Hripui dona chungchangah PM in State CM te a kawm; CM te'n kar hnih chhung Lockdown hun pawtsei turin thurawn pe

Kar 3-4 chhung hi he virus a darh loh nana hun pawimawh tak a ni:PM

PM in agriculture leh allied sector ngaihtuah a ngaih thu a sawi a, APMC dan pawh siam that a ni ang a ti

Aarogya Setu app hmang tangkai turin chah

PM in health professional te leh North East leh Kashmir zirlai te chungah mawi lo taka chete a dem

Engtik lai pawha damdawi mamawh a awm tur thu leh black market a zawrh phal a nih loh thu a sawi nawn

Aizawl | April 11, 2020:  Prime Minister Narendra Modi an vawiin khan video conferencing in state tin Chief Minister te COVID19 laka inven dan tur a sawipui a. Chief Minister te a kawm tum 3 na a ni a, April 2nd leh March 20th, 2020 khan alo sawipui tawh bawk.

Prime Minister chuan COVID19 darh zel tur venna ah hian Centre leh State thawhhona a that thu a sawi a, an hmalakna avangin he natna hri darh zel tur ven a nih thu a sawi a, amaherawhchu heti chung chian he natna hri hi a darh chak em em tho a ni a  ti. Kar 3-4 lo awm tur hi invenna hun pawimawh tak ala ni dawn chauh a ni a ti.

Prime Minister chuan damdawi, protective gear leh healthcare workers te tana hman tur equipment te mamawh ang zela a awm tur thu a sawi a. Damdawi lam thiamte sawi nawmnah an nih bakah enhran an ni chu pawi a tih thu a sawi a, North East leh Kashmir atanga zirlai ten khawpui liana harsatna an tawk chu a dem bawk a ni. Lockdown laia dan leh thupek kenkawh bakah social distancing a tul zel thu a sawi bawk.

Lockdown Exit Plan chungchang sawi hovin Prime Minister chuan state tin te nena lungrual taka thuthlukna lak a ngaih thu a sawi a. Sawrkar chuan mi zawng zawng nunna chhanhim chu a thupui ber a nih thu sawiin tunah chuan nunna chhan dawnin engkim a in huam tih hi a thupui a nih tawh thu a sawi bawk a ni.

Healthcare infrastructure tih changtlun a ngai tur thu a sawi a, tele medicine hmanga damlo leh doctor te an in enkawl a ngai tawh dawn a ni a ti bawk. Mi pungkhawm an tam lutuk lohna turin loneituten an kawtkaiah an thar chhuah an hralh a ngai a ti a,hei vang hian APMC dan pawh siam that a ni dawn a ti.

PM chuan Aarogya Setu app chu mi tam zawkin an hman a ngaih thu a sawi a. South Korea leh Singapore pawhin he natna vei leh rinhlelh te hetiang kaltlang hian chak deuhin an zawng chhuak ani a ti. India chuan heng ram pahnih te thil tawn atang hian a zir a ngaih thu a sawi a ni. He app hmang hian hmun danga kal tur tan e-pass a lak theih bawk ang.

Economy a nghawng dan tur sawiin Prime Minister chuan ramdang a innghat lova mahni intodelh thei ram kan nih a tul tawh hle a ti bawk.

Chief Minister te hian an state theuh a COVID19 positive case chungchang an sawi a, social distancing leh an hmalak dan te an sawi bawk a ni. Lockdown kar hnih chhung pawhsei rawtna bakah financial leh fiscal assistance Central atanga an mamawh thu an thlen a ni.

He inkawmna ah hian Union Home Minister, Defence Minister, Health Minister, Principal Secretary, Cabinet Secretary leh Government of India-a officials te an tel .