chuan Prime Minister Boris Johnson hian Sorkar hnathawk lian te hnenah Britain ramin China ram ațanga damdawi pawimawh leh bungrua leh thil dang a chawkluhte pawh tih tawp vek dan tur kawng zawng nghal turin a ti. Boris Johnson hi June thla hian G7 summit a tel turin US ah zin a tum a, hri pui len hnua a zin vawikhatna tur a ni ang.

G7 ram hruaitulû inhmuh khawmna atan hian President Donald Trump chuan Camp David a lo thlen a tum thu a sawi.

The Group of Seven (G7) ram te chu United States of America, Britain, Canada, France, Germany, Italy leh Japan ram te an ni. Britain, British, UK tih hi thil thu hmun a ni a, England Scotland, Wales, Northern Ireland te infin khawm an ni a, England tih hi chuan ram pathum dang te hi a huam ve lo thung. 

France ram President Emmanuel Macron chuan 'a hriselnain a phalsak chuan' Camp David ah hian kal ngei a tum tih a sawi. Angela Merkel, German Chancellor chuan 'thil lo thleng tur nghak phawt i la' a ti ve thung. Ram hruaitute hi tel kim ngei tura ngaih a ni.

"Boris Johnson chuan China ram nena inkungkaihna neih zel hi a hnial lem lo mahse 'Huawei deal' erawhchu hnuhkir hmak a duh thung. Official te hnenah Huawei company leh an ram inkungkaihna awm te chu a rang thei ang bera sat chata, ti tawp turin a hrilh tawh" tih Daily Telegraph chuan a sawi.

Kumin April thla tawp thleng khan Britain chuan Huawei company in 5G phone network pechhuak turin office, hmanrua etc  dahna tura in (buildings) neih pawh a la phalsak zel a ni.

Huawei company hi January 2020 khan UK chuan an ram chhung hmun pawimawh lo  ( non sensitive area) laiah

35% chin chiaha an inhnamhnawih ve a phalsak a ni.

United States erawh chuan Huawei company hi a hmu nikhua lo hle a, an hmanraw hmanah hian midangte leh thu ruk ngaihthlak theihna, chhinchhiahna hmanrua an bilh tel niin an ngai hmiah a, hemi avang hian an thu rualpui ramte chu Huawei nen inzarzawm lo tur leh an hmang lo turin a duh tih media report chuan a tar lang.

KAWNG DANG A DAP

Britain chuan Huawei nen an thawhdunna tur a ziktluak dawn tak loh avang hian inbiakpawhna lama China company Huawei siam hnuai chhiah ngei tur technology changtlung tak duan chhuah vat țul a ti a. Hemi ti thei tur hian democracy ramte intelkhawmna tur, a hming pawh D10 ( Democracies 10) a vuah fel der tawh a. Heng ram, Australia, Canada German, India, Italy, Japan te an ni. 

Source:

Daily Telegraph, The Time & Economic Times

===31==05==20====

- Huna Kawlvawm