KAN THIL ṬHA TIH HI

~ VL Khawbung

Thlarau pawl tharna ka dawn em em vang pawh ni chuang lovin, vei deuh ka nei a. Sawilo thei lovin ka luang liam chu a ni ber e. I ngeng a lo chhun deuh a nih pawhin kan hla phuahtuin "a ṭhen thinlai nâ chu dam rawh se," a tih kha maw!

Coronavirus(Covid19) hripui lêng avangin ram pumah lock down kalpui a ni. Ni tina ei chawp zawngte tan chuan rin aiin a lo rei ta deuh nge ṭanpuitu kan zawng ruai tawh mai. Mi retheite tana pen chhuak pawh an pung zel a, a lawmawm ṭhin e. 

Inhmangaih tawnna ngawt lo chu tu ma eng mah ba suh u; mahni mihringpui hmangaihtu chuan dan chu a zawh famkim tawh si a. - Rom. 13:8

Kan thu laimu ber kan luh hmain kan Bible in retheite a lo ngaih pawimawh zia hi sakhi ram fan ang deuhin i han fang thuak thuak teh ang. Deuteronomi. 26:12-13 ah chuan, Pathianin sawma pakhat hi ama hnenah chauh ni lovin hmeithai leh pa neilo te hnena pe a, hmangaih turin min phut a, min fuih bawk.

Tin, Thufingte. 19:17 "Rethei khawngaih hi Lalpa hnena thil puk tir ang a ni, i thiltih ang chu a rul leh ngei ang che," tiin, min hrilh bawk. II Samuel. 9:1-9 kan chhiar chuan, Lal Davida'n a mah thah tumtu, a hmelmapa Lal Saula tupa Mefiboseth-a ke bai chu hmangaih leh duat takin a Lal Inah hruai kir lehin, Lal dawhkan a kiltir a, a pu ro zawng zawng a pe let leh vek tih kan hmu a ni. Mi hnuai hnung ber ke bai khan hmangaihna avangin Lal dawhkan a kil a nih chu! A van ropui em.

Tin, Galatia 2:10 ah chuan "Retheite kan hriat reng chauh an duh, chu tak chu tih kan tum tlat a ni." tih thu kan hmu. Tirhko Paula hian Chanchinṭha (gospel) chauh ni lovin, riangvaite hnena chanchinṭha(mission to the poor) hi a van ngai pawimawh tak em. Tirhkote thiltih leh Korinth ziakahte pawh hian rethei leh riangvaite hmangaihna thu hi vawi tam tak a ziak a ni. 

Tin, Isai 61:1 thu kan chhiar chuan riangvaite a hmangaihzia kan hmu bawk. Amos a lehkhabu kan chhiar chuan, "Aw Israel Gilgal leh bethel ah pawh kal suh ula, rethei leh pa neilo te chung thu fel takin rel ang che u," tih thu kan hmu. Kan Pathian hian miretheite hi a van ngaihtuah tak em! Mi ṭhenkhatin mirethei leh harsate an dinhmun, an harsatna, a chhan leh avang pawh hre hauh si lova hmusit leh diriam deuh ti tiha kan sawi ṭhin hi chu "chanchinṭha iptepui banna, Lalpa zawn chhuah ram a cheng kan ni," ti tute sawiah chuan a mawi lo deuh ṭhin mange!

Ka sawi duh ber zawk erawh chu tunlai, kohran, pawl hrang hrang leh khawtlangin thil kan tih a piang mi dang hriat loh hlaua Social Media leh TV lama kan vawrhdarh chiam ṭhin hi chu a zia lo deuh. Sorkar leh Politician ho hi chuan an duh ang thalin lo vawrhdarh sela, KṬP, ṬKP leh Kohhran etc. hi chuan kan Pathian mit hmuha chauh hian thilṭha ti ṭhin ila, kan Lal Isua hi a van lawm dawn em.

Mathaia. 6:1ah chuan "In thil ṭha tihte mi hmuh atân, mihring mit hmuha ti lo turin fimkhur rawh u; chuti lo chuan, in Pa vâna mi hnenah chuan lawmman in nei lovang" a ti daih. 

Thil ṭha tih hi ning lo ila, ti zel ang u. Mahse, chung lam nen inzawmin thil ṭha i ti ṭhin ang u. Chuti lo zawngin Vana kan lawmman tur hi he leiah hian kan seng zo vek ang tih a hlauhawm a ni.