ASSAM AṬANGIN ZIRLAI DANG!

Columnist, EXPLORE MIZORAM

Assam chuan case 4 neih belh leh tawhin, heng an hmuhchhuah thar 4 te hi Quarantine Facility aṭang vekin a ni. Tihian, he thu ziah lai thleng hian Assam a Covid-19 kai an hmuhchhuah tawh zat hi 214 zet a ni ta!

Assam Health Minister Himanta Biswa Sarma sawi dan chuan a kai hmuhchhuah thar 4 te hi Quantine Facility 3 aṭanga hmuhchhuah niin Sivasagar aṭangin 2, Lakhimpur leh Udalguri district lam aṭangin 1 ve ve an hmuchhuak a ni.

Hei aia luhaithlak ta zawk mah chu ni 5 chhung lekin a leh thawk an kai hman hi a ni! March ni 31 khan Silchar Medical College Hospital in Assam rama a hmasa ber turin Covid-19 kai an hmuchhuak a, a kai 100 hmuchhuak turin ni 48 zet duhin May ni 17 khan 100 an hmuchhuak tling chiah a. A hnulam ni 5 chhung hian case 114 zet an hmuchhuak zui ta thung!

A pumpui thuah mi 214 laiah hmuhchhuah ni tawh mahse mi 54 zet an ṭha tawha ngaia chhuah tir an nei hi tun dinhmunah chuan thu lawmawm tak a ni thei a, a lawmawm hlen dawn em tih erawh hunin a la hril ang. Mi 4 laiin an thihpui tawh a, state/ram dang mi an hmuhchhuah mahni hmun lama thawn let tâk mi 3 an awm bawk avangin tunah hian active case 153 an nei mek a ni.

Chutih rualin active case an neih zat hi sorkar in a hriatchian tawh, data a neih chin tihna a ni mai a. La hmuhchhuah si loh, active em em bawk si te pawh lo la awm ru ṭun thei a nih hre tel ta i la. Tin, dama ngaih vanga damdawi in lamin an chhuah tir tak mi 54 te pawh hi an dam chiang bal em tih chu hunin a la hril ang.

Assam sorkar hian ram pawn lama tangkhang te hi an hruai haw vat lo a nih chuan a hnu lama an state/sorkar buaina tizualtu leh sum eiral nasa zual theihzia an chian em avangin tangkhang hruai haw lamah ṭhahnem an ngai khawp mai a. Quarantine Facility aṭangin an in detect ta pheuh pheuh reng a. Mahse, hruai haw hi hmanhmawh lo ni se hei aia tam fe hian an kai phah thei a, tin an dinhmun hre turin tuna an hmuhchhuah tawh ho pawh hi an in test lo ve thei bawk.

 


Kan dep maia awm Assam case hi ni 5 chhunga a leh thawka a pun hman chuan, hei hi kan tan hei hi WARNING a ni!

- Tangkhang te hruai haw vat vat dan ngaihtuah te..
- Tangkhang lo haw apiang te himna tura Quarantine Facility him tura lo buatsaih lawk te..
- State border cross a rawn lut apiang te thlithlai zui theihna tura monitoring system mumal tak duan chhuah te.
- Mipui lam pawhin tualchhunga lockdown rules thlahdal a nih vang hian kan him ta tihna a nih lohzia kan chian thar a va ṭha tehlul em..

Fimkhur a ngaihna langsar tlem kan tarlan mai te hi insawiṭhaihna a ni lo a, hlauh, mangan leh chiai phah a ṭul lem lo. Ta se awm thei veng tur laka kan fimkhur a ngaihzia tarlanna mai a ni zawk e..

Hawh u, khawchhungah inkaihhruaina te chu lo thlahzal deuh mahse, Task Force te pawhin hrui hlipin chawlh lo la hlawm rih mahse, keini hi chuan fimkhur hi i bansan lo hran ang. Mask, kutsil leh midang hnaih loh hi vawng ṭhap ṭhap ni ila, Task Force duty ngai lo tur zawk tur khawp hial pawhin kan fimkhur thei tih a chiang reng mai si a.


May 22, 2020 | Kolasib






(A hnuaia fakna hi lo hmet ve rawh.)

Post a Comment

He post chungchanga i ngaihdan lo sawi ve rawh:

Previous Post Next Post