FEATURE STORY: DHARAVI A HRIPUI LUHDAN A CHIANG TA!


Dharavi hi chu Mumbai la kal miah lo pawhin kan hre tlangpuiin ka ring. Mumbai a mirethei veng (slum area) a ni a, a len zawng hi ṭin 50 hmun (2.5 Sq KM) vel niin chumi chhungah chuan mipui 6,50,000 chuang zet an awm lawi a! Khawvel a football club lian pahnih - Manchester City leh Manchester United - nei Manchester khua ai pawhin he area ah hian mi an tam zawk fe tihna a ni a. Asia rama mirethei veng lian ber a ni leh Oscar hial latu 'Slumdog Millionaire' movie ṭobul a nih avang te hian kan hre deuh ṭhum mai pawh hi a mak hran lo.

https://www.exploremizoram.com/
Dharavi 
April ni 1 tlai lam khan he hmuna khawsa pa pakhat chu Covid-19 vei a ni tih hmuhchhuah a nih thu puan a nih chiah khan khawvel hi a chek nghal tlawk tlawk a ni ber a. He hri leh a hrik laka invenna pawimawh ber pakhat chu Social/Physical Distancing (puipunna a tel loh leh midang 6ft aia hnaih loh) a nih laia he area a mihring bitzia leh an retheihna thlir chung chuan India mai ni lovin khawvel pum lu a tihai pha hial a ni.

March ni 23 khan he area ami puan zuartu pa pakhat, kum 56 mi chuan a khua a sik deuh avang leh a khuh deuh reng vangin doctor a pan a. Doctor chuan khuh damdawi leh paracetamol lo chawhin an in haw tir leh mai a. Ni 3 hnuah pawh a la zia theih loh avang leh a zual zel avangin March ni 26 khan an awmna hnaia damdawiin Sion Hospital a pan leh ta thung a. Amah berin a zinchhuah loh thu a sawi avangin khuh damdawi nen bawk an in haw tir leh a. Ni 3 a vei leh meuh chuan thâwk lamah harsatna a nei tel ta tlat mai a, March ni 29 khan chu hospital ngaiah bawk chuan va kal lehin an lo admit ta hial a. A awm dan enin doctor te chuan Covid-19 ring hlelin swab test tur lain an thawn ta a. Ni 3 hnua a result a rawn thlen chuan Covid-19 a lo vei reng tawh tih a chiang ta! A rang a rangin doctor te chuan Covid-19 patient te enkawl ṭhinna damdawiin lian zawk lama sawn tumin an buaipui nghal chuk chuk a. Mahse, awmzia a nei ta lo. Zanriah eikham bawr velah a nun a thlah ta.. (Mak ve mai mai chu ni 3 danah engkim khi a thleng chho tluang parh mai khi a ni!)

Chutiang a nih takah chuan Sorkar pawhin Dharavi him lohzia hriain hma a la zui nghal zung zung a. A in an va thlen chuan a chenpui - a nupui, fanu te 4 leh fapa te 2 pawh chuan a zin chhuah loh thu bawk an lo sawi leh ta si. Khawi aṭanga a kai nge ni ta ang? Nge Dharavi ah hian a lo darh tawh reng zawk em ni ang? Engtin nge Dharavi a la hima te hi an chhan theih tak ang? Zawhna hlir zawhna hlir, thuneitu lam luhai a zual ta hle mai..

Kil tin kil tang dapa an buaipui zui suau suau takah chuan helai complex ah tho hian in dang a nei a, chu a in pakhat zawkah chuan Tablighi Jamaat khawmpui Delhi a neih a kal rawn haw lam khual 5 a lo nei tih hriat chhuah a ni ta a. A kai theih dan hriat chhuah a ni ta phawt a, thawk khat chu a veng ta..

Police te chuan bawhzui zelin heng mikhual 5 te hi March ni 19 aṭanga ni 20 thleng chamin ni 21 khan Kerala lam panin an chhuak tih an hrechhuak leh ta thuai a. Tun thlengin anni 5 hi chhuizui zel an la ni ta a ni. A chhungten a zin chhuah loh thu leh passport a neih loh thu an sawi pawh kha Police te hian a dik ngei em fiah tumin an la chhuizui zel bawk..

Tuna hna pawimawh hmasa ber chu a darh tur ven hna a nih miau avangin a chhungte pawh quarantine an ni a. A chenna bul bawr vela in 308 zet leh in chhawng ruk a sang building 9 a dawr 80 awm te pawh seal nghal hmak a ni a. Helai bawra mi 2,500 vel zet te pawh quarantine tel niin sorkar hian ei leh in a tum vek a, helai bawr disinfect hna hi kalpui nghal niin a rinhlelh kai zual te pawh swab test tihsak nghal zel an ni a. Chung zinga kum 60 leh a chunglam mi 130 vel zet bakah thawk lam harsatna nei sa hrim hrim mi 35 te phei chu uluk taka vil reng an ni a. Tin, a thawktu lam tan protective gear pawh supply thlap a ni.

A darh zual zel palha inrinlawkna atan khum 50 awmna Sion Hospital pawh chu sorkar in quarantine facility a la nghalin a bul lawka sports complex ah khum 300 awmna quarantine facility a buatsaih nghal zung zung bawk a.

Heng an hmalakna te hian Dharavi hi a veng zo dawn em hriat tihar lehzual turin tun Ningani khan he area a khawsa private hospital a thawk doctor kum 35 mi chu a positive zui ve leh ta chiah a. Doctor chenna building a inluaha khawsa ve mi 800 zet an quarantine belh leh a, a contact zinga high risk zual 13 te pawh swab test tura thawnsak nghal an ni bawk. Doctor hian a thawhna hmuna Nurse 2 an positive tawh thu sawiin anni aṭang hian a lo kai hman a nih hmel. Kar tawp lam khan doctor chenna building a awm ve hmeichhe sumdawng kum 30 mi, metal fabrication neitu kum 60 mi leh lab technician kum 21 mi te pawh an positive tih hmuhchhuah leh a la ni ta zel mai bawk si! Dharavi hma khua hi engtin tak ni zel ang maw!?

Post a Comment

1 Comments

He post chungchanga i ngaihdan lo sawi ve rawh: