- K Remruatfela
Chu zân chu kumkhata thla ên ber zân, nula leh tlangvalten an nghahhleh êm êm thin, ‘Arkaiden Zân’ a ni a. Hmangaihna par tlân mêk ten lungchim taka an Lalngoi te nen chu zân duhawm tak chu an lawm dun melh melh lâi chuan, hmangaihna tuipui zâua khawhar taka indawm kûn mêk, Mac Graw chu rilrua vei rûk leh riak awm tih hriat tak mai hian pindan chhûngah a inkharkhîp tlat mai a. A iptea uluk taka a fûn tih hriat ngawih ngawih lehkha them zawr hnâp tawh chu uluk fahran hian a thlêk leh melh melh thin a, a chângin a mittui a far leh fep thin bawk a.
Chutia rilru hnîm taka a awm lai chuan thawklehkhatah ring fahran hian a tap chhuak ta hial a! Amah hi pa sa tha leh intipa ve tak thin hi a ni a. Hetia patlinga pumpa meuh awrâwl chhuah meuha a han tah chhuah tâk phut chhan chu eng dang vâng ni lovin, a lalngoi, a hmangaih êm ém leh a nun tihlimtu tur ni-a a lo rin rûk ve thinin a hmangaihna chhâng lêt lova a lo hnâwl vang a lo ni. Nimahsela, Mac Graw chuan a lalngoi chu a hmangaih êm avangin a hmangaina hnâwlin vâl dang thlang zâwk mah se, chuti maiin a theihngilh thei chuang hauh lova, a lalngoi chu a duat tur anga mi dangin an duat ve loh palh a, a rilru te an lo tih nata, an lo tihhrehawm thin a hlauh êm avangin a lungchhe lutuk insumngaihna hrelo chuan “Take good care of my baby, Please don't ever make her blue; Just tell her that you love her, Make sure u`re thinking of her in everything you say and do” tiin a cho loh vala chu a chah ta lawm lawm ringawt zâwk a.
A ni tak asin! Hmangaihna kawng hi chu a lo mak ngawt mai! Hmangaihnaa chiah zawr leh bual âta awmte tan hi chuan thil âwmlo leh inmillo hi a awm thei tak tak tawh lo! A hmangaih ngawih ngawih, a enchimloh, a lalngoi chuan a hmangaihna hnâwlin hmangaihna dang zawng zâwk mah se, aman ani a hmangaihna tluka thûk hian tuman an hmangaih ve theih tak tak hi a ring thei lo a. Hmangaihna dang a lo dài a, hmangaihtu dik hriatthiam hun te a lo thlen palh hlauh taka tiin “Take good care of my baby, Be just as kind as you can be; And if you should discover that you don't really love her, Just send back my baby back home to me” tiin zah pawh dâwn lovina cho loh vala chu a ngên ta ngawih ngawih ringawt mai a ni.
Amaherawhchu, Mac Graw tân chuan chu hmangaihna lainatawm tak chu Pathian hmangaihna hriatfiah tîrtu a lo ni ta hlauh zâwk a! A pindan chhungrila inkhungin suangtuahna khawvelah a chêng ta melh melh a. Keini mihringten hmangaihna dika min hmangaihtu leh kan hawisân fo thin chung pawha duat leh hmangaih taka min la chelh tlat thin tu, Pathian leh kan nu leh pa te rilru tinâa hmangaihna kan lo haider thinzia te leh an rilru kan lo tihhrehawm thin turzia te inngaihtuah lêt neuh neuh chungin, chu zân khawhar tak chu a suar tluan ta zak a.
(A hnuaia fakna hi lo hmet ve rawh.)
Post a Comment
He post chungchanga i ngaihdan lo sawi ve rawh: