Hnam ropuite u, tho r'u le

Ziaktu: Lalhruaitluanga Chawngte

Hnam ropuite u, tho r'u le

Khatia ram a'n buai khan mipui kan buai a, kan phek buai ta a nih kha.

Thlipui a lo thawk a, tek pawh! Zan a hlauhawm a, chhun a ralmuang chuang lo. Thil hlauhawm leh ninawm a thleng indawt zut a, thil hahthlak leh rapthlak a inchhawk zur zut bawk!

Thlan tui a luang, mittui a luang, mipui mittui a luang. Harsatnain mipui a tuam a, hliam pawh a tuam hleih theih loh.

Khawthlir leh hmathlir a buai a, engmah a thlir theih loh; A tuka ei tur la neih pawh vanneihna a tlin chuan, mahni hmakhua thui tak thlir ngaihna a awm lo ang.

Chutiang hunah chuan kohhran a pen chhuak a, mipui thlavang hauh tur leh an hliamte tuamsak turin. Hlau leh biru chungin ei a lo zawn theih loh a, mipui hnena eitur sem chu hna hmasa a ni lo thei lo.

Buhfai an sem ta a.

Mi inah lutin riltamte chu buhfai pek an tum a, mahse an lo dawng duh lo thin nia! A thathawhtu pawimawh Rev Lalngurauva Ralte sawi ngei a ni ka hriat ni: mi an inkian a, mi dang pe phawt turin min lo ti thin, a ti a, keini chu kan ngaihtuahawm loh e, hei tlai chhum tur pawh kan la nei alawm, kawmthlangte khuan an mamawh ang, te an lo ti thin a ni awm e!

Chu'ng mite chu kan pi leh pute thlahte an ni a, chutiang chu kan hnam zia, kan hnam rilru puthmang, kan pi leh pute atanga kan rochun leh rochan a ni.

Hnam inhmangaih tak kan ni a, mi dangte ngaihtuah leh ngaihsak thin hnam kan ni; mi dangte thatna tura tuar huam thin hnam kan ni; kan inlungrual a, kan induhsak bawk. Chu chu thlahtute atanga kan nihna a ni.

He hnam hian hmelma a nei thin ang a, hmelma chu chi hrang hrang a awm thei ang. Kan hmelma chu eng pawh ni rawh se, sipai an ni emaw hnam hnam dang an ni emaw, hlemhletna a ni emaw rinawm lohna a ni emaw, ruihhlo a ni emaw nawmchenna a ni emaw, hri pawh ni se, eng hmelma pawh ni se he hnam hian inlungrual leh induhsak tawn chungin a bei ang a, Pathian tanpuinain a hneh zel ang.

Iner leh inelrel, inhnial leh inbeih te a hun lo a, insik leh inseh, inkher leh inkeuh hun a ni lo e. Mahni inhaivurna hun a ni lo a, mahni tanghma hai hun a ni hek lo. Sipai leh silai thuneihna hnuaia mangang leh riltama kan awm lai pawha thenawmte kian (chaw ei tur) hram hram thin hnam, hnam inlungrual kan nih hi. Ti r'u le, i tho ang u khai.



Pic: #John_Chhana

(A hnuaia fakna hi hmet ve rawh.)

1 Comments

He post chungchanga i ngaihdan lo sawi ve rawh:

  1. Khâng hun lâia an nun dan leh tûnlâia kan nun dan danglam tawh zia chu sawiin a siak lo. Mahni hma kan sial si, kan chapo si, kam duhâm si, mi rel ching hnam. Rinawmna leh tlawmngaihna kawmgah pawh a pumpui anga chhut ve ve in vái ho hi kan tluk tawh lo lutuk. Phakar hlawm ropui si. Sual sim harhna a thlen thuai loh chuan hnam biral mai tur zia kan ni e.

    ReplyDelete

Post a Comment

He post chungchanga i ngaihdan lo sawi ve rawh:

Previous Post Next Post