SMOKIE

- C Lalṭhazuala (Bematuale)
Columnist
Explore Mizoram

Zofaten ral hla tak aṭanga kan lo ngainat leh duh ve em em leh kan rilrem zawng,an rimawi kalphung leh an zaipuipa(vocalist) Chris Norman-a aw ṭial mawi tak mai leh lunglenthlak tak mai, thlang sappui hovin "gravel voice" an tih ang aw tham ṭeng, ro deuh bawk si, tham mawi tak mai, mizorama romei zam riai te, tlangram zingzum mawi takte leh luiruam thuk tak takte,tlang dung chjim leh hmar zawnga inkhawh tlang per pur te, thingtin par ten an chawi vel zoram nen inhmeh tur hla hi Chris Norman leh a sangawizawnpuite-Smokie tia khawvelin a hriat lar te hian an phuah ta mai bik emaw tih mai awl tak a ni.

 A hunlaia mizo ṭhalaite duhrawn, Bradford,Yorkshire khawthlang lam khawpui pum chhuak Smokie band te hi a hunlai chuan Europe khawmualpui bikah phei chuan an lar vet vet teh a sin.

 Smokey ho lo hlawhtlin chhoh dan kalkawng hi a chhukchho vein a thui ve phian a sin.

Kum 1963-ah Ron kelly leh Alan Silson te ṭhiandun chuan Moore's Music Shop, North Parade, Bradford-ah rock band "The Yen" an din dun ta a ni, a nikhatna chu.

"The Yen" an din hnu nihnihnaah hla te han zirhova han zaiho tura an inhmuh lehnaah Christ Norman chu a rawn telve a, bass guitar perh tu tur a perh ṭhang sa an mamawh ta a ni.

Bass guitar perh tur a tiṭhang sa melh ru reng chung chuan an ṭhian thum chuan hla an zir ho chho ta reng a.

Chutah le! Bass guitar perh tur a lo lang ta.Bassist turin Terry Uttley chuan kum 1965 ah khan anni ṭhian thum chu rawn zawm vein pali an lo ni ta. Tichuan, mipui hmaah a vawikhat nan, Birkenshaw schoolah kum 1965 february thlaah an inlan ve ṭan ta.

 The Yen group member te chuan hetiang hian mawhphurhna an insem ta a ni. Chris Norman(lead vocals/rhythm guitar), Terry Uttley(bass/vocals), Alan Silson(lead guitar/vocal) leh Ron Kelly(drums).

An band hming The Yen tih chu "The Sphynx"in an thlak a, chumi hnu reiloteah "Essence"tiin an thlak leh a ni. Hming an thlak zing ve hle mai hun tir lamah chuan.

Bradford khawpui chhunga club tenau deuhah te chuan mumal takin an zaikual ve ṭan ta a.Bradford khaw chheh velah te pawh an zaikual ve ṭhin bawk a. Amaherawh chu hmalam panin an kal ve bek bek emaw tih lai chuan "The Sphinx"ho chu a kehdarh leh ta mai a.

Chutih laia Yorkshire bial vela band chang tlung lwh mite hriathlawh sa "The blackcats" chu an drummer  Ron Kelly chuan a zawm a, an guitarist Alan Silson pawh chuan Blackcats ho chu a zawm ve ta bawk nen, blackcat vocalist leh an guitarist Peter Eastwood te nen an thawkho ta thung, chu chu kum 1966-ah a ni.reiloteah blackcats member hlun zawk Peter Eastwood chuan a blackcats chu a bansan leh lawi si a. An chhuahsan tawh "The Essence" a  an zaipuipa ṭhin, an ṭhian hlui leh thawhpui hlui Christ Norman bawk chuan a rawn zawm ve leh ta thung a.Kum 1967-ah "The Blackcats"tih chu, "The Four Corners"tiin an thlak leh ta a.

April 1968-ah  manager atan Mark Jordan an la ta a. Mark Jordan thurawn angin an band hming chu "The Elizabethans" tiin an thlak leh ta a, an zaikual tam ve ta bawk nen mite hriat pawh an hlawh chho ve ṭan ta a.Yorkshire bialah chuan hriat an hlawh chho ve ṭan ta. Miten zai tur a an sawmna man pawh a sang chho ve ṭan ta.

Hun hmasa lam a an thawhpui, an ṭhianpa- "The Yen", "The Sphinx", "The Essence" vela an thawhpui Terry Utley chuan Blackcats bassist Arthur Higgins chu a rawn thlak ve leh ta bawk a.Higgins hian zirna sang zawk kal chhunzawm a duh avangin Blackcats bassist a nihna hi a bansan a ni.

December ni 9, 1968-ah Yorkshire Telivision programme,-"News and Magazine Show-ah an inlan ve phak ta.

Kum 1969 vekah khawvel huap Tv programme lar ve thawkhat tak, BBC Show, "High Jinx" a an inlan chu a hlawhtling thawkhatin anmahni ngei pawn an hlawkpui hle a.Yorkshire bial chauh a band hriat hlawh chu England pumah mite hriat an hlawh phahna rahbi pawimawh a rawn ni ta a ni. An Manager  Mark Jordan chuan he programme an neih avang hian an zaite(demo)recording company a thawn theihna remchang a neih phah a ni.

Tichuan RCA Records chuan an hla pahnih record sak chu a remti ta a.RCA records lam hian an band hming chu "Kindness"tiin an lo thlaksak leh ta a..April ni 3, 1970 kumah hla pahnih-light of love tih leh Lindy low-Single chu RCA records chuan "Kindness band"ang chuan a tlangzarh sak ta a ni. Hmalam panin an kal chho ve bek bek zel e.

Chumi hnu deuh lawkah, "my desire" tih chu single a tih chhuah leh a ni a. 

Amaherawh chu an contract ziahdan chungchang leh a hralh chhuah thu a a buaipuitute inkara intihbuaina neuh neuh avangin heng single an tihchhuah te hi engruai an nihpui ta lova.tilar tur la hmalak zuina lah a awm hek lo, a zuzi chho leh ta rih a ni.

Chutianga hlawhtlin tuma rimawi lamtluang bumboh tak an zawh chhoh mek lai chuan band member te zingah innghirnghona leh inmawhchhiatna te pawh a chhuak ve fo bawk a ni.

Chutia an single tihchhuah ve te hralhchhuah theih mang lova a buaipuitute zinga intihbuaina a chhuah bawksi avang chuan band member te tan pawh beidawn chang chu a awm ve ngei ang.Amaherawh chu chutiang harsatna karah chuan rimawi khawvel lama tawnhriat neiṭha leh co-producer leh musician nibawk a rawn inlar ta.

Steve Rowland hian anni ṭhianho zai chu club lamah a lo thlirin a lo hmelhriat tawh sa a. An hla produce(tihchhuah)sak duhna a lo nei sa tawh hrim hrim a ni.Rimawi lamtluang an zawh mek chu tawpsan mai lova, an zawh chhunzawm zelna tur chhan ṭha zawk a rawn inchhawp chhuak ve zel bawk a.

Steve Rowland hian a ṭhianpa Family dog band a a lo thawhpui ṭhin- Albert Hammond chu hlaphuah tura ngenin, Band hming thlak zing tawh tak Chris Norman leh a ṭhiante band "Kindness" chuan Steve Rowland ṭhianpa hlaphuah chu an sa dawn ta a ni.

Albert Hammond chuan "It never rains in southern California" tih hla chu a phuah ta a, Kindness ho chuan an han zir ta tlat tlat a an zir thiam ta hle tihah record tura an inbuatsaih laiin, Albert Hammond chuan a ma sak atan a duh zawk ta tlat mai a, Kindness ho chu a pe phal leh ta lo, Kindness drumer, lo zir thiam tawh sa chu hmangin a man a record leh ta daih a..amaherawh chu Kindness ho sak tur hla "You ring a bell" tih leh "Have you met Angela" tih chu a phuah thova, he hla pahnih hi studioah kindness te chuan an record ta a ni.Amaherawh chu heng an hla record hi Hammond leh Rowland te inremsiamna(contract)thil-ah inrem theihlohna an neih avangin producer Rowland chuan a tlangzarh/produce thei ta lo a ni.

   Chris Norman leh a ṭhiante- "The kindness" hokhawmtu tur chu midang an rawn inlar leh ta. "BBC Radio One " programme DJ(Dish Joker) Dave Eagera'n Kindness manager mawhphurhna chu a rawn la ve leh ta. An manager thar hi BBC Radio lama programme lar tak hosttu, hriat hlawh ve tak a ni a Christ Norman leh a ṭhiante tan pawh a ṭangkai ngei ang, hmatiang an sawn chho zel e.

Dave Eagera'n manager mawhphurhna a rawn lak aṭanga reiloteah Chris Norman chuan hrawk natna khirh tak mai a nei ta thut mai a, nasataka inenkawlin hun engemawti chhung chu a ṭhiante ṭawiawm thei lovin a awm a, doctor enkawl ngaiin a awm ta reng a.Doctor ten a sapṭawng takin a hrawkah "infection" khirhkhan tak a awm an ti a ni.

Vanneihthlak takin chris Norman hrawk lam natna chu a rawn ṭha chho ve leh ta mai a.  Amaherawh chu a dam leh hnu chuan a aw rawl chu a dang ta daih mai a. A dam leh hnua a aw rawl  chu- aw ro leh aw hriam, ṭeng ṭial, Chak tho si, a ni ta tlat mai a,.amaherawh chu a ṭhiante lawmah a tla a, a ṭhiante ngaihdanah chuan Norman aw thar chuan an music kalphung a tihropui zual a, an sound hman ṭhinte.a tichangtlung ta hlauh zawk niah an ngai a.an lawm zawk hle a ni.

An manager thar "Dave Eager, "BBC Radio One"  hosttu lar sa, Radio DJ hriathlawh tak chu an chhawr ṭangkai dawn hle niin a lang.

Dave Eager chuan  the kindness ho zai, demo te zuk pein chu chuan nghawng ṭha tak mai a nei ta a. Kum 1972 chuan an single hmasaber- oh Julie/love you Corolina tih chu tih chhuah a nive ta nge nge a.chumi hnu reiloteah single "Let the good times roll" tih chuan an han chhu zui leh nghal zat bawk a. Let the good times roll(single)chuan mite hriat a hlawh ve ta phian mai.an manager Dave Eadger chuan a programme-BBC Radio One programme bulṭanna hlaah a hmang bawk a, chu chuan he hla hi a tilar leh zual bawk a ni.amaherawh chu a lar ve satliah a ni ber a, chu a larna chuan bazzar lama a copy hralh tam lamah nghawng a ṭha zawngin a nei lem lo.a mak viau a ni.An hlawhtling tak takni a la herchhuak chiangkuang thei rih chuang lo a ni.

"Let the good times roll" single tih chhuah hnu lawkah   DECCA Records chuan Single " make it better"/"lonely long lady" chu an tihchhuah sak leh a, amaherawh chu he single hi a hlawhtlin loh em avangin  Decca records chuan "The Kindness" ho nena an contract chu a tih tawp sak leh ta a ni..Chris Norman leh a sangawi zawnpuite tan chuan a beidawnthlakin a lungchhiatthlak ve khawp ang.

An  manager  Dave Eager hi pa vengva tak mai a ni a.Decca records a contract an neih lai daih khan Khawvel  rimawi lama Agencies pakat, Manchester khawpui lama inbun, "Kennedy Street Enterprise" chu a lo be pawp reng tawh a, he agencies kaltlang hian "Peter Noone"(Peter Blair Denis  Bernard Noone), Rimawi khawvela mi hlawhtling tawp khawk, 1960s Chho aṭanga hlawhtling chho tawh, pop group hlawhtling-"Herman's Hermit" tih a an khaipa leh  musician leh hlaphuahthiam ropui nibawk chuan a tourna vela hruaikual tur, a concert hawngtu tur  band a mamawh thu te zuk hriain, Single te pawh tichhuak ve tawh   band- Kindness ho chu Peter Noone chenna-  " Denham,"   Buckinghamshireah  an zuk inlan ve leh ta rih a,.Auditionah an zuk inlan ve leh ta a ni.

Peter Noone hian Kindness ho hi a thawhpui atan a lo pawm ta nghe nghe a, A ṭul changa Peter Noone a hla hrang hrang concertnaa rem ve maithei turin train a ni tel bawk a ni. 

kum 1960 chho vela, British songwriter, theatre actor ,musician, lar sa concert tourna a concert hawngtu band angin hlawh pawh nei lem lovin England bikah an han zinkual leh rih a. Rimawi khawvel a band thar lam zawk, intihlar tum ten band lar sa leh hlawhtling te concert tour zui a platform awm sa a,  concert hawngtu ang a kal kual vel hi thil lar tak leh thil tih ṭhin pangngai leh tihdan phung pakhat ve  rimawi khawvel industryah hian a ni ve hrim hrim bawk a ni.

Peter Noone te ang 1960 Chho vel aṭanga lar tawh, rimawi khawvel leh lemchan khawvel a hriat hlawh concertna hawngtu band han nih chu hlawkna chu a awm na ngiang mai.England pumah mi tam tak hmaa inlanna hun ṭha an neih theih nan a hlu em em a chu chu a ni deuh ber reng a ni an ni ṭhianho pawhin an tum ber chu Peter Noone hnen aṭang hian pawisa emaw hlawkna dang langsar tak,  chawp leh chilhin an hmu nghal hran lo.Tin, Peter Noone hian heng band tharlam tak, Chris Norman leh a ṭhiante tan hian an hmalam hun tur a ngaihtuahpui hran bawk lo.Peter Noone Concert an ṭawiawm kual vel lai hian tour managerah Bill Hurley an hmang nghe nghe a ni.

Peter Noone te nen a England ram chhung hmun tam taka an tour ho laia an tour manager Bill Hurley hi rimawi lama tawnhriat ngah leh amah ngei pawh band hrang hranga lo telve tawh ṭhin a ni a. Recording industry lamah te pawh lo thawk tawh a ni a. A ni hian ngaihdan nghet tak nen a music kalphung nei mek Chris Normana leh a ṭhian te chu a kailawn an la zawh fuhloh avanga la lar chhuaklo mai maiah a ngai nghet hmiah mai a. Christ Normana aw mawi dangdai zia chu khawvel mipui hriata phochhuah a chak a, a kawng dap a duh a ni.

Peter Noone a te nena "The Kindness"ho  inremsiamna(contract)an manager Dave Edger te nen a an lo siam tawh aṭanga inhnukdawk daih turin Bill Hurley chuan Edger chu a thlem thlu thei ta a, chu chu rang zawka heng tleirawl ho talent phochhuah nan a ṭul riauva a hriat vang a ni.Peter Noone a hnung an zui reng chuan an khawtlai mai mai dawn niin Bill hian a hria a ni.

Bill Hurley chuan the kindness band chu chung hunlaia hlaphuahthiam hmingthang tak "Nicky Chinn" leh Mike Chapman te nen chuan a inhmelhriattir ta nghal thuai reng a, an ni hlaphuahthiam pahnih hian a hunlai a khawvel hla lar tak tak Glam rock behchhanin an phuah a, an hlaphuah hlawhtlinpuitute zingah pawh a hunlaia British hmeichhe zaithiam lar ber te zinga mi Suzi Quatro pawh a telve reng a ni. Suzi Quatro hian an hlaphuahte  sain, British chart ah te kaipuiin  a lo hlawtlinpui tawh ṭhin a, Suzi hla lar leh hlawhtlinpui ber ber phuahtute an ni a ni.

Mahse, Chinn leh Chapman ten Kindness ho zai an demo a mi te an han ngaihthlak chuan bill hurley tuipui ang chuan an tuipui ta hauhlo mai a. Bill angin chung khawvel rimawia miril pahnihte chuan Chris Norman  aw ṭeng ṭial mawi tak mai chu a mawina an varpawh ve thei ta tlat lo mai a. Chinn phei chuan kindness band te chu a hlaphuah saktir chu a phal lo angreng ta hle mai tih a hmelah hai theih a ni ta lo.

Mahse.....Bill Hurley chu titithiam leh mi hneh theihna mak tak nei a nihna chu thuhran, a thilsawi a va sawina hnena miten an awih theihna turin rimawi lama tawnhriat ngah tak a lo nive hrim hrim bawk nen, hlaphuahthiam Chinn chu bill  chuan a rilru a thlaktir thei ta nge nge a,tichuan Chinn  leh Mike Chapman hlaphuah dun te chu The Kindness hote chuan bill hurley mi hnehtheihna mak tak zarah an sa thei dawn ta a ni.Hmatiang sawnin hma lam an pan zel e.

Producer Bill Hurley, hlaphuahthiam,musician leh producer ,Nicky chinn leh Mike Chapman te chu The Kindness te nen an thawkho dawn ta.

Thawhhona thuthlung(contract)te an han ziah fel hnu chuan an band hming Kindness chu "SMOKEY" tiin an thlak ta a, Chinn leh Mike Chapman duhdan chuan an hlaphuah lo hlawhtlinpuia khawvel zaithiam lar dinhmuna lo inhlanpuitu Suzi Quatro thawmhnaw inbel ang, Leather Jacket leh leather kekawr tluan inbel ve vek turin Smokey member te hi an duh a, amaherawh chu Suzi Quatro thuamhnaw inbel ang diak diak a inbel tir vek kher chu an tilui ta lova, a hmaa an chin ṭhan Jeans kekawr hak chu an chhunzawm zel ta zawk a ni.

Kum 1974 a rawn her chhuak, Smokey band te chuan rimawi hmanrua(Music Instruments)te an lei thar ta sauh sauh mai le.

Kum 1974 kum tawp lamah chuan an album hmasa ber tur "Pass it Around"  tih chu ngawrh takin an buaipui ṭan ta a, Recording studio chhungah an hun tam ber an hmang ta. Kum 1975 ah he album hi an tlangzarh a.album an tlangzarh hma hian a album hmingputu "Pass it over" tih hi single a tih chhuah a ni a. Amaherawh chu an beisei ang an phak talo, Pass it over Album leh single hian mite hriat a hlawh phak ta lo.

Ka tum nge ruh sa ruh tih ang deuh a ni e. Chris Norman leh a ṭhiante chu tumruhna chuan a nawr kal zel tho.An beidawng chuang lo.

Chutah le hlawhtlinna ar a rawn khuang dawn ta.

Kum 1975 september ni 22 ah an album pahnihna "Changing all the time" chu tichhuakin, Chu Album a hla pakhat- "if you think you know how to love me" tih chu single a tihchhuah a ni a. He hla hian Europe khawmualpuia ram zawng zawngah chart an kai rual ta ṭhup mai a nih chu, German, Denmark leh Norwayah te chart-ah a awm rei zual bik a ni. United kingdom, Smokey ho ramah ngei chuan he hla hian no-3 a han thleng a ni.

An tumruhna te, an thawhrimnate, chuan a tawp a tawpah chuan par a rawn chhuang ta luah mai le.

Smokey Band chu international band dinhmunah an rawn ding ta. Khawvel Radio station zawng zawng leh Tv Stationah Chris Norman aw ṭeng ṭial rang mawi tak, a ti pa  tawk vela ro deuh ṭiat, aw khauh leh chak, hriam tak ni bawk si chu tihchhuah a ni ta  chuah chuah mai le.

Khawvel  Radio station zawng zawngin intihhmuh niawm taka Chris Norman zai an play noh noh lai chuan, "Don't play your rock N roll to me" hla(single) chu 

 an han tichhuak leh ta a..he hla hi a bik takin  europe khawmuapuiah a lar hle a ni.  Amahreawh chu  chart lamah a thleng sang lem lo.

Smokey ho hlawhtlinna leh a indawt a khawvel tuipui phak hla ṭha leh mawi tak tak an tihchhuah chhoh nawn chhoh zawt zawt lai chuan, rimawi khawvel  huanga anni aia kawng lo zawh hmasa, senior zawk, hlawhtlinna lamah pawh khawvel tehfunga teh a lo hlawhtlinna rei tawh zawk, American R&B singer, Smokey Robinson(William "Smokey" Robinson Jr) chuan  bradford pum chhuak Smokey band ho chu a hming ang hming an rawn put ve/trademark a an rawn put ve avanga  thlirtu mipui lamah buaina a thlen thu leh a sumdawnna a tihbuai theih avanga courta khinah a rawn  a rawn vau ta riap mai le. 

Smokey Robinson, American Singer lar leh hlawhtling, producer lar tak nibawk, kumn1987 a Rock N roll hall of fame a lak luh, Khawvel music huanga a thawhhlawk em avanga chawimawina zahawm " A  library of Congress Gershwin Prize hial pawh dawng tawh hial, rimawi khawvela miropui chuan Smokey ho chu a rawn er pha ta hial mai. Smokey ho chu an va ropui ta em.

Smokey ho rimawi zinkawng han chhui letin an band hming pawh an thlak zing chho ve malh malh hle a. An rimawi zinkawng pawh a chhuk chho na rawh e. 

Thubuai  hla buai neih ai chuan tiin American  singers ropui Smokey Robinsona'n lawsuit file tuma a rawn vauna chu pumpelh turin an band hming tawp lam chu,"key" ti lovin, "kie" an ti ta zawk a ni. Tichuan Smokey chu Smokie a lo ni ta a ni.

An album pahnihna hlawhtling taka an tlangzarh hnuah concert tour an nei chhunzawm nghal zat a. An hla lar ho phuahtu leh an Album producer ni bawk Chinn chuan an album pathumna anga sawi theih, amaherawh chu "Changing all the time" album a hla ho tho te leh hla thar ṭhenkhat dah telna "Midnight cafe"" chu United statesah ah a tlangzarh leh ta bawk a.

"Something's been making me blue" "wild wild angel" tih te leh "I 'll meet you at midnight" tih hla te, chu a lar chho ta miah miahin album hralh lai tikaltu ber anni a. "Living next door to Alice" tih hla,kum 1960 lai vel daih tawh a Australian pop band pakhat "New World" ho lo sak tawh chu rawn sa thar ve lehin, kum 1975-ah singlein an han  tichhuak zet chu UK-ah no-5 kai chhovin,  chu single hlawhtling tak chu "Lay back in the arms of someone" single-in an han chhu zui leh nghal zat bawk a. Smokey band larna chu a kaltluang ta par par hle mai.

Europe khawmualpuiah phei chuan Superstar ṭhuthlengah group memberte an ṭhu phak ta.

Album hralh chhuah chungchangah lah an invawrh sang ta, album copy maktaduaih tel hralh chhuak tawhin europe khawmualpuia ram hausa leh changkang hova an tour kualna aṭanga an pawisa lakluh pawh a tam ta bawk si. Media luahtu an lo tling pha ta, europe ṭhalaite  band ngaihven ber anni chho ta. Chumai a nilo, khawvel ṭhalai te bengkhawn leh  ngaihven  band an lo ni ta.

Kum 1977-ah Bright light & back Alleys chu an tlangzarh leh ta a. A hlawhtlinna a kal mar laklawh a a hlawhtling leh phian tho mai. Kum 1978-ah  "The Montreux" album chu an tichhuak leh ta bawk a. He album pawh hi a hlawhtling thawkhat hle bawk.

 "From the Bright lights & back Alleys" Album aṭanga single a an tihchhuah, raggae music rawngkai- "It's your life" tih leh,..Midang hla an sak sak, "Needles and pin" tih chuan chart an kai leh bawk a ni.

Smokie band te hlawhtlinnain a vawrtawp a thlen mek lai tak chuan an hla lar leh hlawhtling em em bik ho te phuahtu Chinn leh Mike Chapman te chuan an hlaphuah nalh dangdai tak mai- "Stumblin' in " tih chu chutih hun vel lai taka british hmeichhe zaithiam lar ber te zinga mi, Chinn leh Chapman te hlaphuah lo larpuitu- "Suzi Quatro" nen chuan, Christ Norman chu an han sak dun tir ta a. Sapram lama producer larte hi hetianga music lama miril leh thil tih awm tak ngaihtuah chhuak thiam, musician leh music arrangement lam thiam, talent nei ṭha bik an lo ni bawk reng a.Chris Norman leh Suzi Quatro an han zai dun tir hi chu fuh chikimin a fuh a ni ber e.

"Stumblin' in" tih hla single a tih chhuah chuan Europe khawmualpuia ram awm zawng zawng leh khawvel a deng chhuak chiang hle mai.

United kingdomah lar viauin chartah te an hla lang fo mahse, Europe khawmualpuia band lar ber pawl tlingpha mahse America khawmualpui lama an lar danin a vawrtawp a thleng pha ve lo a, US a an album tlangzarh "Midnight cafe" pawh khan America a al phak vak lo a ni ber.

"Stumblin'In" tih hla zet chuan North  America ram lian pahnih, United States leh Canada a nghawr ve phak ta tlat mai.Smokie band hlawhtlinna chu a zuang sang chho zel e.

An hla lar ve tak tak, Uk leh Europe ram zawng zawnga.chart kai te ngei pawn chart an kai ve ngailohna USA-ah chuan "Stumblin' in"chu top tenah a lang ve ta vang mai le. thil mak ve leh deuh mai chu US chart a top ten a a lan phak daih laiin UK-ah erawh chuan, Smokey ho ramah chuan number 41 a ni thung.

Stumblin'In hnu lawkah Chris Norman leh Smokie band drummer  Spencer hlaphuah dun " Mexican girl" tih hla single a tihchhuah chuan UK chartah no-45 a rawn hauh phak ve ta a.an hlaphuahthiam  Chinn leh Chapman tellova  an hlaphuah ve a hlawhtling ve viau mai chu band member te tan a lawmawm khawp ang. "Mexican girl" chu khawvel hla lar, Radio a tihchhuah hlawh ber te zingah a rawn tel pha ta tlat mai.

Hetitak maia  Chris Norman leh Spencer hlaphuah a lar ve ta mai leh a hlawhtling ve ta mai hian  Smokie band memberte hlaphuah lamah inrintawkna leh kan tive thei tih lam rilru a puttir lian ta hle mai a.

Smokey album a hla lar zawng zawng phuahtute, a producer ni bawk- Chinn leh Mike Chapman te, Smokie album hralh chhuah aṭanga pawisa(royalty)tamtak lo hui ve ṭhintute tel lova an talent leh an theihna te han enchhin  anmahni irawm a hla an phuah ngei te an album a dah duhna te an rawn nei chho ta hial a. a awm pawh a awm ve reng e, Chinn leh Chapman tel lova an hlaphuah a hlawhtling ve bawk tho si a ni.

Chu a chhapah heng hunlaia British football star lar tak, zaithiam nibawk, "Kevin Keegan' sak tur hla pakhat " head over heels in love"tih chu Chris Norman leh Spencera'n phuah sakin, Kevin Keegan  singles hmasa ber chu Chris Norman leh Spencer chuan an produce sak nghe nghe a, UK chart-ah no-31 a tling phak a ni. Heng hlawhtlinna te hian Chris Norman leh Spencer te hlaphuah lama inrintawkna a siam sak nasa hle bawk a ni.

Kum 1979 chu a rawn her chhuak ta, Chinn leh Chapman hlaphuah nilo, Norman leh Spencer a hlaphuah ten UK chart an kai ve tlat mai bawk si.

 Mihring-tupawh mai hi kawng hrang hrang a mite chungen phah tham khawpa a han hlawhtlin hian mahni inrintawknate, thil tive theia inngaihna te rilru chhungrilah a rawn piang ve nghal a.  Smokie member ho te pawh hi chu mihring rilru ngei chuan Bill Hurley vanga an hmelhriat hlaphuahthiam leh producer lar Nicky Chinn leh Mike Chapman tellova za ah za a, an ngaihdan leh duhdan ang a kal hran duhna a rawn neih tir ta nge nge a, Chin leh Chapman laka inthiarfihlim zai an rel ta nge nge a ni.

Tichuan Chinn leh Chapman te tel lovin "The other side of the road(1979)chu buatsaih tur chuan tuipui thui tak thlawh khumin Autralia lam an pan ta.He album hi Australia a record vek a ni a. "Do to me" tih leh "Baby It's up to you" tih chu single a tih chhuah a ni bawk a,amaherawh chu he album leh single te hian a hmalama mite a tluk phak ta lo. Album hralhchhuah lamah a tlahniam ta.a hma a khawvel nghawrnghing tham album leh single, Chinn leh Chapman te nena an lo siam ho kha an phak ta lo tlat mai le.

Hlaphuahthiam, an thawhpui, an producer,-Chinn leh Mike Chapman te tel lova anmahni irawm ngeia an ziah hla leh midang thurawn tel miah lova an hlaphuah han sak leh a remna rimawi kalphung an duhdan ngeia an tih/sawngbawl chuan Chinn leh Mike Chapman telvena album leh single te chu a tlukpha talo tih chu phat tur a awm ta lo. British music critics( Chanchinbu a music lam ziaktu)ṭhenkhat phei chuan Chris Norman leh a ṭhiante Smokie ho hi an kap na salh salh hle.

Kum 1981-ah "Solid ground" tih album chu ngawrh takin an buaipui leh ta char char mai le.an peih fel diam hnuah tlangzarh ta mai lo chuan chawlh hahdam hun an han hmang leh rih phawt a ni. A awm ve bawk e. An thawkrim na ngiang bawk a ni. Concert tour leh recording studio a album buatsaih reng rengin hun tam ber an hmang nitin a ni ber a. Rilru a intih engthawl chu thil ṭul leh tih makmawhah an ngai ve a ni.

Chawlh hahdam hun an han hmang zova, "Solid ground" chu an tlangzarh ta a. Kum 1963 daih tawh a Del Shannona'n a lo larpui leh hlawhtlinpui tawh "Little  town Flirt" tih an sak thar ve leh chu singlein an tichhuak hmasa nghe nghe a mahse Uk chart ah a kai pha ta lo, "Solid ground" album pawh hi a hlawhtling lem lo. 

 Kum 1982-ah EMI/BMG te nena an thawhhona kal zel(contrat kal lai) ang a an album hnuhnung ber tur " Strangers in Paradise" chu an tichhuak/tlangzarh ta a. He album pawh hian eng teh ruai a ang pha ta lo. Mike chapman leh Chinn te ṭhiandun te nena an thawhho lai an thleng phak ta lo chhunzawm zel tlat mai.

Hlaphuahthiam, producer, tawnhriat ngah, Smokie band ngei pawh khawvel hriata phochhuaktu tia sawi ngam, mi pahnih-Chinn leh Mike Chapman a lak aṭanga an kal hrang ta mai chuan Smokie a titla hniam ta telh telh zel niin a lang chiang ta telh telh mai.

"Strangers in Paradise" an tihchhuah hnu rei vak lovah Smokie  chuan album pahnih buaipuiin a studio lamah an inkhung leh ta tlak tlak mai le.An album pahnih buaipui chu Smokie band anga an album tur "midnight delight" leh Chris Norman Solo album hmasaber tur " Rock Away your Teardrops" te an ni.

He album pahnih buaipui hian an thawkrim viau na a, he album pahnih hi an han tlangzarh chuan a thleng sang ta chuang lo tlat mai.Amaherawh chu a hma lama an album hlawhtling leh an single hlawhtlingte avanga an huhang la na ve hrim hrim chuan heng an album hlawhtling vaklo tia kan sawi te hi hlawhtlinna tenau, sap hovin "minor success" an tih ang hi chu an tling phak thawkhat vek a ni.  Europe khawmualpuia Superstar an nive laklawh tawh tlat alawm.

Hlaphuahthiam leh producer tawnhriat ngah Chinn leh Mike Chapman te tel lova an album tihchhuah te hralh chhuah dan a tlahniam emaw tla hniam lo emaw, Chris Norman aw mawi dangdai tak, Lung ti leng em em bawksi leh aw ṭial ṭeng mawi tak maiin khawvel a deng chhuak hneh ve laklawh tawh bawk a, a bik takin europe khawmualpuiah an tlana mar chho reng mai bawk si nen, mite ngaih a engtizawng pawh a rimawi khawvel chanchina thil ngaihnawm leh mite bengverh chi Smokie band te hian an tawng chho leh ta.

Sweden pop group ropui leh anni baka zaithiam hmingthang hi vanhnuai leichinah an awm chuang dawn a mi tih a mawi khawp a hmingthang leh lar chung chuang, khawvel pop group huhang ngah--"ABBA" a an zaitunu(vocalist)pakhat zawk " Agnetha Faltkog" chuan Smokie band chu a rawn be pawp ta tlat mai.

Agnetha Faltkog hian a english solo album hmasaber tura hla pakhat "Once burn Twice Shy"tih chu sakpui/zaipui turin Chris Norman leh a ṭhiante-Smokie member te hi a rawn sawm a ni. Agnetha english solo album hmasaber hi "Wrap Your Arms Around Me" tih a ni.

Chris Norman leh a ṭhiante chuan Agnetha ngenna hi zahawm tiin, Van boruak thiang kuk maiah chuan thlawkin Sweden lam a pan ta a, Agnetha-i hla pakhat "Once burn Twice Shy" tih hlaah chuan an va zaipui, a sapṭawng takin part an va pe a ni .

 Agnetha Foltkog zaipui tur a United Kingdom aṭanga Sweden pana van dumpawl leh boruak thiangkara an thlawh lai hian Smokie memberte hian thlawhna chhungah committe pawimawh tak mai an nei a.Chu an committeena a an thurel pakhat chu sweden aṭanga united Kingdom a an let leh hunah Smokie band chhuahsan chuang lova zalen deuh hleka kawng hran zawh thei tura hunawl neih leh inhriatthiam tlan an remti tlang ta nghe nghe a ni.

Sweden aṭanga england an kir leh phat aṭang hian Chris Norman chu a solo album tur lamah a hun a pe nasain a insawrbing ta chat reng a ni.

Terry Uttley pawhin Status Quo drummer hlui "John Coughlan" a band tan bass a va perhsak ve ta reng reng bawk a, hetia an kalhran nak nak takah chuan smokie a tawp dawn ta mai a mi?  tih zawhna chu"  "Hetianga han kalhran nak nak te hian thil ṭha zawk a rawn herchhuah pui zawk dawn a, smokie band tana kawng ṭha zawk ngaihtuah chhuak turin kawng hran hranah kan han feh chhuak rih lawk a ni e" tiin media lamah an insawifiah nghe nghe a ni.

Chris Norman solo album pahnihna " Some hearts are Diamonds" chu europe khawmualpui bikah chuan a hlawhtling thawkhat hle a.Amaherawh chu khawvel rimawi sumdawnna a ram lian leh ram hausa US lamah hriat a hlawh pha lo.

Kum 1986 chu a lo herchhuak leh ta, Smokie Band rawih ṭan ta riau leh zu zi chho ta riau ni a lang chu tih nun chhoh leh tuma hmalak mek a nih lai leh europe khawmualpui a fans te an phur em em lai tak chuan Chris Norman chuan Smokie chhuahsan a tum thu a puang ta tlat mai le.

Smokie ti smokie tu, aw ṭeng ṭial mawi tak, aw ti-hriam leh ti ṭang deuh at tur a aw ro deuh halh bawk si, aw lian ṭha tak, a ti ngaihnobei zual tura engemaw changa tham deuh chhalh bawk si, Smokie rimawi ti phuisuitu chuan Smokie a chhuahsan tur thu a puang ta riap mai, Smokie band memberte tan chuan a va lungchhiatthlak dawn ve le!

Smokie tiparmawitu Chris Norman zamual a liam ta.chutihrual erawh chuan Chris Norman a hmun hlui luah khat turin Alan Burton a rawn inlar ve ta thung.

Alan Burton hi a pianchhuahpui aw hi Norman a aw ang maia, aw ṭial ṭeng mawi leh chak, ro deuh halh,tham deuh chhalh si,  zaidan kalphungah pawh Chris Norman te nen an style a inang sa hrim hrim bakah glam rock huanga zai ṭhin ve tho, tawnhriat nei sa, "Black lace band" vocalist a ni a. Smokie member te hmelhriat ṭha leh ṭhianṭha lo nisa hrim hrim a ni bawk. Alan Burton(vocalist) bakah Martin Bullard chu keyboardist atan an la thar bawk a ni.

Chris Normana'n Smokey a chhuahsan aṭanga reiloteah an drummer Spencer chuan smokie chu a chhuahsan ve leh ta bawk a..Spencer aiah Steve Pinnel an la ve zui nghal zat a, tichuan smokie band chuan an member thar te nen chuan muang chang lovin studio lamah album an buaipui zui leh nghal ta char  a. kum 1988 a rawn her chhuak a,  "All fire up"  tih album chu an rawn vawrh chhuak ve leh ta.

"All fire up" albumah hian Chris Norman solo album a " Rock away your Teardrops" chu a kalphung dang deuh hlek a style chi dang deuh a her danglamin an telh ve leh bawk a. chu chuan mite ngaiven a hlawh ve deuh na a, Chart lamah he albuma hla te hi an han thleng sang lutuk lem lo a ni.

"All fire up" albuma hlate hi an hun hmalam a khawvel nghawrnghing tham album an lo tihchhuah lar chhunzawm zelna leh a huhang ken tel chhunzawm zelna te chuan boruak a la chhem alh pha zel thova, Sap hovin hlawhtlinna tenau--"minor success" an tih ang chu an hlawh chhuak pha ve zel tho a ni. An pianna ram Uk ah emaw, USA-ah emaw, chart lamah thlengsang lo mah sela, europe khawmualpuia ram tam zawkah chart an kai pha tlat zel tho a ni.

Kum 1989 a "Boulevard of broken dreams" tih album an tih chhuah leh chu a hlawhtling ta tlat mai le. Norway ramah no-1 kar ruk chhung zet a cham a, Denmark leh Germanyah chartah a lang ve ve bawk a ni.

Kum 1990 a an single tihchhuah ""whose are these boots"? pawh chuan Norwayah vek no-1 a kai leh bawk a ni.

Kum 1994 a tihchhuah " Celebration" album chu smokie hla hlui, hun hmasa lama an lo hlawhtlinpui tawh ho, top charta an lo kaipui tawh hla te,  a kalphung dang deuh, a "Version" dang deuh a an sak thar leh, orchestra band te ruai a phuisui zawk leh version ropui deuh zawk a an cheibawl anni hlawm nghe nghe a, amaherawh chu sawi leh sawi hnu, he album hi hlawhtlin thawkhat chuan......sap hovin "minor success" an tih ang vel chuan a hlawhtling tho na a, hun hmasa lam a, "Stumblin' in" te, "If you think you know ho to love me" tih hla te,  ṭo thlipui tleh ang vut vut a thawmnaa khawvel an lo chhem nghing ang boruak an lo neih ve tawh zia te ngaihtuah a, chung hunlai boruak nen a khaikhin phei chuan "celebration" album chuan boruak a nei te ta hle a ni.

Kum 1995 chu Smokie tan chuan kum ṭhat kum a ni ta tlat mai. Chris Norman tel lovin UK chartah an rawn vawrh kai leh ta hlawl mai le.

"Living next door to Alice" tih hla, Chris Norman hova british chart an lo thlenpui tawhna hla ngei chu Alan Burton hovin a kalphung ti dangdaitu thil ho te leh tawite an belh zeuh bakah Nothern comedian lar tak mai "Roy Chubby Brown"  zaipui bawkin, he thil pahnih te mai hian boruak a siam nasa nge ni tehreng UK charttah No-3 an han thleng ta dawrh mai le.

He hla thunawn "Living next door to Alice"tih zawh chiah a " Alice? Who the fuck is Alice?" tih a dah belh/an belhchhah chuan mite lawm a hlawh ni fahmiang......a lar thar leh tak hlut mai...mak ve viau a ni.

Dutch tv programme lar tak "Dutch Cafe" a DJ lar tak Gompie chuan he hla hi record vein,  "Alice" tih lai chauh a hla hming(title) a hmagin, amaherawh chu tihdan tidang hret siin,  "  X? Who the X is Alice " tive thungin,a version chhete a tidang hret a ni, a ni hian UK chart-ah no-17 a rawn thlenpui ve hial a, Netherland chartah no-1 a thleng phak hial a ni.

Chutianga " Living next door to Alice" tih hla version thar single a tihchhuah nen a boruak thar an rawn siam leh hluai chuan european tour a nghawng chhuak leh ta a, Europeah an tour kual nghal ta zat a.

hetia europe tour an nei ṭan, German a an awmlai takin smokie band member te chuan chetsualna rapthlak tak an tawk ta tlat mai.

An zinkualna bus "tour bus" a an inphur chhuak chu kawnglaka an la tlan lai mek chuan thlipuiin a nuai ta, vur sur nasatak leh thlipui leh ruahpui tleh velin a nuai mek laia vur sur nasatak lo telve bawksi chuan kawng a tinal ta em em mai a. An tour bus chu kawng thlang lamah a tleng liam palh ta a ni.

An tour bus chetsualnaah hian an vocalist Alan burton chu a na hle mai a. ICU-ah ninga a awm hnuin a hliam tuar lovin a marphu a tawp ta, zamual a liam ta.

Vanduaithlak taka Alan burton fam channa chuan smokie band memberte rilru a khawih ngang mai a.Khawvel smokie fans te a barakhaih  hle bawk a ni. Alan burton nupui chuan Alan burton a hova an siam  album hralhnaah chanvo a neih ve zel tur thu smokie memberte leh commedian Brown te hian an puang nghal a ni.

Christ Norman awmloh hnu pawha smokie boruak siam thar puitu, UK chart no-3 kai pui leh dawrhtu an zaipuipu boral thut chuan khawvel pumpuia smokie fans te a barakhaih tih ka sawi tawh a smokie chu a tawp hlen tak tak dawn tawh a miang'? tih zawhna chu a lian ta hle mai le.

Chutianga vanduaina namenlo takin a tlakbuak hnu reiloteah  hun ṭha a rawn inherchhuak leh ta.

Smokie band ṭhian hnai tak glam rock vocalist tho, tawnhriat ngah sa, Concertnaah te smokie lo ṭawiawm ve fo tu, "Mike Craft" Chu a rawn inlar ve leh ta thung. Smokie band-in Zaipuipa(vocalist) tur an nei thar leh ta.

Mike Craft nen chuan studio lamah album thar tur buatsaihin an bur nghal leh ta chat mai le. Alan burton boral kum tho-1995 kum vek chuan an vocalist thar nen chuan album- " The world and Elsewhere"(1995) chu an ti chhuak leh ta a ni. Hnampui leh hnam upa nge nge an tih tawh lam hi chu an sahuai thing vawn ngheh bur ṭhinin anmahniah chiankakna " determination" a awm nasa ṭhin teh e.

Kum 1996 a rawn inher chhuak a, Smokie tiphuisuitu, a kila lung ṭangkai tak an lead guitarist "Alan Silson" chuan smokie chu a chhuahsan ve leh ta tlat mai. Alan Silson hian tawpchin leh richin awm lova rimawi chidang leh style dang luhchilh a duh thu chhuanlam a hmangin smokie hi a chhuahsan niin a sawi a. Rimawi khawvel lipui a tute emaw pawh nise, midang style dang huanga midang thawhpui a duh ve hrim hrim niin a sawi a, Tin, solo kawng lam zawh a rilruk ve tak thu a sawi bawk a ni. A chhuahsan hnu reiloteah "Mickey Finn's T Rex " a zawm ta nghe nghe a ni.

An lead guitarist Alan Silson hmun ruak luah khat tur hian an bandin hun reitak an lo hruaikual ve ṭhin tawh tho, concert tourna vela an  sound engineer leh guitar technician a an lo rawih ṭhin,,musician nibawk, "Mick Connel" chu lak a ni a. Tichuan, Mike Craft nen an lead guitarist thar nen studio chhungah hna an thawk leh nghal ta char char a, "Wild horses" tih album chu 1998-ah an tlangzarh leh ta. He album hi Nashville, Tennesseeah an record nghe nghe a ni.

Kum 2001 a lo herchhuak a, Smokie band chuan a rualin album pahnih "uncovered" leh " Uncovered too" chu an tlangzarh leh ta bawk a, he albumah hian anmahni band memberte hlaphuah a awm lova, rimawi khawvela hun kal tawh lama hla lar leh hlawhtling ho, saphovin "golden hits" an lo tih han tling phak,mizovin hla lar chuai theilo an tih ve thung,  hla ṭha leh mawi anmahni band-in an sak(covered) ve  dahkhawmna a ni nghe nghe.

Kum 2004-ah " On the wire" tih album chu an tichhuak leh a he albumah hian hla 14 a awm a, an band member te phuah vek a ni.

Kum 2006-ah "From the heart" chu an tlangzarh leh ta a. He albumah hian hun hmasa lama an lo hlawhtlinpui tawh, an hla lar(Hits) lo ni tawh ho chulmam ṭhat leh deuh leh remastered an dah tam zawk a.hla thar, ruah ṭham loh chu pathum chauh an dah tel a ni.

Zofate rilru a bu khuar nghet tak, Aizawl sipai lammuala rawn zai ve tawh hial bristish band Smokey te hi tuipuiral band ho zingah rau rau pawh a nawlpui anga an hlate zofa ten kan hriat tlanglawn ber anni hial maithei a ni.