COVID-19 HRIPUI IN MIZORAM A NGHAWNG DAN

- ✍🏻Vidpuia Hrahsel

Covid 19 chu natna inkaichhawn theih Virus chi khat Coronavirus an tih te zing a mi in a rawn thlen a ni a, Covid 19 lam pum chu Coronavirus  Disease 2019 tihna a ni mai a. Kum 2019 December thla khan a hmasa ber atan mihring ah hmuhchhuah a ni. A natna hrik paitu Mihring te aṭanga kai chhawn zel  niin, Mihring leh mihring kan inbiak leh kan khuh a chil lo per aṭang te hian a kai theih a, kan khuh emaw kan ṭawng laia chil per awm te hi kan bul a mi te taksa ah a kai thei a ni. Mihring nilo kan chhehvel a, thil sakhat ah te hian hun engemaw chen a cham thei bawk. Kan chhehvel a thil awm te ah he Virus hi a cham ve theih avangin a inven dan ṭha ber chu kutsil fai ngun leh mask vuah te a ni.

| Steet of Aizawl City amid Lockdown |

Photo: Armand MS Dawngzela

Hripui hian India ram a lo thlen hma hauhin kan ram hruaitute chu a theih ang angin, he hripui do let nan hian an inbuatsaih a, keini aia ram ropui leh lian zawk, health care system nei ṭha zawk te pawh he hripui avang hian an buai hle a, he hripui hian mihring min ti ralkhel in min ti phili hle a, ram changkang te pawhin an do zawh loh he hripui hi kan ram ngei ah a thleng ve thei tih hria in kan sawrkar chuan chak takin a theih tawp in hma a la a. Heng ram changkang leh ropui te lakah hi chuan kan ram hi chu Davida ang maia te ni mah ila, hripui lian Goliatha ang maia rallian do turin kan in buatsaih a, chunglam khian kan dilna te mal a sawm a, tun hi kan thleng niin ka hria.

| Steet of Aizawl City amid Lockdown |
Photo: Armand MS Dawngzela

Mizoram Sawrkar chuan March ni 9.2020 khan Covid 19 hri darh mek avangin Mizoram leh ram dang inrinna International Border khar turin thupek a chhuah nghal a, a theih ang angin ramri paltlang apiang te chu screening neiin, state border ah entry point a siam bawk. Kan Zorama Zirna In sang ber Mizoram University pawhin MZU Sports leh Zirlai hlawhtling te chawimawina (Convocation) pawh a ti tawp lailawk bawk. A tuar tawh ram ten an tawrh nasat tawh zia kan hmu in kan hria a, ram changkang te lakah chuan tlawm tak leh te tak angin lang mah ila, sap thufing 'Prevention is better than cure' Tihdam aiin inven a ṭha zawk tih thu hi a dik zia kan hria a, kan theih ang angin fimkhur tluk a awm lo tiin kan in puahchah a ni. Mizo hnam hi inkawm khawm nuam ti, ṭhenawm te nen a, inpawh tak, lenkhawm nuam ti, hnam kan ni a, he hripui inkai dan ṭha ber punkhawm lah chu a uar ber ber, a tello a kan hnam nihphung bo vek thei a ni tlat thung. Mizoram a tlawmngai pawl lian ber CYMA chuan March ni 12.2020 khan YMA thil a punkhawmna zawng zawng a titawp lailawk bawk a, he thil ah hian CYMA in a awp chin Headquarters, Sub, Branch leh Group te chu an thuneihna chin a, inawp dan siam mai turin thu a chhuah bawk. He hripui hian min awp bet hneh dan hi a namai lo, kan hnam in a chin ṭhan mitthi lumen, khawhar in kal leh thlan laih thlengin a nghawng a, eng chen nge kan mumal loh ang tih a sawi lawk theih siloh! Hripui kian zai rel mai tawh rawh tiin kan rilru ah kan sawi kan sawi mai anih hi!

| Steet of Aizawl City amid Lockdown |
Photo: Armand MS Dawngzela

Mizoram Sawrkar vek hian March ni 16.2020 khan Mizoram a Zirna in zawng zawng a khar lailawk a, Mizoram University pawhin March ni 17.2020 khan zirna in a khar lailawk bawk. Mizoram a Kohhran hrang hrang in March ni 18.2020 khan Inkhawm zawng zawng a titawp lailawk bawk a ni. Mizoram Tourism Department pawhin March ni 19.2020 khan a hnuaia Lodge te pawh a khar laikawk bawk. Mizoram Sawrkar hmalakna in Central Sawrkar in Lockdown a tih hma daih tawhin March ni 21.2020khan Mipui punkhawmna a khap a, heng an thuchhuah ah hian Lirthei chhuah, mipui mimir chhuah mai bakah dawr zawng zawng hawn a khap bawk. Central Sawrkar chuan March ni 22.2020 khan Janata Curfew a puang ve bawk. Central chet hma daihin Mizoram Sawrkar chu a lo inhmakhua lawk daih tawh a ni. Mizoram Khua zawng zawng zinga mipui mimir chhuah khapna (Lockdown) kalpui hmasa ber chu Sairang khua an ni, March ni 20.2020 khan pawn chhuah an khap daih tawh a ni. Mizoram Sawrkar hian March ni 24. 2020 khan Lengpui Airport a khar bawk a, hemi hma daih February aṭang khan Lengpui Airport ah Mizoram Health Department hmalakna vekin Screening neih ṭhin a ni a, home quarantine turin khualzin lo haw apiang te chu an in lamah ni 14 tal inkhung tura thupek an ni.

Hripui do nan hian Mizoram Sawrkar chuan March ni 18.2020 khan Khaw tinah hripui do let nan Village/Local Level Task Force a din a. Task Force te hian anmahni huamchhung ṭheuh ah thuneihna zau tak an nei a ni. Hripui avangin mitin kan chawl ṭhup a, punkhawmna zawng zawng khap a ni a, mipui te tana thawk turin Local Level Task Force a din hi ram dang ten Mizoram min awhna a  ni. Mizo nih ti nuamtu Tlawmngaihna hian he hripui laka hian min va thlamuan tak em! Eng ang a hripui chak pawh lokal se, mipui te tana mi inpe mi tlawmngai te bawk hian Mizoram chhung a cheng Mizo hnam te nun a ti nuam em em a ni. Hri laka  inven na tur atana ṭangkai tak PPE   (Personal Protective Equipment) chu March ni 27.2020 khan Mizoram Sawrkar hian a chah thleng bawk. He PPE kit hian Mizoram tana thawktu Task Force tin te a daih dawn lo tih hria in hnam dang te neih ve loh Mizo hnam ti nuamtu Mizo Nulate an thiam hmangin an rawn penchhuak a, he hripui avang hian Mizo mipuite kan ṭangrual a, ṭanrualna hi chakna a ni tih hi a thu mai nilo, a takin Mizo Nulate hian an lan tir a ni. Aizawl khawchhung a, puanṭhui thiam Mizo Nulate kan hnam tan an thiamna an hlan a, Task Force te indaih lohna hmaikawr, leh invenna kawr te an ṭhui a, an va fakawm tak em, hnamdang te lakah inchhuan na tham a ni, Central lam News hrang hrang ah pawh an fakawm zia chhuah a ni. Hei mai hi nilo, Women's Polytechnic Institution chuan a mamawh te tan kut silfaina (Hand Sanitizer) an siam chhuak a, mask an ṭhui bawk.

Khawlai reh ṭhuap mahse Mizo hnam tlawmngai te thawm ri hi a  ring in a va mawi em! Hripui do let nan kan theihtâwp kan chhuah a, ramri a tlawmngaia duty te hi an fakawm a, kan ram tan a, an tawrhna hi a thlawn ka ring lo, he hrileng hian Mizo hnam ah ṭanrualna a siam a, kan inlungrual a, pawl pawl sawi lovin Lal Isua Jerusalem a Lal anga a luh champha Tumkau Ni pawh vengtin Task Force hmalakna in kohhran bil sawi lovin Lal Isua fakin kan chawimawi a nih kha! Siamtu khian kan fakna aw ri thangchhuak kha mawi a tih  ka va ring em!  Democracy Mipui Rorelna ram a awm si hi, communist ram ang maiin intluk tlâng takin kan awm tlat zuk nia! He Hripui avang hian Pi Pute Rohlu 'Sem Sem Dam Dam, Ei Bil Thi Thi',  chu kaihthawh in a awm a, vengtin ah Task Force te hmalakna avangin ṭanpui ngai chhuanchham te an awm tak hlauh in tiin bengvar kan in chhuah zel a, a thawm ngaihthlak a va nuam em. Vengtin ah Sawrkar buatsaih Food Chain hmangin Task Force tin ten hma an la a,  thlai hnah chawhmeh kan kawt kai mai ah te zuarin, veng ṭhenkhat phei chuan a thlawnin an sem hial! Mi inphal te, an neih ui lova mi inpe te, an thla khat hlawh ai pe te, sawrkar department hrang hrang ten CM Relief Fund ah an chhungkhawm a, heng mi inpe te avang hian a ni, he Hripui hi kan do let theih ni. Heng mi inpe te avang hian Mizo Hnam nih ringawt pawh hi a va nuam em!

Hripui avangin sumdawnna tamtak khar ani a factory liante,industry liante stock sa a zo a, foreign exchange system a buai a importer leh export lamah buaina kan tawk ta. Sorkar laipuiah lah nise sum chhun luh tur a tlem ta a sem chhuah a tam a lakluha tlem ta. Lo neitu te an chawl a. Mipui pungkhawm khap  a ni a, factory chawl ngailo mihring chhawr theihna reng reng khar a ni a, inah kan awm vek a ram a buai zo ta, economic in a nghawng buai nasa khawp mai. Foreign exchange lah engmah a theih tawh manglo, engkim kalpawh na block a ni a, old stock kan ring a sorkar in damdawiin lamah sum a dah ṭhat hnem angai a, hripui hian harhna ṭha tak min pek chu nitin a, mihring in kan mamawh ah te Intodelh kan mamawh zia min hriatchhuah tir a ni. Kan kal pelh ṭhin mai mai Chawhmeh thlai hnah zuartu te hlut zia kan hriat phah a, a sawi chauh nilo, a tak ke pen kan mamawh zia kan hriatchhuah a hun a, Mizo tlawmngaihna te, Pi leh Pute rohlu te a taka kan kal pui angaih zia te, kut hnathawktu te thawhrimna te hriatchhuah phah ila, a tur ve rengah kan ngaih Inkhawm hlut zia te, ṭhenrual inkawm khawm thlengin he Hripui avang hian insiam that tum ila, he Hripui hian Zofate ah Harhna ṭha zawk min thlen ngei teh se.